“Masapul nga Agtulnogkami iti Dios kas Agturay Imbes a Kadagiti Tattao.”

“Kukua ni Jehova ti Bakal”

NAGSINNANGO ti dua nga agkabusor a buyot a nagpakarso iti agsinnumbangir a paset ti maysa a tanap. Iti uneg ti 40 nga aldaw, mabutbuteng unay dagiti lallaki ti Israel bayat nga agtultuloy a lalaisen ida ni Goliat, ti maingel a soldado dagiti Filisteo.​—1 Samuel 17:1-4, 16.

Karkariten ni Goliat dagiti Israelita, nga ipukpukkawna: “Mangpilikayo iti maysa a lalaki maipaay kadakayo, ket bay-anyo a sumalog nga umay kaniak. No kabaelanna ti makirupak kaniak ket mapapataynak, agbalinkamto ngarud nga ad-adipen kadakayo. Ngem no siak pumadpadak kenkuana ket mapapatayko, agbalinkayto met nga ad-adipen kadakami, ket agserbikayto kadakami. . . . Siak rurodek dagiti linia ti bakal ti Israel itoy nga aldaw. Ikkandak iti maysa a lalaki, ket agrinnupakkami!”​—1 Samuel 17: 8-10.

Iti nagkauna a tiempo, gagangay ti panagranget dagiti maingel a soldado kas pannakabagi dagiti buyot. Ti buyot nga ayan ti mangabak a soldado ti makinkukua iti balligi. Ngem saan a gagangay a soldado daytoy a mangkarkarit iti Israel. Isu ket maysa a higante​—maysa a narungsot ken nakabutbuteng a kabusor. Ngem gapu ta buyot ti ili ni Jehova ti lalaisenna, sigurado nga isagsagmak ni Goliat ti bagina.

Saan laeng a basta namilitariaan a pasalip daytoy. Dangadang daytoy iti nagbaetan ni Jehova ken dagiti didiosen dagiti Filisteo. Imbes a situtured nga idauluanna ti buyotna maibusor kadagiti kabusor ti Dios, saanen a makagunay ti ari ti Israel a ni Saul gapu iti butengna.​—1 Samuel 17:11.

Agtutubo nga Agtalek ken Jehova

Bayat ti panaguray ni Goliat, maysa nga agtutubo a napulotanen nga agbalin nga ari ti Israel ti simmarungkar kadagiti kakabsatna a karaman iti buyot ni Saul. Dayta nga agtutubo isu ni David. Apaman a nangngegna ti sasao ni Goliat, inyimtuodna: “Siasino daytoy di nakugit a Filisteo tapno rurodenna dagiti linia ti bakal ti sibibiag a Dios?” (1 Samuel 17:26) Para ken ni David, ni Goliat irepresentarna agpadpada dagiti Filisteo ken dagiti didiosenda. Buyogen ti nalinteg a pungtot, ni David, kas pannakabagi ni Jehova ken ti Israel kayatna a sanguen ti pagano a higante. Ngem kuna ni Ari Saul kenkuana: “Saanmo a kabaelan ti mapan a bumusor iti daytoy a Filisteo tapno makirupakka kenkuana, ta maysaka laeng nga ubing.”​—1 Samuel 17:33.

Anian a nagduma ti panangmatmat da Saul ken David! Pampanunoten ni Ari Saul a ni David ket maysa laeng nga ubing a pastor nga aggagar a makiranget iti maysa a nabileg a higante. Nupay kasta, iti panangmatmat ni David, ni Goliat ket maysa laeng a tao a manglalais iti Soberano nga Apo Jehova. Naibatay ti kinatured ni David iti panamatina a saan nga ipalubos ti Dios a di madusa ti asinoman a mangumsi iti nagan ken ilina. Nupay pagpannakkel ni Goliat ti pigsana, agtalek ni David ken Jehova, a matmatmatanna ti kasasaad sigun iti panangmatmat ni Jehova.

‘Umayak Kenka iti Nagan ni Jehova’

Natibker ti nakaibatayan ti pammati ni David. Malagipna ti panangtulong kenkuana ni Jehova a mangispal iti karnerona manipud iti maysa nga oso ken maysa a leon. Masigurado ti agtutubo a pastor a tulongan ita ni Jehova a mangsaranget iti daytoy nabileg a kabusor a Filisteo. (1 Samuel 17:34-37) Babaen laeng ti maysa a pallatibong ken lima a napalanas a batbato, rimmuar ni David tapno makiranget ken ni Goliat.

Sinango ni agtutubo a David daytoy kasla imposible a karit babaen ti bileg ni Jehova. Situtured a kinunana iti Filisteo: “Umayka kaniak nga addaanka iti kampilan ken addaanka iti pika ken addaanka iti gayang, ngem umayak kenka nga addaanak iti nagan ni Jehova ti buybuyot, ti Dios dagiti linia ti bakal ti Israel, a rinurodmo. Iti daytoy nga aldaw isukonakanto ni Jehova iti imak . . . Dagiti tattao iti intero a daga maammuandanto nga adda maysa a Dios nga agpaay iti Israel. Ket isuamin daytoy a kongregasion maammuandanto a saan a babaen ti kampilan wenno uray babaen ti pika a mangisalakan ni Jehova, agsipud ta kukua ni Jehova ti bakal.”​—1 Samuel 17:45-47.

Ania ti resultana? Kuna ti naipaltiing a salaysay: “Ni David, babaen ti maysa a pallatibong ken maysa a bato, napaneknekan a napigpigsa ngem iti Filisteo ket kinabilna ti Filisteo ket pinapatayna; ket awan idi ti kampilan iti ima ni David.” (1 Samuel 17:50) Awan ti iggemna a kampilan, ngem adda kenkuana ti nabileg a suporta ni Jehova a Dios.a

Naalangon la ketdi ti pammati ni David ken ni Jehova iti dayta a panagranget! No kasapulan nga agpilitayo no pagbutngantayo ti tao wenno no agtalektayo iti mangisalakan a pannakabalin ti Dios, nabatad ti pilientayo: ‘Masapul nga agtulnogtayo iti Dios kas agturay imbes a kadagiti tattao.’ (Aramid 5:29) Maysa pay, no matmatantayo dagiti narigat a kasasaad a kas iti panangmatmat ni Jehova a Dios, saannatay a malapunos uray dagiti nakaro a parikut.

[Footnote]

[Kahon/Ladawan iti panid 9]

KASANO KADAKKEL NI GOLIAT?

Kuna ti salaysay iti 1 Samuel 17:4-7 a nasurok nga innem a kasiko​—nasurok a siam a kadapan​—ti katayag ni Goliat. Ti gambang a kabal ni Goliat ipasimudaagna ti kadakkel ken kapigsana. Agdagsen iti 57 a kilo ti kabalna! Ti pangiggaman ti pikana ket kasla troso ken 7 a kilo ti kadagsen ti tadem dayta. Agasenyo, ti kabal ni Goliat ket mabalin a nadagdagsen pay ngem ni David a mismo!