“Agserbikamto ken Jehova a Diosmi”

“Ngem siak ken ti balayko, agserbikamto ken Jehova.”​—JOSUE 24:15.

1. Kasano a makapagserbi ti libro ni Josue a pakaparegtaan ken pakasalaknibantayo?

DAGITI makapatignay-rikna a pasamak iti libro ti Josue nailanadda a “pakasursuruantayo” ken kas “pagulidanan” a mangparegta ken mangsalaknib kadatayo “a dimtengan dagiti panungpalan dagiti sistema dagiti bambanag.” (Roma 15:4; 1 Corinto 10:11) Dagiti nadiosan a kualidad, kas ti panagibtur, pammati, ken panagtulnog, ti naigunamgunam. “Gapu iti pammati natuang dagiti bakud ti Jerico idi nalpasda a linawlaw ti arubayanna kadagiti pito nga aldaw. Gapu iti pammati ni Rahab, daydi balangkantis, saan a nairaman a napukaw kadagiti dida kinayat ti namati, nga inawatna a sitatalna dagiti managsimisim.” (Hebreo 11:30, 31) Ti pammati ni Josue, Rahab, ken dagiti dadduma pay a nasungdo idi ti rebbeng a mangparegta kadatayo nga agbalin a nabileg ken maingel, tapno mairingpastayo ti trabaho ti Dios itatta.​—Josue 10:25; Juan 4:34.

2. (a) Kasanot’ panangipakita ni Josue iti panagtulnog agingga iti kamaudianan a detalye? (b) Aniat’ napasamak kadagiti bambantay ti Ebal ken Gerizim?

² Kalpasan ti makaikeddeng a panagballigi idiay Ai, inikkan atension ni Josue dagiti detaliado a bilbilin a nailanad idiay Deuteronomio 27:1–​28:68. Idiay Bantay Ebal isut’ nangipatakder iti maysa nga altar a naaramid iti batbato a di natagaan, ket sadiay intungpalna ti bilin: “Ket mangidatagkanto kadagiti datdaton ti kappia ket mangankanto idiay, ket agrag-okanto iti sango ni Jehova a Diosmo.” Dadduma a batbato ti naibangon met kas pakalaglagipan, a pinapudawda, ket dagiti sasao ti Linteg naisuratda iti rabawda. Kalpasanna nabingaybingay dagiti tribo, maysa a grupo ti agtakder iti Bantay Gerizim “a mangbendision iti ili” ket ti sabali a grupo ti “maipaay iti lunod idiay Bantay Ebal.” Kadagiti natbag a timek inyebkas dagiti Levitas dagiti lunod nga agpaay iti panagsukir, ket simmungbat amin dagiti tattao, “Amen!” Kalpasanna naiyebkas met dagiti bendision a maipaay iti panagtulnog. Ngem ay-ay pay ti umay iti Israel no mapaayda a ‘mangitungpal kadagiti amin a sasao ti linteg ken agbuteng iti nadayag ken nakaam-amak a nagan ni Jehova a Dios’!​—Josue 8:32-35.

3, 4. (a) Ania a nagbileg a leksion ti impaay ti kurso ti Israel kadatayo itatta? (b) Apay a ditay koma maum-uma a makangngeg a maulit-ulit dagiti isu met la a bambanag? (c) Aniat’ kasapulan tapno makastrektayo iti “nailet a ruangan”?

³ Intultuloy kadi ti Israel ti nagtulnog ‘kadagiti sasao ti linteg’? Agpapan pay iti maulit-ulit a pammagbaga ni Moises, ken kamaudiananna ni Josue, nakalkaldaang ti pannakapaayda. Anian a nagpigsa a leksion ti ipaay daytoy kadatayo itatta! Agpapan pay dagiti agtultuloy a pakdaar, kanayon nga adda sumagmamano a pagarupda a mabalinda a labsingen dagiti pagannurotan ti Dios, ‘nga aramidenda ti kabukbukodanda’ ket makalasatda pay latta. Anian a kinamaag! Iti panangtukoyna kadagiti kapadasan ti Israel, kuna ni Pablo: “Ti mangipagarup nga adda a sitatakder kitaenna ta di maikulbo.”​—1 Corinto 10:12; Eclesiastes 2:13.

