ELIU
[Ti Diosko Isu Daydiay].
1. “Anak ni Baraquel a Buzita manipud iti pamilia ni Ram.” Kas kaputotan ni Buz, nalawag a ni Eliu ket adayo a kabagian ni Abraham. (Job 32:1, 2, 6; Ge 22:20, 21) Sigurado a nagimdeng a naimbag ni Eliu iti intero a debate iti nagbaetan da Job ken dagiti tallo a manangliwliwana kampay idi. Ngem, kas panagraemna iti edadda, saan a nagun-uni agingga a nakapagsaoda aminen. Nupay dagiti agdama-aldaw a kritiko inawaganda iti mannanao ni Eliu, a kunkunada a nakapalpalikaw dagiti bitlana, ti sasao ni Eliu ket saan a kas iti maysa nga awan daydayawna nga agtutubo. Naan-anay a nabigbigna a saan laeng a dagidiay laklakay ti addaan iti sirib, no di ket ti espiritu ti Dios pagbalinenna a pudno a masirib ti maysa a tao. Isu a naan-anay a nagpannuray ni Eliu iti espiritu ti Dios. Ngarud, siuumiso a nailasinna a saan a nabigbig ni Job nga adayo a napatpateg ti pannakaitandudo ni Jehova a Dios ngem iti pannakaitandudo ti asinoman a tao ken arigna imbaga ti tallo a gagayyem ni Job a ti Dios ket nadangkes.—Job 32:2-9, 18.
Di nangidumduma ni Eliu, ta saanna nga impaayan ti asinoman iti pammasablog a titulo wenno awag. Binigbigna nga isu ket kas met laeng ken Job a naaramid iti pitak ket ti Namarsua kenkuana isu ti Mannakabalin-amin. Awan ti panggep ni Eliu a mamagkullayaw ken Job no di ket nagsao kenkuana a kas pudno a gayyem, nga inawaganna ni Job iti naganna, banag a saan a naaramidan ni Elifaz, ni Bildad, wenno ni Zofar.—Job 32:21, 22; 33:1, 6.
Bin-ig a panangitan-ok iti saad ti pudno a Dios ti imbagbaga ni Eliu: Ti Mannakabalin-amin ket nalinteg, a gunggonaanna ti tunggal maysa sigun iti aramidna. Mangukom nga awan panangidumdumana ken pagaammona unay ti dana ti tattao. Mangngeg ti Dios ti ikkis dagiti naparigatan. Isu ket Mannursuro a mamagbalin iti tattao a nasirsirib ngem kadagiti parsua nga animal. Ti laeng di napudno ti saan a denggen ti Dios, isu a ni Eliu pinaregtana ni Job nga aguray Kenkuana. Kanayonanna pay, impasigurado ni Eliu ken Job nga adda kenkuana ti Dios ken saanna a taginayonen a sibibiag ti nadangkes, ngem dagidiay agserserbi Kenkuana “leppasendanto dagiti aldawda iti naimbag.” (Job 36:11) Kalpasanna, naibalakad ken Job nga itan-okna ti aramid ti Dios, ti naindaklan a Manangipaay, a siwawadwad a mangipapaay iti taraon. Impakaammo ni Eliu ken Job ti naindaklan a bambanag nga inaramid ti Dios ken ti kontrolna kadagiti puersa ti nakaparsuaan, a pinaregtana ni Job nga ipakitana a ‘sipapaliiw iti nakaskasdaaw nga ar-aramid ti Dios.’ (Job 37:14) Sidadaeg nga ingngudo ni Eliu ti argumentona, a kunkunana maipapan iti Mannakabalin-amin: “Isu natan-ok iti pannakabalin, ket ti kinahustisia ken kinaruay ti kinalinteg saannanto a tagibassiten. Gapuna agbuteng koma kenkuana dagiti tattao.”—Job 37:23, 24; kap 34-37.
Babaen laeng iti espiritu ti Dios isu a siuumiso a natingiting ni Eliu ti bambanag ken nakaibaga iti sasao a natungpal ken Job idi nagsublin ti kasasaadna: “Ispalenna koma manipud iyuulog iti abut! Nakasarakak iti subbot! Ti lasagna agbalin a nasalsalibukag ngem iti kinaagtutubo; isu agsubli kadagiti aldaw ti kired ti kinaagtutubona.”—Job 33:24, 25.
2. Inapo ni mammadto Samuel; ti anak ni Tohu. (1Sm 1:1) Ni Eliu ket nalawag a naawagan met iti Eliab ken Eliel.—1Cr 6:27, 34.
3. Naipagarup nga isu ti kalakayan a kabsat ni Ari David a ni Eliab; nagbalin a prinsipe iti tribu ti Juda.—1Cr 27:18, 22; idiligyo ti 1Sm 16:6; kitaenyo ti ELIAB Num. 4.
4. Maysa kadagiti pito a pannakaulo ti rinibu a kameng ti Manases, ken pimmanaw a napan kimmappon ken David idiay Siclag.—1Cr 12:20.
5. Maysa a Korita iti pamilia ni Obed-edom nga agay-aywan iti ruangan iti balay ti Dios, nadutokan idi tiempo ti panagturay ni David.—1Cr 26:1, 4, 7, 8.