NGILAW

[Heb., zevuvʹ, ngilngilaw].

Dua ti payakna nga insekto iti kakikita a Musca nga iti nagrupsa wenno narugit a banag ti kadawyan a pagitloganna. Dagiti babassit a dutdot a nangbungon iti bagi ken saksaka ti ngilaw kasta met dagiti napigket a dutdot iti dapdapan ti tunggal sakana ket napnuan iti bakteria​—minilion ti adda iti maysa a ngilaw iti balay.

“Dagiti natay a ngilaw isuda ti mangpabangsit iti lana ti agar-aramid iti sapsapo, mamagburek,” insurat ti manangummong. Ti panaglungtot dagiti natay a ngilaw ti makagapu a bumunglog ken aglutab ti lana, iti kasta madadael dayta. Iti umasping a pamay-an, ti sangkabassit a kinamaag dadaelenna ti reputasion daydiay pagaammo gapu iti sirib ken dayagna.​—Ec 10:1.

Dinakamat ni Isaias ti panangsultip ni Jehova kadagiti ngilaw iti ungto dagiti kanal ti Nilo ti Egipto ken kadagiti uyokan iti daga ti Asiria tapno agyanda kadagiti naderraas a naapres a ginget, kadagiti lengngan dagiti napasdok a bato, kadagiti kasamekan ti sisiit, ken kadagiti amin a disso ti dandanum ti Juda. Nabatad a piguratibo daytoy, a dagiti ngilaw itakderanda dagiti buyot ti Egipto ket dagiti uyokan itakderanda dagiti buyot dagiti Asirio.​—Isa 7:18, 19.

Ti nagan ti dios a nagdaydayawan dagiti Filisteo idiay Ekron, “ni Baal-zebub,” kaipapananna ti “Makinkukua Kadagiti Ngilaw.” Gapu iti daytoy, napataud ti kapanunotan a dagiti managdaydayaw kenkuana mabalin nga imbilangda isuna kas makabael a mangkontrol kadagitoy nga insekto. Yantangay nainaig ken Baal-zebub ti panangipaay kadagiti pammadles, insingasing ti dadduma a dayta a nagan mabalin nga ipasimudaagna a daytoy a dios nangipaay kadagiti pammadles babaen iti panagtayab wenno panagsayengseng ti maysa a ngilaw.​—2Ar 1:2, 6; kitaenyo ti BAAL-ZEBUB; BINGRAW.