⁴ Dadduma nga adda iti ili ti Dios ti nangbabalaw kadagiti pakdaar a nait-iteden, a kunkunada a naumadan a makangkangngeg kadagiti isu met laeng a bambanag a maulit-ulit. Ngem dagitoy dagiti masansan nga umuna a matnag iti silo ni Satanas. Ti naipaltiing a libro ti Biblia a Deuteronomio (iti Hebreo Mish·neh’ hat·to·rahʹ kayatna a sawen, “Panangulit iti Linteg”) ti naglaon nangnangruna kadagiti uppat a diskurso ni Moises; pinagbalin a nabatad daytoy iti Israel a masapul nga agtulnogda iti imun-unan a naiyebkas a linlinteg ni Jehova. Nasurok a mamimpat a daras nga ad-adu a sasao ti inusar ni Moises iti pammakdaar maipapan iti panagsukir ken dagiti ibungana a “lunod” ngem ti inusarna iti panagsalaysay kadagiti “bendision.” Idiay Bantay Ebal, pinakaammuan manen ni Josue ti Israel a masapul nga agtulnogda. Di kadi ipamatmat daytoy kadatayo no kasano kapateg ti intay panagregget a “sumrek iti nailet a ruangan”?​—Mateo 7:13, 14, 24-27; 24:21, 22.

5. Ania a panagtitipon dagiti ar-ari ti naipasango ita iti Israel, ket aniat’ umas-asping a kasasaad ti makitkitatayo itatta?

⁵ Maysa a makaikeddeng a panagrupak ti agdama a mabukbukel itan. Ti umuna a siudad ti Jerico ti naipaknin, kas ti pannakadadaelto ti ulbod a relihion inton mangrugi ti “dakkel a rigat.” Ti Ai natuangen. Ngem ita “isuamin dagiti ar-ari nga adda iti ballasiw iti Jordan iti katurodan ken iti Shephelah ken iti isuamin nga igid ti Dakkel a Taaw ken iti sango ti Lebanon, dagiti Heteos, Amorreos, Cananeos, Perizeos, Heveos, ken Jebuseos . . . naguummongda tapno makigubatda ken Josue ken iti Israel iti maymaysa a timpuyog.” (Josue 9:1, 2) Iti moderno-aldaw a katupag daytoy, makitatayo dagiti nasnasion iti daga nga agkaykaysada itan kas ti makunkuna a Naciones Unidas. Sapsapulenda ti talna ken talged a maipaay iti bagbagida met laeng kadagiti kabukbukodanda a termino ngem “agpipinnatigmaanda a maibusor ken ni Jehova ken maibusor met iti pinulotanna,” ti Dakdakkel a Josue. (Salmo 2:1, 2) Anianto ti ibanagna?

Panagtignay a Buyogen ti Kinasirib

6, 7. (a) Iti ania ti nangipakitaan dagiti Gabaonitas ti interes, ket ania nga estratehia ti inaramidda? (b) Kasano a kinedngan ni Josue dayta a banag?

⁶ Kas ken Rahab sakbayda, dadduma a di-Israelitas itatta nangrugidan a mangipakpakita iti interes iti pannakailasat. Dagitoy isuda dagiti agtataeng iti Gabaon, maysa a dakkel a siudad iti amianan ti Jebus, wenno Jerusalem. Nangngeganda ti maipapan kadagiti mannakabalin nga ar-aramid ni Jehova ket determinadoda a mangsapul iti talna ken talged kadagiti termino ni Jehova. Ngem kasano? Nagbaonda idiay kampo ti Israel nga adda idiay Gilgal kadagiti lallaki a nagawit kadagiti namagaanen ken binuoten a tintinapay ken kadagiti daan ken napigpigisen a lallalat a pagikkan ti arak ken nagisuotda kadagiti daan ken takuptakup a kawkawes ken sapsapatos. Idi umadanida ken ni Josue, kuna dagitoy a lallaki: “Nanipud iti adayo unay a daga dagiti ad-adipenmo immayda gapu iti nagan ni Jehova a Diosmo, ta nangngegmi ti damagna.” Idi nangngegna daytoy, “ni Josue nakikappia kadakuada ket nakinumo kadakuada a tiddaenna ida a sibibiag.”​—Josue 9:3-15.

⁷ Nupay kasta, di nagbayag naammuan ti Israel a dagiti Gabaonitas iti kinapudnona ket ‘agnanaedda laeng iti nagtetengngaanda’! Kasano ita ti panangibilang ni Josue iti panangallilawda? Pinadayawanna met laeng ti sapata a naaramid nga imun-una kadakuada, ‘tapno agbiagda, ken agbalindanto nga agpukpukan iti sungrod ken agsaksakdo a maipaay iti amin a gimong.’​—Josue 9:16-27; idiligyo iti Deuteronomio 20:10, 11.

