AZECA
[nagtaud iti sao a kaipapananna ti “agkali” [kayatna a sawen, gabion]].
Maysa a siudad iti rehion ti Sefela, a mangsalsaluad kadagiti gubuayan ti Ginget ti Elah. Naikuna a daytoy a disso isu ti Tell Zakariyeh (Tel ʽAzeqa), agarup 26 km (16 mi) iti amianan a laud ti Hebron.
Ti damo a pannakadakamat ti siudad ket iti Josue 10:5-11 mainaig iti iraraut ti nagtitipon a lima a Canaanita nga ar-ari maibusor iti Gabaon. Ni Josue ken ti buyotna, nga immay tumulong iti Gabaon, kinamatda dagiti Canaanita a buyot “agingga idiay Azeca ken Makkeda,” distansia nga agarup 30 km (19 mi). Kalpasan dayta, ti siudad naituding iti tribu ni Juda.—Jos 15:20, 35.
Bayat ti panagturay ni Ari Saul (1117-1078 K.K.P.), pinagtitipon dagiti Filisteo dagiti puersada iti nagbaetan ti Socoh ken Azeca, ket impasangoda ni Goliat kas kampeonda. Idi dimteng dagiti Israelita, nagsinnango dagiti kampo ti dua a buyot iti agsumbangir a deppaar ti Ginget ti Elah, agingga a nagtataray dagiti Filisteo gapu iti makakellaat a panagballigi ni David maibusor ken Goliat.—1Sm 17:1-53.
Idi nabingay ti nasion kalpasan ti ipapatay ni Solomon (a. 998 K.K.P.), ni Ari Rehoboam ti Juda sinarikedkedanna ti Azeca agraman ti Laquis ken ti dadduma pay a siudad nga estratehiko ti nagsaadanda. (2Cr 11:5-10) Kadagiti naaramid a panagkabakab idiay Tell Zakariyeh, natakuatan dagiti tedda ti padpader ken tortorre ken pammaneknek nga adda idi maysa a nasarikedkedan a salindeg iti kangatuan a paset dayta a lugar.
Idi a dagiti taga Babilonia a buyot ni Nabucodonosor pinarmekda ti pagarian ti Juda (609-607 K.K.P.), ti Azeca ken Laquis ti kaudian a dua a nasarikedkedan a siudad a naparmek sakbay ti pannakaduprak ti mismo a Jerusalem. (Jer 34:6, 7) Naipalgak ti maysa a nalawag a pammatalged iti daytoy babaen kadagiti natakuatan a nakitikitan nga ostracon a naawagan Sursurat ti Laquis. Ti surat numero IV ket naglaon iti sumaganad a mensahe, a nabatad a naggapu iti maysa a kampo ti militar a naiturong iti komandante ti militar idiay Laquis, a kastoy ti dadduma a linaonna: “ur-urayenmi dagiti pagilasinan ti Laquis, maitunos iti amin a pagilasinan nga inted ni apok, ta saanmi a makita ti Azeca.” (Ancient Near Eastern Texts, inurnos ni J. B. Pritchard, 1974, p. 322) No kas pagarigan naaramid daytoy a surat idi tiempo ti iraraut dagiti taga Babilonia, ipasimudaagna a narban ti Azeca ket awanen dagiti pagilasinan a maawat manipud iti dayta a sarikedked.
Kalpasan ti periodo a 70 a tawen a pannakalangalang ti daga, maysa ti Azeca kadagiti siudad a nagyanan manen dagiti nagsubli a destiero a Judio.—Ne 11:25, 30.