HARODITA

[Iti (Kukua ti) Harod].

Maysa nga agtataeng iti Harod wenno maysa a tao nga agnanaed iti asideg ti lugar a naawagan Harod. Daytoy a termino naaramat a tumukoy kada Sammah ken Elica, dua kadagiti nabileg a lallaki ni David. (2Sm 23:8, 25) No ni “Sammah” isu met laeng ni “Sammot,” ngarud ti pannakausar ti “Harorita” iti 1 Cronicas 11:27 posible a panagbiddut ti eskriba maipaay iti “Harodita,” a daytoy a pannakabalbaliw ket nalabit maigapu iti panagkaasping dagiti Hebreo a letra nga “r” (ר) ken “d” (ד).