ELIAB

[Ti Diosko ket Ama].

1. Anak ni Helon iti tribu ni Zabulon; maysa kadagiti 12 a panguluen a tinudingan ni Jehova a mangtulong kada Moises ken Aaron iti panangbilang kadagiti annak ti Israel maipaay iti buyot. (Nu 1:1-4, 9, 16) Ni Eliab ti namangulo iti buyot ti tribuna, a paset ti tallo a tribu a benneg ti pakarso ti Juda. (Nu 2:3, 7; 10:14-16) Malaksid iti pannakipasetna iti sangsangkamaysa a panagidiaya dagiti panguluen kalpasan ti pannakaipasdek ti tabernakulo, ti panguluen a ni Eliab indatagna kalpasanna ti bukodna a daton iti maikatlo nga aldaw maipaay iti inagurasion ti altar.​—Nu 7:1-3, 10, 11, 24-29.

2. Anak ni Pallu iti tribu ni Ruben; ama ni Nemuel. Ti dadduma nga annak ni Eliab, da Datan ken Abiram, sinuportaranda ni Kore iti panagrebeldena ken Moises ket naalun-on dagitoy agraman dagiti sangakabbalayanda iti namilagruan a panagnganga ti daga.​—Nu 16:1, 12; 26:8-10; De 11:6.

3. Maysa a Levita iti pamilia dagiti Cohatita ken maysa nga inapo ni Samuel a mammadto. (1Cr 6:22, 27, 28, 33, 34) Ti naganna ket nailanad kas Eliel iti 1 Cronicas 6:34 ken kas Eliu iti 1 Samuel 1:1.

4. Ti inauna ni Jesse nga ama ni Ari David. (1Sm 17:13; 1Cr 2:13) Nagustuan unay ni Samuel ti langa ni Eliab ken ti kangato ti taktakderna, iti kasta impapanna a daytoy ti pili ti Dios maipaay iti kinaari. Ngem ni Jehova linaksidna ni Eliab ket pinilina ni David.​—1Sm 16:6-12.

Da Eliab, Abinadab, ken Sammah, ti tallo a kalakayan nga annak ni Jesse, addada iti buyot ni Saul idi tiempo a ti Filisteo a kampeon a ni Goliat kinaritna dagiti lallaki ti Israel. Sakbay unay nga immasideg manen ni Goliat manipud kadagiti linia ti bakal dagiti Filisteo tapno rurodenna ti Israel, ni David, nga imbaon ni amana, dimteng sadiay nga awitna dagiti abasto a taraon nga agpaay iti tallo a kakabsatna. Gapu iti panagim-imtuod ni David kadagiti mannakigubat nga Israelita maipapan iti gunggona nga awaten ti asinoman a makapapatay ken Goliat, nakaunget iti kasta unay ni Eliab ket binabalawna ni David, nga imparipiripna a naliway ni David iti panangtaming kadagiti rebbengenna kas pastor ket inakusaranna iti kinadursok ken addaan dakes a puso. (Daytoy a salaysay maipapan iti pannakaibaon ni David ken iti unget ni Eliab ket inikkat ti Vatican Manuscript No. 1209.)​—1Sm 17:13, 17, 26-28.

Iti naud-udi pay a tiempo kalpasanna, agparang a ti anak ni David a ni Jerimot inasawana ni Abihail nga anak a babai ni Eliab.​—2Cr 11:18.

5. Maysa kadagiti Gadita a nangisinggalut iti bagbagida ken David bayat a mapengpengdan pay laeng idi gapu ken Ari Saul. Nailadawan dagiti Gadita kas “mamaingel, nabileg a lallaki,” a daydiay kababassitan katupagna ti sangagasut, ket ti kadadakkelan katupagna ti sangaribu.​—1Cr 12:1, 8, 9, 14.

6. Levita a musikero iti maikadua a benneg a timmulong iti musika idi a ti lakasa ni Jehova impayakar ni Ari David idiay Jerusalem manipud balay ni Obed-edom.​—1Cr 15:18, 20, 25; 16:5.