DOEG

[mabalin a, Maringgoran; Maaliaw].

Edomita a nagserbi kas kangrunaan a pastor ni Ari Saul, maysa nga annongen a panangaywan. (1Sm 21:7; 22:9) Nalawag a ni Doeg ket proselita. Agsipud ta “napagtalinaed iti sanguanan ni Jehova” idiay Nob, nalabit gapu ta nagkari, naibilang a narugit, wenno naipagarup nga adda kukutelna, nasaksian ni Doeg idi a ti Nangato a Padi a ni Ahimelec intedna ken David ti tinapay ti pamarang ken ti kampilan ni Goliat. Idi agangay, imbutaktak ni Doeg dayta a nakitana idiay Nob idi imbaga ni Saul kadagiti adipenna ti pagarupna a panagkukumplotda maibusor kenkuana. Kalpasan ti panangpaayab ni Saul iti nangato a padi kasta met ti dadduma pay a papadi ti Nob ken kalpasan ti panangsaludsodna ken Ahimelec, binilin ni Saul dagiti tumataray a papatayenda dagiti papadi. Idi nagkedkedda, iti panagbilin ni Saul dagus a pinapatay ni Doeg ti dagup a 85 a papadi. Kalpasan daytoy nakadakdakes nga inaramid ni Doeg, intudingna a madadael ti intero a Nob, a ginudasna dagiti amin nga agnanaed iti dayta, ubing ken lakay, kasta met ti dinguen.​—1Sm 22:6-20.

Kas ipaspasimudaag ti superskripsion ti Salmo 52, insurat ni David maipapan ken Doeg: “Dagiti panagrigat ti ganggandaten ta dilam, napatadem a kas iti labaha, agar-aramid buyogen ti panangallilaw. Ad-adda nga inayatmo ti dakes ngem ti naimbag, kinaulbod nga ad-adda ngem ti panagsao iti kinalinteg. Inayatmo ti amin a mangalun-on a sasao, O sika a manangallilaw a dila.”​—Sal 52:2-4.