8. Kadagiti ania a pamay-an nga inyanniniwan dagiti Gabaonitas ti “dakkel a bunggoy”?

⁸ Adu kadagiti Netineo, a kadagiti kamaudianan a tawtawen nagserbida idiay templo ni Jehova, ket mabalin a kapuonan ida dagiti Gabaonita. Gapuna dagiti Gabaonita nasayaat unay ti panangiyanniniwanda iti “dakkel a bunggoy” a mangipapaay iti Dios iti sagrado a serbisio iti aldaw ken rabii idiay templona.” (Apocalipsis 7:9, 15) Nupay agbibiagda iti lubong a kasla ti Canaan, iti puso dagitoy ket “saanda a paset ti lubong.” Iti dati, an-anusanda dagiti kasla “binuoten” a naespirituan a tintinapay, kas kadagiti adda a masarakan kadagiti ig-iglesia ti Kakristianuan, ket awananda ti “arak” ti rag-o. Idi maidennada iti ili ti Dios, nabigbigda a ni Jehova ti agar-aramid kadagiti nakaskasdaaw a bambanag babaen kadagiti saksina. Ket isuda ti nagnagna iti nakabaybayag manipud lubong ni Satanas tapno maisukatda dagiti pisangpisang a ‘kawkawesda’ a maipaay iti baro a pakabigbigan kas dagiti napakumbaba nga ad-adipen ni Jehova, a nakawesan ti baro a personalidad.​—Juan 14:6; 17:11, 14, 16; Efeso 4:22-24.

Panangsuportar ti Organisasion

9. (a) Aniat’ simmaruno a timmaud a krisis? (b) Kasanot’ panagtignay ni Josue, ket iti ania a pammatalged?

⁹ Idi ni Adonisedec, nga ari iti Jerusalem, nangngeganna a nakikappia dagiti Gabaonitas iti Israel, “nagamakda unay, agsipud ta ti Gabaon isu idi ti maysa a siudad a dakkel, maysa kadagiti naarian a siudad, . . . ket isuamin dagiti tattaona mamaingelda.” Isu ti timmipon kadagiti buybuyot dagiti uppat a sabali nga ar-ari, ket rimmautda a maibusor iti Gabaon. Dagdagus, nagapelar dagiti Gabaonitas ken Josue: “Sumang-atka a madaras kadakami ket ispalennakami ket badangannakami.” Dagdagus, simmungbat ni Josue, ket isu ti pinabileg ni Jehova, a kunkunana: “Dika agbuteng kadakuada, ta inyawatko ida kadagita imam. Awan ti uray asinoman a tao kadakuada nga agtakderto iti sanguanam.” Ni Josue ken dagiti tattao nga agkakamaingel simmang-atda a “nagpatpatnag” tapno kellaatenda a naan-anay dagiti kabusor.​—Josue 10:1-9.

10. (a) Ania a kita ti panagtignay itatta ti katupag ti pannakalakub ti Gabaon? (b) Ania a determinasion ti inyebkas dagiti moderno-aldaw a Gabaonitas?

¹⁰ Kas kadagidiay lima nga ar-ari, dadduma a papangulo ti gobierno itatta ti makapungtot a makakita nga adu kadagiti iturayanda​—uray pay “dagiti agkakamaingelda”​—​ti mangal-ala iti takderda a maipaay iti Dakdakkel a Josue ken iti sangalubongan a Pagarianna iti kinalinteg. Patien dagitoy nga agtuturay a rebbeng a mataginayon dagiti nasionalistiko a pagbeddengan, uray pay dagiti nasnasion ti masansan nga agsususik ken agdadangadang iti maysa ken maysa. Gapu itoy padpadasenda a gupden ti abasto dagiti naespirituan a taraon nga agpaay kadagiti managayat ti talna a “dakkel a bunggoy,” nga iparitda ti panaggigimong nga isut’ pangal-alaanda iti daytoy a “taraon,” ken pasardengen ida a mangisasao kadagiti dadduma ti maipapan kadagiti naespirituan a bambanag. Ngem dagiti moderno a Gabaonita agtaktakderda a sisusungdo a kadua ti naespirituan nga Israel, a kunkunada: “Dakami kumuyogkaminto kadakayo.”​—Zacarias 8:23; idiligyo iti Aramid 4:19, 20; 5:29.

