ABEL-BET-MAACA, ABEL TI BET-MAACA

[Pagay-ayusan ti Danum ti Balay ni Maaca].

Maysa a nasarikedkedan a siudad iti Neftali nga adda iti makin-amianan a Palestina a nalabit 7 km (4 mi) iti laud nga amianan-a-laud ti Dan, naikuna nga isu ti Tell Abil (Tel Avel Bet Maʽakha). Adda dayta iti nagsayaat a lugar iti dalan nga aggapu iti Hasor nga agpaamianan iti nagsapalan ti ruta a mangrugi iti Damasco iti daya nga agturong iti Tiro iti laud.

Dagiti tattao ni David iti sidong ni Joab linakubda dayta a siudad idi nagkamang sadiay ti rebelde a ni Sheba. Kalpasan dayta, ti maysa a masirib a babai nga agsasao maipaay kadagidiay “mannakikappia ken matalek ti Israel” ket nagpakpakaasi ken Joab a saanna a dadaelen ti Abel, a naawagan “maysa nga ina iti Israel” gapu ta isu dayta ti lugar a pagimtuodan maipaay kadagiti nainsiriban a panangukom sipud pay idi ugma; nalabit kaipapananna met ti maysa a kabesera wenno siudad nga addaan agpampannuray nga il-ili. Kas panangipangag dagiti umili iti balakad daytoy a babai, impalladawda ti ulo ni Sheba iti ruar ti pader, ket naispal ti siudad.​—2Sm 20:14-22.

Ni Asa ti Juda sinugsoganna ti Sirio a ni Ben-hadad I a kabilenna ti Abel-bet-maaca tapno saan a maituloy ni Baasa ti Israel ti panangbangonna iti Rama. (1Ar 15:20; kitaenyo ti RAMA Num. 1.) Ti Abel ti Bet-maaca ket kinautibo ni Tiglat-pileser III ti Asiria bayat ti panagturay ni Peca, ket dagiti agnanaed iti dayta naidestieroda. (2Ar 15:29) Daytoy a siudad a naawagan Abilakka kadagiti Asirio a teksto ket agparang kadagiti kitikit ni Tiglat-pileser III iti listaan dagiti siudad a pinarmekna. Napanaganan met iti Abel-maim (kaipapananna ti “Pagay-ayusan ti Dandanum”) gapu ta addaan kadagiti nadam-eg ken nasayaat-pannakapadanumna a talon. Gapu iti kasasaad dayta, nagbalin a nasayaat a lugar a pagidulinan.​—2Cr 16:4.