BEROTA, BEROTAI

[Dagiti Bubon].

Iti sirmata ni Ezequiel maipapan iti teritoria a tawid ti Israel, nailanad nga adda ti Berota iti makin-amianan a beddeng iti nagbaetan ti Hamat ken Sibraim. (Eze 47:16) Agparang nga isu met laeng ti Berotai iti 2 Samuel 8:8, maysa a siudad a kukua ni Hadadezer nga ari ti Zoba, a sadiay ti nangalaan ni David iti “nakaad-adu unay a gambang.” Iti pumadpada a rekord iti 1 Cronicas 18:8, naisandi iti dayta ti nagan a Cun. Kadawyan a maikunkuna a ti Berota (wenno Berotai) ket isu ti agdama-aldaw a Britel (Bereitan), agarup 10 km (6 mi) iti abagatan a laud ti Baalbek iti ginget a pagaammo kas Beqaʽ a nagsaad iti nagbaetan ti kabambantayan ti Libano ken ti Anti-Libano.