11. Kasano a tamtamingen dagiti Saksi ni Jehova dagiti krisis itatta?

¹¹ No dumawat ti “dakkel a bunggoy” iti “ina” nga organisasion a maipaay iti tulong, daytoy ti maited nga insigida ken iti kalalainganna a rukod. Ti nasiglat a panangar-aramid dagiti Saksi ni Jehova kadagiti bambanag ti makita met kadagiti adu a dadduma a pamay-an​—kas iti insigida a panangaramidda kadagiti tulong kalpasan dagiti gagangay a didigra ken dagiti nadaras a panagibangonda kadagiti kasapulan a Kingdom Hall ken adu pay a lugar a pagtataripnongan a pangipaayanda iti “taraon.” Idi naeskediol ti maysa a kumbension ti maysa a kumbension iti daytoy napalabas a Hunio idiay Yankee Stadium, Nueva York, maysa a buyot dagiti managdalus a boluntario ti simrek iti tengnga ti rabii kalpasan ti paay-ayam ti bola; di pay naaddaan ti stadium iti kasta a langa ti kinadalus ngem iti bayat dagiti uppat nga aldaw a simmaruno. Dagiti responsable a panglakayen dagiti Saksi ni Jehova ti nagtignay nga insigida, ken kasta met, tapno mangtaming kadagiti parikut a rumsua maipapan iti panangikaskasaba iti naimbag a damag.​—Filipos 1:6, 7.

Ni Jehova Nakidangadang nga Agpaay iti Israel

12. Ania dagiti milagro nga inaramid ni Jehova iti pannakidangadangna a maipaay iti Israel kas panangdepensa kadagiti Gabaonitas? (Idiligyo iti Habacuc 3:1, 2, 11, 12.)

¹² Ngem kitaenyo, itan, ti Gabaon. Rirriribukenen ni Jehova dagidiay kabusor a buybuyot. Isuda ti kinamkamat ti Israel iti naindaklan a panangpapatay. Ket ania ti makitatayo a naibuyat manipud langit? Dagiti dadakkel nga uraro! Ad-adu ti pinapatay dagitoy dadakkel nga uraro ngem kadagiti mannakibakal iti Israel. Itan, denggenyo. Makisasao ni Josue ken ni Jehova, ket ania ti kunaenna “iti imatang ti Israel”? Daytoy: “Init, agintekka idiay ngato ti Gabaon, ket sika, bulan, idiay lobong ti Aijalon.” Maysa manen a nakaskasdaaw a milagro! “Iti dandani maysa nga aldaw,” sinilnagan ti init ti pagbabakalan, agingga a naan-anayen ti ibabales ti Dios. Saan nga agpaay kadatayo a suppiaten no kasano ti panangaramid ni Jehova iti dayta a milagro, kas ti saantayo met a panagduadua no kasano ti ‘panangaramidna’ kadagiti dua a silsilaw a nagsilnag iti maikapat nga “aldaw” iti panamarsua. (Genesis 1:16-19; Salmo 135:5, 6) Ti rekord ti makakumbinsir ken nalawag: “Ket awan idi ti aldaw a kasla iti daydi idi kasakbayanna wenno iti kalpasanna, a ni Jehova impangagna ti timek ti maysa a tao, ta ni Jehova nakigubat a gapu iti Israel.”​—Josue 10:10-14.

13. Kasanot’ panangparegta pay ni Josue kadagiti papangulona, ket ania ti maudi a bungana?

¹³ Dagiti panagtignay a panangdalus ti naipatingga babaen iti pannakapapatay dagiti lima nga ar-ari, nga iti daydi kuna ni Josue kadagiti papangulona: “Pumigsakayo ken umingelkayo, ta kastoy ti aramidento ni Jehova kadagiti isuamin a kabusoryo a kabakalyo.” Daytoy ti napaneknekanen a pudno maipapan kadagiti pito nga ar-ari ti Canaan ket nagtultuloy a pudno ta ti sabali pay a naan-anay a bilang dagiti 24 a pagpagarian ket naituangda. Iti daydiay laeng, kalpasan ti innem a tawen a pannakibakal, a nakainana ti daga.​—Josue 10:16-25; 12:7-24.

