PULSERAS

Nagsirkulo nga arkos a maikabil iti pungupunguan wenno iti makimbaba a paset ti takiag, a no dadduma naan-anay a nagsirkulo, nupay adda dagiti maungap wenno addaan kawit. Idi un-unana, agpadpada a nagaramat iti pulseras dagiti lallaki ken babbai, no dadduma iti maysa laeng a takiagda, ngem pasaray nga iti dua a takiagda. Dagiti nagkauna a pulseras ket naaramid iti bronse, sarming, landok, pirak, ken balitok ken masansan nga adu ti arkosda, a no dadduma nabunubonan kadagiti saniata.

Nagaramat dagiti Hebreo iti pulseras, ket nabayagen a maus-usar dagita idiay Palestina, a sadiay adu ti nasarakan dagiti arkeologo a pulseras a naaramid iti nagduduma a material, nangnangruna iti bronse. Ti adipen ni Abraham nangted ken Rebecca iti maysa a balitok nga aritos ti agong ken kasta met iti dua a pulseras (Heb., tsemi·dhimʹ) nga agdagsen iti sangapulo a siklo (114 g; 3.7 oz t) a balitok. (Ge 24:22, 30, 47) Karaman ti pulseras kadagiti bambanag a naala kas samsam ti gubat manipud kadagiti Midianita, a maysa dayta kadagiti agkakapateg nga aruaten nga indatag dagiti Israelita iti Dios.​—Nu 31:50.

Babaen ken Ezequiel, dinakamat ti Dios nga ar-arkosanna ti Jerusalem babaen kadagiti pulseras ken dadduma pay a pagarkos. Ngem gapu ta nagdaydayawanna ti kakasta a napipintas nga aruaten ken nagbalangkantis, impadto ni Jehova a dusaenna ti Jerusalem ken maalanto kenkuana dagitoy a banag. (Eze 16:11, 17, 38, 39) Dagiti pulseras (Heb., sheh·rohthʹ) ket karaman iti bambanag a kinuna ni Jehova nga ikkatenna manipud iti natangsit nga “annak a babbai ti Sion.”​—Isa 3:16, 19.

Ti pulseras ti makinngato a takiag (Heb., ʼets·ʽa·dhahʹ) ket inaramat dagiti monarka kas maysa kadagiti pagilasinan ti naarian wenno katan-okan nga autoridadda. Mabalin a kasta ti ipasimudaag ti pulseras nga inaramat ni Ari Saul ti Israel iti takiagna.​—2Sm 1:10; kitaenyo ti ARKOS.