Mabalin a daytoy apektaranna ti panangmatmatyo kadagiti pasamak iti Biblia. Mabalin a mabasayo ti pannakadutok ti kasuno ni Elias: “Isu . . . nasarakanna ni Eliseo nga anak ni Safat nga adda nga agar-arado nga adda sangapulo ket dua a kasangol dagiti bakana iti sangona.” (1 Ar-ari 19:19) Iti ania a bulan ti pagarupyo a pannakaaramid dayta, ken kasanot’ itsura ti daga? Ket idiay Juan 4:35, kuna ni Jesus: “Dikay kuna aya nga adda pay uppat a bulan ket santo dumteng ti panagani? . . . Itannawagyo dagiti matayo ket matmatanyo dagiti taltalon, ta natangkenandan a maani.” Nupay masinunuo nga imbagana ti tiempo, maawatanyo aya no kaano?

Ni Eliseo makipaspaset iti maysa a dakkel a panagar-arado idi isut’ naawis nga agbalin a mammadto. Daytat’ mabalbalin a mangisaad ti tiempona iti Tishri (Setiembre-Oktubre), idi ti nakaro a pudot ti kalgaw naglabasen. Ti umuna a tudtudo ti mangrugi a mangpalukneng iti daga, a pagbalinenna a posible ti panagaradon, a sarunuen ti panagmula.