14. Iti ania a kababalin ken panagtalek ti rebbeng a panangsangotayo iti Armagedon?

¹⁴ Itatta, bayat a sangsanguentayo ti maudi a gubat ti Armagedon, sapay koma ta umingel ken bumilegtayo a kas ken Josue, dagiti mamaingel a tattaona, ken amin ti naglawaan a pakarso ti Israel. Mabalintay ti agtalek a, kas ti panangaon ni Jehova iti sumagmamano milion nga Israelitas a di nasaksaktan a napan idiay Naikari a Daga, kasta met makaaramid pay kadagiti dadduma a nakaskasdaaw a milagro iti panangilasat kadagiti minilmilion nga awanan buteng nga ilina iti Armagedon nga agturong iti baro a sistema.​—Apocalipsis 7:1-3, 9, 14; 19:11-21; 21:1-5.

Ti Pangngeddengtayo

15. Ania a kita dagiti trabaho ti namnamaen dagiti “sabsabali a karnero” idiay baro a sistema ti Dios?

¹⁵ Nupay isut’ umadanin iti edad a 90, naipasango pay ni Josue iti maysa manen a dakkel a trabaho​—ti panangbingaybingay ti daga kadagiti tribo ti Israel. Dina kinaipapanan daytoy a ti biag ket agbalinen a nalaka para kadagiti Israelitas. Kinapudnona, dimmawat ni Caleb ti maysa a teritoria idiay Hebron, a sadiay ti pagtataengan ti higante nga Anakim; kayatna nga itultuloy nga usaren ti bagina a mangpaksiat kadagiti maudi kadagiti kabkabusor ni Jehova. Saan nga ipampamatmat daytoy a bayat ti Milenio a Panagturay ni Kristo ditoy daga ket addanto dagiti natauan a kabkabusor. Ngem addanto ti trabaho nga iringpas wenno aramiden. Idiay baro a sistema dagiti bambanag, ditay koma namnamaen ti maysa a nalaka, aglaladut a wagas ti panagbiag. Kalpasan ti panangawatda kadagiti pakaitudinganda idiay “baro a daga,” dagiti “sabsabali a karnero” ti Apo agtrabahodanto iti adu iti naindaklan a proyekto a panangpapintas iti daga ken panangbalbaliw iti daga a pagbalinen dayta a literal a Paraiso.​—Josue 14:6-15; Marcos 10:29, 30; Roma 12:11.

16. Ania ti iladladawan itatta ti urnos ni Jehova a maipaay kadagiti “siudad a pagkamangan”?

¹⁶ Iti panangitudingna iti daga, nangilasin ni Josue ti innem a siudad dagiti Levita a pagbalinen a “siudad a pagkamangan,” tallo iti tunggal agsumbangir a sikigan ti Jordan. Urnos ni Jehova daytoy a panangsalaknib kadagiti makapapatay a dida inggagara a makapagkamang iti maysa kadagitoy a siudad. Ti kasta a makapapatay paneknekanna nga isut’ addaan ti nadalus a konsiensia iti imatang ti Dios, ket aramidenna daytoy babaen ti panagtalinaedna iti siudad agingga iti ipapatay ti nangato a padi. Kasta met, gapu kadagiti napalabas a pannakitimtimpuyogda iti daytoy managbasol ti dara a lubong, ti “dakkel a bunggoy” itatta masapul a birukenda ti nadalus a konsiensia iti Dios. Magun-odanda dayta nadalus a konsiensia babaen iti panangipudnoda kadagiti basbasolda, panagbabawida, panagsublida, nga idedikarda ti bagida ken ni Jehova, ket agpabautisarda iti danum. Kalpasanna masapul a salimetmetanda dayta a takder. Kasapulan ti panagtalinaed ti “dakkel a bunggoy” idiay uneg ti “siudad” agingga a piguratibo a matay ni Jesus maipapan kadagiti annongenna kas nangato a padi, inton panungpalan ti Sangaribo a Tawen a Panagturayna.​—Josue 20:1-9; Apocalipsis 20:4, 5; 1 Corinto 15:22, 25, 26.

