MICMAS, MICHMAS
[Nalemmeng [kayatna a sawen, nalimed] a Lugar].
Ti maikunkuna nga agdama a Mukhmas nga adda iti maysa a turod nga agarup 600 m (2,000 pie) iti ngatuen ti patar ti baybay ken agarup 11 km (7 mi) iti amianan nga amianan-a-daya ti Jerusalem. Adda dayta iti amianan ti Wadi Suweinit (Nahal Mikhmas), a maibilang nga isu ti “baw-ang a bessang ti Micmas.” (1Sm 13:23) Adda dagiti wadi wenno karayan manipud iti abagatan a laud ken amianan a laud a tumipon iti Wadi Suweinit, gapuna mangrugi dayta iti nakabambantay a rehion ti Efraim ken aglayon agingga iti Ginget Jordan.
Iti panagsagana ni Ari Saul a mangwayawaya iti Israel manipud panangituray dagiti Filisteo, nangpili iti 3,000 a lallaki kas paset ti buyotna. Ti 2,000 kadagitoy ket kaduana a nagpakarso idiay Micmas ken iti kabambantayan ti Bethel, ket ti dadduma nagpakarsoda a kadua ti anakna a ni Jonatan idiay Gabaa. Idi agangay, pinarmek ni Jonatan ti “garison” dagiti Filisteo nga adda iti kabangibang a Geba (“Gabaa,” Vg). Tapno makaibales dagiti Filisteo, nangummongda iti dakkel a buyot, a pakairamanan ti karkaruahe ken kumakabalio, ket nalawag a dayta ti makagapu no apay a napilitan nga agsanud ni Saul manipud Micmas sa nagturong idiay Gilgal. Yantangay nagbutengda kadagiti Filisteo, adu nga Israelita ti naglemmeng kadagiti rukib ken kadagiti lungog; ket adda met dagiti nagkamang iti daya ti Jordan. Daytoy a pannakawarawara dagiti mannakigubat nga Israelita iti sanguanan dagiti Filisteo ti indatag ni Saul idi agangay kas rasonna no apay a saannan a nauray ni Samuel a mangidaton iti sakripisio. Ni Samuel tinubngarna ni Saul gapu iti nadursok a tignayna, ket kalpasanna ti ari napan ken Jonatan idiay Geba a kaduana ti bimmassit a buyotna nga agarup 600 a lallaki. (1Sm 13:1-16) Sigun iti 1 Samuel 14:2, nabatad nga inyakar ni Saul ti pakarsona idiay Migron iti asideg ti Gabaa.
Irugi ni Jonatan ti Panangparmek Kadagiti Filisteo. Gapu ta adda tallo a bunggoy dagiti agkamkam a Filisteo ti rumaut manipud pakarsoda idiay Micmas ken maysa a kampo dagiti Filisteo ti rummuar iti “baw-ang a bessang ti Micmas,” inkeddeng ni Jonatan a pagpatinggaen daytoy a panangriribuk. (1Sm 13:16-23) Tapno maaramidna daytoy, binallasiwna ti bessang, a no isu ti Wadi Suweinit, dayta ket maysa a nauneg a baw-ang a kasla rangkis ti agsumbangir a sikiganna iti daya ti Geba (Jabaʽ). Iti pagkurbaan ti Wadi Suweinit, adda dua a napatak a turod nga addaan iti narangkis a batbato a sikigan. Mabalin a dagitoy ti Bozez ken Sene a ‘napasdok a batbato a kasla ngipen,’ a dagiti kasla ngipen nga ikingda ket nalabit napalanasen gapu kadagiti puersa ti nakaparsuaan iti panaglabas ti agarup 30 a siglo. (1Sm 14:1-7) Kasla imposible a makalasat ti maysa a ganggannaet kadagitoy makatikaw a munturod, bakulod, ken natitirad a batbato iti wadi. Ngem nalawag a pagaammo dayta ni Jonatan yantangay dimmakkel iti teritoria dagiti Benjamita. Bayat nga adda idiay Micmas ti pakarso ni amana ken adda met idiay Geba ti bukodna a pakarso, awan duadua nga adu ti gundaway ni Jonatan a mangammo iti aktual a kasasaad dayta a lugar.
Ni Jonatan ken ti agaw-awit iti armasna nagturongda idiay Micmas ket kalpasanna inrantada ti nagparang tapno makita ida dagiti nagkampo a Filisteo. Idi masaripatpatanda ida, impukkaw dagiti Filisteo: “Sumang-atkayo nga umay kadakami, ket ipakaammominto kadakayo ti maysa a banag!” Kalpasan dayta, ni Jonatan agraman ti agaw-awit iti armasna kimmalay-atda babaen laeng iti im-ima ken saksakada iti narangkis a paglasatan nga agturong iti kampo dagiti Filisteo. Ket pinapatayda ti agarup 20 a Filisteo iti uneg ti agarup kagudua ti rukod ti daga a maarado ti sangaparis a toro iti maysa nga aldaw.—1Sm 14:8, 11-14, Rbi8 ftn.
Natikaw ken nakibur ti pakarso dagiti Filisteo gapu iti maysa nga impagteng ti Dios a ginggined, a nadlaw uray dagiti managwanawan ni Saul. Idi nakagteng ni Saul ken dagiti lallakina, adun a Filisteo ti nagpipinnatay gapu iti pannakatikaw ken nagtalawen ti dadduma. Ti buyot ni Saul, a nalabit adda kadakuadan ti ig-igam dagiti Filisteo a nasarakanda iti dayta a disso, kinamatda dagiti agtaltalaw a puersa ti kabusor. Timmipon kadakuada dagiti Israelita a naglemmeng ken dagidiay dimmasig kadagiti Filisteo ket “intultuloyda a kinabil dagiti Filisteo manipud Micmas agingga iti Ajalon.”—1Sm 14:15-23, 31.
Sigun iti 1 Samuel 13:5, ti puersa dagiti Filisteo idiay Micmas ramanenna ti 30,000 a karuahe a pakigubat. Adayo a dakdakkel daytoy a bilang ngem ti bilang dagiti karuahe a pakigubat a naaramat iti dadduma pay a pannakigubat (idiligyo ti Uk 4:13; 2Cr 12:2, 3; 14:9), ket narigat a panunoten no kasano a naaramat iti kabambantayan a lugar ti kasta a kaadu ti karuahe a pakigubat. Gapu itoy, adu ti mangikuna a biddut ti eskriba ti bilang a 30,000. Nailanad ti 3,000 iti Syriac a Peshitta ken iti Lagardian nga edision ti Griego a Septuagint, ket adu a bersion ti Biblia ti nangsurot iti daytoy a pannakaipatarus. (AT, JB, Mo) Nupay kasta, adda pay dagiti naisingasing a nababbaba a bilang.
Sinigsiglo a tawen kalpasanna, ti padto ni Isaias dakamatenna ti Micmas kas lugar a ‘pangidulinan ti manangparmek nga Asirio kadagiti aruatenna.’ (Isa 10:24, 28) Kalpasan ti isusubli dagiti Israelita idi 537 K.K.P. manipud pannakaidestiero idiay Babilonia, nalawag a nagnaed manen idiay Micmas (Michmas) dagiti Benjamita.—Esd 2:1, 2, 27; Ne 7:31; 11:31.