BET-JESIMOT

[Balay Dagiti Panaglangalang].

Ti kaabagatanan a disso a nakadanonan ti panagpakarso dagiti Israelita bayat a nagpakpakarsoda iti Tantanap ti Moab sakbay ti ibaballasiwda iti Jordan nga agturong iti Canaan. (Nu 33:48, 49) Ti pakarso nasaklawna ti Bet-jesimot agingga iti Abel-sittim, maysa a distansia nga agarup 8 km (5 mi) sigun kadagiti naikuna nga ayan dagitoy a lugar. Iti agdama, ti Bet-jesimot ket maikunkuna nga isu ti Tell el-ʽAzeimeh nga asideg iti makin-amianan a daya a nagsulian ti Natay a Baybay ken 19 km (12 mi) iti abagatan a daya ti Jerico. Kabangibangna ti Khirbet Sweimeh, a pagaammo iti Griego a nagan a Besimoth kas maysa a kolonia ti Roma. Adda met masarakan a maysa a napigsa nga ubbog ti danum iti asidegna. Adda ti Tell el-ʽAzeimeh iti maysa a nangato a daplat a daga a mangtantannawag kadagiti tanap iti baba, ken mangbambantay iti pagruaran ti maysa kadagiti naapres a ginget a sumalog nga agturong iti daya manipud iti bambantay.

Ti Bet-jesimot ket paset ti pagturayan ni Ari Sihon dagiti Amoreo. Kalpasan a naparmek dagiti Israelita dayta a rehion, naituding dayta iti tribu ni Ruben. (Jos 12:1-3; 13:15-21; idiligyo ti Uk 11:13-27.) Idi tiempo ni mammadto Ezequiel, nairaman dayta iti sumagmamano a siudad ti Moab a masarakan iti darisdis ti beddengna ken nadeskribir kas “arkos ti daga.” (Eze 25:8-10) Ipasimudaag ti padto a luktan ni Jehova dagitoy a siudad nga adda iti pagbedngan, iti kasta ti Moab nawaya a rauten dagiti “taga Daya,” wenno “annak ti Daya,” dagiti agakar-akar a tribu nga agnanaed iti Desierto ti Arabia. (Idiligyo ti Uk 6:3, Rbi8 ftn; 8:10.) Mabalin a ti Moab sinakupna ti Bet-jesimot ken ti dadduma pay a siudad ti Ruben sakbay wenno kalpasan ti pannakaidestiero dayta a tribu idiay Asiria.​—1Cr 5:26.