17. Ania a naragsak a bunga ti intay ur-urayen itatta?

¹⁷ Anian a nakaskasdaaw ti panangbendision ni Jehova iti ilina nga Israel! Ti dalan ti nakarigrigat, ken nagadu dagiti pakasuotan. Ngem kamaudiananna nakagtengda met laengen iti Naikari a Daga ket nagtaengda sadiay. Anian ti panaglipias dagiti puspusoda iti panagyaman ken ni Jehova! Ket iti panagmatalektayo iti Diostayo, mabalin a maaddaantayo iti umas-asping met a rag-o inton makastrektayo iti baro a sistemana, a ramanennanto ti “baro a daga.” Pudno unay, pudnonto met kadatayo, kas pudno a napasamak idi aldaw ni Josue: “Awan a pulos idi ti nagkurang iti uray ania a naimbag nga insao ni Jehova iti balay ti Israel; isuamin natungpal idi.” (Josue 21:45) Sapay koma ta maaddaankayo met ti naragsak a pannakiraman iti dayta!

18. (a) Aniat’ insalaysay manen ni Josue kadagiti panglakayen ti Israel? (b) Ania a tarigagay ti rebbeng a maadda kadatayo maipapan iti baro a sistema ni Jehova?

¹⁸ Kamaudiananna, iti edad a 110, inummong ni Josue dagiti panglakayen ti Israel. Insalaysayna manen kadakuada dagiti nakaskasdaaw a pamay-an a panangbendision ni Jehova iti matalek nga ilina manipud idi panawen ni Abraham agingga iti dayta nga aldaw. Ita kuna ni Jehova kadakuada: “Ket intedko kadakayo ti daga isu a dika nagbambannogan ken dagiti siudad a dikayo binangon ket agnaedkayo kenkuana. Ken dagiti kaub-ubasan ken kaolibaan a dikayo minulaan isuda a pagkaananyo.” Gapu itoy aglaplapusanan a sagana, pudno unay a tarigagayan koma ti Israel ti ‘agbuteng ken Jehova ket agserbi kenkuana iti kinadalus ken kinapudno’ a maipaay iti agnanayon. Ket bayat ti ikikitatayo iti masanguanan iti nadayag a baro a sistema ni Jehova a maipaay iti daytoy daga, pudno unay a tunggal maysa kadatayo rebbeng a maaddaan met iti kasta a tarigagay.​—Josue 24:13, 14.

19. (a) Ania a panagpili ti impasango ita ni Josue iti ili, ket kasanot’ isusungbatda? (b) Tarigagayantayo koma ti agbalin a kas ti siasino? (c) Ania a panagpili ti rebbeng nga aramidentayo, ken iti ania a pangngeddeng?

¹⁹ Kalpasanna sibabatad nga impasango ni Josue dayta iti umili: “Ket no dakes iti panangipagarupyo iti panagserbi ken ni Jehova, agpilikayo ita nga aldaw no siasino ti pagserbianyonto. . . . NGEM SIAK KEN TI BALAYKO, AGSERBIKAMTO KEN JEHOVA.” Maikallungugan kadi ti tunggal maysa kadatayo dagitoy a sasao, babaen kadagiti manamati a kamkameng ti pamiliatayo, babaen kadagiti kongregasiontayo, babaen iti sangalubongan a sangakabbalayan ti Dios”? Sigurado a mabalinanda! (Efeso 2:19) Dagiti tattao idi kaaldawan ni Josue simmungbatda kenkuana. a kunkunada: “Agserbikamto ken Jehova a Diosmi, ken ipangagminto ti timekna!” (Josue 24:15, 24) Ngem nakalkaldaang, ta kadagiti maud-udi a tawtawen napaayda a nangaramid iti kasta. Ditayo kayat ti agbalin a kas kadagidiay a napaay. Kayattayo ti agbalin a kas ken Josue ken ti sangakabbalayanna, kas ken ni Caleb, kas kadagiti Gabaonitas, kas ken ni Rahab. Wen, “AGSERBITAYTO KEN JEHOVA.” Sapay koma ta aramidentay daytoy a simamaingel ken addaan naan-anay a panagtalek nga awan ti mabalinto a mangisina kadatayo manipud iti ayat ti Dios nga adda ken Kristo Jesus nga Apotayo.”​—Roma 8:39.

Aniat’ Maadaltayo Manipud Libro ni Josue​—

◻ Maipapan iti pannakagunggona kadagiti maulit-ulit a pammagbaga?

◻ Maipapan ti panangtaripato kadagiti moderno a Gabaonitas?

◻ No kasanot’ pannakidangadang ni Jehova inton Armagedon?

◻ Maipapan iti pannakasapul ti panagkamangen iti “siudad ti pagkamangan”?

◻ Maipapan iti panangpili no siasino ti pagserbiantayo?