MAQUIR

[nagtaud iti sao a kaipapananna ti “ilako”].

1. Ti immuna a nainaganan nga anak ni Manases babaen iti Sirio a kamalalana. Ni Maquir ti nangrugian ti pamilia dagiti Maquirita ken naawagan iti “ama ni Galaad.” Ti asawana ket ni Maaca, ken naaddaan iti annak bayat a sibibiag pay idi ni Jose. (Ge 50:23; Nu 26:29; Jos 17:1; 1Cr 2:21, 23; 7:14-17) “Ti annak ni Maquir” ket kinautibo ti rehion ti Galaad, pinagtalawda dagiti Amoreo, ken naited kadakuada dayta a distrito kas tawid. (Nu 32:39, 40; De 3:15; Jos 13:31) Ni Zelofehad ken dagiti annakna a babbai ket nagtaud iti Manasesita a pamilia ni Maquir. (Nu 27:1; 36:1, 2; Jos 17:3) Iti kanta iti panagballigi, a kinanta da Debora ken Barak, agparang a naaramat ti “Maquir” iti naindaniwan a pamay-an a mangiladawan iti intero a tribu ni Manases.​—Uk 5:1, 14.

2. Anak ni Amiel (ken agtataeng iti Lo-debar) a nakipagnaedan ti anak ni Jonatan a ni Mefiboset agingga idi pinaayaban ni David ken nangaramid iti urnos a maaywanan. (2Sm 9:4-7, 13) Idi agangay, bayat ti panagrebelde ni Absalom, maysa ni Maquir kadagidiay nangipaay iti taraon ken iti dadduma pay nga abasto ken Ari David ken kadagiti kakaduana.​—2Sm 17:27-29.