TEL-ASSAR

Maysa a disso a nagnaedan “ti annak ti Eden” a nadakamat a kadua ti Gozan, Haran, ken Rezef​—luglugar iti makin-amianan a Mesopotamia. (2Ar 19:12; Isa 37:12) Impasindayag ni Senaquerib babaen kadagiti mensaherona a ti didios a nagdaydayawan dagiti tattao kadagitoy a disso ket saan a nakabael a nangispal kadakuada manipud iti bileg dagiti inapona. Gapu iti pannakatukoy “ti annak ti Eden,” kaaduanna a ti Tel-assar ket mainanaig iti bassit a pagarian ti Bit-adini iti igid ti Makinngato a Eufrates. Ti Til-Ashuri ket agpada a tinukoy dagiti Asirio a monarka a da Tiglat-pileser III ken Esar-haddon, ngem maipagarup nga adda idi iti asideg ti Elam a beddeng ti Asiria. Gapuna, saan pay laeng nga ammo ti eksakto nga ayan ti Tel-assar.