Dagiti Gabaonitas—Sinapulda ti Talna
TI SIUDAD iti tuktok ti turod nga adda iti ngato ket nailasin kas adda iti lugar a nagtakderan dagiti Gabaonitas, agarup 10 kilometro iti amianan ti Jerusalem.
Nalabit ammoyo a nagbalin a nalatak ti Gabaon di nagbayag kalpasan nga indauluan ni Josue ti Israel agturong idiay Naikari a Daga ken inabakda ti Jerico. Dagiti Cananeo iti Gabaon nabigbigda a dida madaeran ti Israel, a silalawag nga addaan nadiosan a tulong. Aniat’ rebbeng a maaramid? Iti panangipamusposanda iti panangsikap, dagiti Gabaonitas nangipatulodda kadagiti pannakabagi a nagpammarang kas managdaliasat manipud adayo a daga. Nagballigi daytoy a panagregget maipaay iti talna, ta nakitulag ti Israel kadakuada. Idi a naibutaktak ti sikapda, dagiti Gabaonitas nagbalinda a managurnong iti kayo ken managsakdo iti danum.
Saan la ketdi a narurod ti Dios kadagitoy a tattao a nangsurot iti talna. Sinaranayna ti panangisakit ni Josue kadagiti Gabaonitas idi nga isudat’ rinaut ti lima nga ari. Uray la inaramid ni Jehova ti milagro a panangpaatiddugna iti aldaw maigapu iti dayta a gubat.—Josue 9:3-27; 10:1-14.
Nakasarak dagiti managkabakab iti daytoy a buntuon iti maysa a nauneg nga abut, wenno ubbog, a nakali manipud solido a bato. Makaulog dagiti Gabaonitas iti daytoy ket makaalada iti danum manipud silid iti uneg ti daga. Mabalin kadi nga isu daytoy “ti ubbog ti Gabaon” a nadakamat idiay 2 Samuel 2:13? Natakkuatan met dagiti arkeologo dagiti pagidulinan ti arak ken adu nga alikamen iti panagaramid iti arak. Wen, kasla ti Gabaon isu idit’ sentro ti pagaramidan iti arak.
Kabayatan ti kaaldawan ni David ti templo, wenno tabernakulo, ti pudno a Dios ket masarakan ditoy. Napan ni Ari Salomon ditoy tapno agidatag kadagiti daton. Nagparang ni Jehova ken Salomon iti maysa a tagtagainep ket inkarina kenkuana ti “maysa a masirib ken mannakaawat a puso,” kasta met kadagiti kinabaknang. (1 Ar-ari 3:4-14; 2 Cronicas 1:3) Ti artikulo idiay pinanid 12-17 iti daytoy a ruar ipakitana a dagiti saringit dagiti nagnaed ditoy Gabaon ket naisangsangayan ti pribilehioda iti nasion ti Dios iti naud-udi a panawen. Ammoyo kadi no apay?
[Picture Credit Line iti panid 32]
Pictorial Archive (Near Eastern History) Est.