Ti Nabaknang ken Masirib nga Ari
Iti panagkunam, maparagsaknaka aya ti kinabaknang? Maragsakanka aya no adda nangted kenka iti dakkel a kantidad ti kuarta? Nalabit maragsakanka. Siguro makapanunotka kadagiti pamay-an a panangbusbos iti dayta.
Pudno, adu a banag ti magatang tapno nanamnam-ay ken naragragsak ti biag. Mabalin met a mausar ti kuarta kas “salaknib” kadagiti di mapakpakadaan a parikut, kas iti sakit ken kinaawan panggedan.—Eclesiastes 7:12.
Ngem ania aya ti nakainaigan ti kuarta iti kinaragsak? Iti panagkunam, ti aya kinaragsak ket bunga ti kinabaknang, kas ipagarup dagiti adu? Nalabit narigat a sungbatan dagitoy a saludsod agsipud ta nalaka a mabilang ti kuarta, idinto ta ti kinaragsak ket saan. Saanmo a makilo ti kinaragsak ken matimbang dayta.
Sa adda dadduma a tattao a kasla naragsakda, idinto ta nakapimpiman dagiti dadduma. Kasta met laeng ti kasasaad dagidiay napanglaw. Kaskasdi, kaaduan a tattao—uray dagidiay nabaknangen—patienda nga ad-adda a mangparagsak kadakuada ti ad-adu a kuarta.
Maysa a tao a nagsurat maipapan kadagita a banag ket ni Ari Solomon iti nagkauna nga Israel. Isut’ maysa kadagiti kabaknangan pay laeng a tao a nagbiag. Mabasam ti nadeskribir a kaadu ti kinabaknangna iti maika-10 a kapitulo ti libro ti Biblia nga Umuna nga Ar-ari. Usigem, kas pagarigan, ti kunaen ti bersikulo 14: “Ti timbeng ti balitok a dimteng ken Solomon iti makatawen innem a gasut innem a pulo ket innem a talento a balitok.” Dayta a bilang ket katupag ti 25 a tonelada a balitok. Ita, dayta a kaadu ti balitok mabalin nga aggatad iti nasurok a $200,000,000, E.U.!
Ngem, saan laeng a nabaknang ni Solomon; pinaraburan pay ti Dios iti kinasirib. Salaysayen ti Biblia: “Ni Ari Solomon atiwenna amin dagiti ar-ari ti daga iti kinabaknang ken kinasirib. Ket ti amin a daga inagawaanda a makita ti saklang ni Solomon, tapno mangngegda ti kinasiribna, nga inkabil ti Dios iti pusona.” (1 Ar-ari 10:23, 24) Magunggonaantay met iti kinasirib ni Solomon, agsipud ta dagiti insuratna ket paset ti rekord ti Biblia. Usigentayo ti nakunana maipapan ti pannakainaig ti kinabaknang iti kinaragsak.
[Picture Credit Line iti panid 3]
Nakopia iti Die Heilige Schrift - Übersetzt von Dr. Joseph Franz von Allioli. Druck und Verlag von Eduard Hallberger, Stuttgart