KESO

Iti naindaniwan a pagsasao, piguratibo a deskribiren ni Job no kasano ti pannakabukelna iti aanakan ni inana, a kunkunana iti Naindaklan a Namarsua: “Saan aya nga imbukboknak kas iti mismo a gatas ken kas iti keso tapno pagbalayennak?”​—Job 10:10.

Ti panagaramid iti keso ket naiduma iti panagaramid iti mantekilia; maaramid ti mantekilia babaen ti proseso a panangbatil. Tapno makaaramid iti keso kadagidi kadaanan a tiempo, sidadaras a mapagbalay ti gatas babaen ti kulapot manipud tian ti animal wenno babaen ti tubbog ti sumagmamano a bulong wenno ramramut. Kalpasan a nagbalayen, maikkat ti nadanum a paset, ket makanen dagiti kabbaro a nagbalay.

Nabilin ni David a mangipan iti “sangapulo a kapaset ti gatas” iti panguluen ti 1,000 nga iti sidongna nagserbi ti kakabsatna iti buyot ni Saul. (1Sm 17:17, 18) Ti literal a panangbasa iti orihinal ket “sangapulo nga iwa ti gatas,” a mabalin a kaipapananna ti “sangapulo a keso ti sadiwa a gatas.” Iti Latin a Vulgate mabasa ti “sangapulo a babassit a porma [wenno, suksukog] ti keso.” Bayat ti sibil a gubat nga insungsong ni Absalom, ni David ket pinatulodan ti gagayyemna kadagiti abasto a taraon, a pakairamanan dagiti “nagbalay a gatas ti baka,” ket mabalin met a nalukneng a keso dagitoy.​—2Sm 17:29.