MERAB
[nagtaud iti sao a kaipapananna ti “umadu (wumadwad)”].
Ti inauna kadagiti dua nga annak a babbai ni Ari Saul. (1Sm 14:49) Nabatad nga inkari ni Saul nga iyasawana ti maysa kadakuada iti lalaki a makaparmek ken Goliat (1Sm 17:25), ket mabalin a dayta ti rason no apay nga intukonna ni Merab ken David. Kalpasan ti pananglabanna ken Goliat, ni David ket napaneknekan a nalaing ken naballigi a mannakigubat kadagiti Filisteo, gapu itoy “nagamak kenkuana” ni Saul, idinto ta dagiti umili ti Israel ken Juda inay-ayatda ni David. (1Sm 18:15, 16) Pinaregta ni Saul nga agtultuloy nga agmaingel ni David idi intukonna ni Merab nga agbalin nga asawana, ngem ti pampanunotenna ket, “Saan koma nga agdisso kenkuana ti imak, no di ket agdisso koma kenkuana ti ima dagiti Filisteo,” a mangin-inanama a matay ni David iti bakal. Sipapakumbaba a bimdeng ni David a mangawat iti tukon nga agbalin a manugang ti ari. Nagangayanna, saan a tinungpal ni Saul ti karina, ket ni Merab saan a pulos a nagbalin nga asawa ni David. Kunaen ti salaysay a ti ub-ubing nga anakna a ni Mical ket “nagayat ken David,” a mabalin a mangipasimudaag a saan a nagayat kenkuana ni Merab. Nupay kasta, “naaramid nga idi tiempo ti panangited ken Merab, anak a babai ni Saul, ken David, isu naiteden ken Adriel a Meholatita a kas asawa.”—1Sm 18:17-20.
Nangipasngay ni Merab iti lima nga annak ken Adriel. Nupay kasta, inyawat ni David idi agangay dagitoy nga annak ken ti dua pay a kameng ti sangakabbalayan ni Saul kadagiti Gabaonita, ket pinapatayda amin dagitoy a pito. Naaramid daytoy kas pangabbong iti pananggandat ni Saul a mangtalipupos kadagiti Gabaonita.—2Sm 21:1-10.
Dagiti Annak ni Merab Inaywanan ti Kabsatna. Sigun iti Masoretiko a teksto, dakamaten ti 2 Samuel 21:8 “ti lima nga annak ni Mical nga anak a babai ni Saul nga impasngayna ken Adriel.” Ngem kunaen ti 2 Samuel 6:23 a natay ni Mical nga awanan anak. Kasla inkagumaan ti dadduma nga eskriba a risuten daytoy a parikut, ta ti Mical ket sinukatanda iti nagan a Merab iti 2 Samuel 21:8. Kasla nabatad a kasta ti inaramidda ta iti Griego a Septuagint (Lagardian nga edision) ken iti dua a Hebreo a manuskrito ti mabasa iti daytoy a bersikulo ket “Merab.” Nupay kasta, kastoy ti nabayagen a panangilawlawag iti 2 Samuel 21:8 kas agparang iti gistay amin a dadduma pay a Hebreo a manuskrito:
Ti asawa ni Adriel ket ni Merab a kabsat ni Mical. Nangipasngay kenkuana ni Merab iti lima nga annak a nadakamat iti ngato. Ngem nasapa a natay ni Merab, ket ni Mical a kabsatna, a linaksid ni David ken awanan anak, ti nangaywan, wenno nangpadakkel, kadagiti lima nga ubbing. Isu a nadakamat dagitoy kas annak ni Mical imbes a ni Merab. Maitunos iti daytoy a panangmatmat iti 2 Samuel 21:8, ibaga ti patarus ti Biblia ni Isaac Leeser nga adda “lima nga annak ni Mical nga anak a babai ni Saul, a pinadakkelna maipaay ken Adriel,” ken kunaen ti maysa a nota iti baba: “Yantangay ni Mical ket asawa ni David; ngem dagiti ubbing ket annak ni Merab, ti inauna nga anak a babai ni Saul, a nalabit sinursuruan ti kabsatna.” Kastoy ti mabasa kadagiti Targum: “Ti lima nga annak ni Merab (a pinadakkel ni Mical, anak a babai ni Saul) nga impasngayna.” Ti dadduma pay a makagapu a saanen a dinakamat ti Kasuratan ket mabalin a nainaig iti pamay-an a pannakailanad ti teksto.