GEBA
[Turod].
Maysa a siudad ti Benjamin a naited kadagiti Cohatita; maysa kadagiti 13 a siudad ti papadi. (Jos 18:21, 24; 21:17, 19; 1Cr 6:54, 60) Nalawag a ti Geba adda iti igid ti makin-amianan a beddeng ti pagarian ti Juda. Dayta ti nagtaudan ti sasao a “manipud Geba agingga iti Beer-seba.” (2Ar 23:8) Kadawyan a maikunkuna a ti kadaanan a siudad ket isu ti purok ti Jabaʽ, agarup 9 km (5.5 mi) iti amianan nga amianan-a-daya ti nagsaadan ti templo idiay Jerusalem. Maysa a napasdok a ginget ti mamagsina iti daytoy a disso ken ti naisingasing nga ayan ti kadaanan a Micmas. Iti daytoy a ginget, adda dua a turod a napasdok ken nabato ti bakrasda. Nalabit pumadpada dagitoy kadagiti “napasdok a bato a kasla ngipen” a Bozez ken Sene, a ti maysa “sumango iti Micmas,” ti sabali “sumango iti Geba.”—1Sm 14:4, 5.
Ti Geba ket maysa kadagiti siudad a nadakamat iti namilitariaan a kampania ni Ari Saul maibusor kadagiti Filisteo. Nabatad nga iti panagbilin ni amana a Saul, kinabil ni Jonatan ti “garison” dagiti Filisteo idiay Geba. (1Sm 13:3, 4) Kas panagibales, nangummong dagiti Filisteo iti maysa a nabileg a puersa idiay Micmas, ket gapu iti dayta adu nga Israelita ti sibubuteng a naglemmeng, a ti sumagmamano bimmallasiwda pay ketdi iti Jordan. (1Sm 13:5-7) Idi agangay, manipud Geba nagturong ni Jonatan iti kampo dagiti Filisteo, nga awan duadua nga adda iti igid ti “baw-ang a bessang ti Micmas.” Babaen iti im-ima ken saksakana, kinalabkab ni Jonatan ti napasdok a pagdalanan nga agturong iti kampo ket, iti pannakitinnulong ti agaw-awit iti armasna, kinabilna ti agarup 20 a Filisteo.—1Sm 14:6-14; idiligyo ti 1Sm 13:16, 23.
Adu a tawen kalpasanna, ni Asa sinarikedkedanna ti Geba babaen iti batbato ken kaykayo ti Rama. (1Ar 15:22; 2Cr 16:6) Iti maysa a tiempo a saan nga espesipiko a nadakamat iti Biblia, ti sumagmamano nga agnanaed iti Geba naidestieroda idiay Manahat. (1Cr 8:6) Iti panagturong idiay Jerusalem ti buyot ti Asiria nga indauluan ni Senaquerib, nalawag a dimmalanda iti Geba. (Isa 10:24, 28-32) Karaman kadagiti Judio a nagsubli manipud pannakaidestiero idiay Babilonia isu ti ‘annak ti Geba’; ti mismo a siudad napagyanan manen kalpasan ti panagsubli dagiti naidestiero. (Esd 2:1, 26; Ne 7:6, 30; 11:31; 12:29) Kas panangiparipirip iti pannakaitan-ok ti naibangon manen a Jerusalem, dinakamat ni mammadto Zacarias a ti naturod ken nakabambantay a daga nga adda iti nagbaetan ti Geba ken Rimmon agbalin a nababa a kas iti Araba.—Zac 14:10; kitaenyo ti GABAA Num. 2.