RIFAT

Anak ni Gomer ken apoko ni Jafet. (Ge 10:2, 3; 1Cr 1:6) Iti 1 Cronicas 1:6, “Difat” ti naaramat iti Hebreo a Masoretiko a teksto; ngem “Rifat” ti nausar iti Griego a Septuagint, iti Latin a Vulgate, ken iti agarup 30 a Hebreo a manuskrito. Nagduma ti ispeling dagitoy a nagan nalabit gapu ta ti managkopia insuratna ti Hebreo a daʹleth (ד) imbes a ti Hebreo a rehsh (ר), yantangay agkaasping unay ti langa dagitoy a letra.

Ni Rifat ket nailista a karaman kadagidiay nagtaudan ti nadumaduma a nasnasion ken il-ili a nagwaras iti intero a daga kalpasan ti sangalubongan a Layus. (Ge 10:32) Ti kakaisuna a historikal a pannakatukoy ti kapkaputotanna ket ti panangtukoy ni Josephus a nagbiag idi umuna a siglo K.P. Kinunana a naawagan idi iti Rifeano dagiti immuna a nagnaed iti Paflagonia (iti makin-abagatan a deppaar ti Nangisit a Baybay iti makin-amianan a laud nga Asia Menor). Ti dadduma nga eskolar inaigda met ti Rifat iti nagan ti karayan a naawagan Rhebas nga adda idi iti dayta a lugar, idinto ta kunaen ti dadduma a nainaig dayta iti distrito ti Rhebantia iti rehion ti Bosporus, a nalalaud pay. Yantangay limitado ti pannakadakamat ti Rifat iti rekord ti Biblia ken saan a natukoy iti magun-odan a kadaanan a sekular a pakasaritaan, saan a masinunuo no sadino ti ayan dayta a lugar.