AMASA
[napaababa a porma ti Amasias].
1. Anak da Jeter (Itra) ken Abigail a kabsat a babai ni David wenno kabsatna laeng iti ama, ken kasinsin da Absalom ken Joab. (2Sm 17:25; 1Cr 2:16, 17) Iti Samuel, naawagan ni Jeter iti Israelita, ket iti Cronicas, naawagan iti Ismaelita, nalabit gapu ta nagnaed iti teritoria dagiti Ismaelita. Patien ti dadduma a ni Amasa isu met laeng ni Amasai, maysa kadagidiay timmipon iti buyot ni David idiay Siclag, ngem saan a sigurado dayta.—1Cr 12:18.
Tawtawen kalpasanna, idi inkeddeng ni Amasa ti kumappon iti panagrebelde ni Absalom maibusor ken David, naisaad a mamangulo iti buyot ni Absalom kas sukat ni Joab. (2Sm 17:25) Naparukma ti iyaalsa, pinapatay ni Joab ti anak ni David a ni Absalom, ket naitukon ken Amasa ti saad ni Joab kas panguluen ti buyot ni David, ta kinuna ni David, isu ti “tulangko ken lasagko.”—2Sm 18:9-15; 19:13.
Bimtak manen ti panagrebelde, iti daytoy a gundaway saan a kayat ni Sheba ti maaddaan iti binglay ken David. (2Sm 20:1, 2) Naikkan ni Amasa iti tallo nga aldaw a mangummong iti maysa a buyot. Idi saan nga immay iti naikeddeng a tiempo, naibaga ken Abisai nga alaenna dagiti adipen ni David ket kamatenda dagiti rebelde. Kimmuyog kadakuada ti kabsat ni Abisai a ni Joab agraman ti buyotna a lallaki tapno kamatenda ni Sheba. Kamaudiananna, idi a ti naladaw a ni Amasa sinabetna ida, ni Joab, a naginkukuna a mangipaay iti nadungngo nga agek, ginammatanna ti barbas ni Amasa babaen iti maysa nga imana ket binurayrayanna ti buksit ni Amasa babaen ti kampilan iti sabali nga imana. (2Sm 20:4-12) Mabalin a maikari daytoy a supapak gapu iti idadasig ni Amasa ken Absalom ngem saan koma a babaen iti ima ni Joab. Gapuna, ni David binilinna ni Solomon a masapul a maibalesan ni Amasa babaen iti ipapatay ni Joab.—1Ar 2:5, 32.
2. Anak ni Hadlai. Idi isubsubli dagiti mannakigubat nga Israelita dagiti inadipenda a kakabsatda kalpasan nga inabakda ti Juda, maysa ni Amasa kadagiti uppat a panguluen a lallaki ti Efraim a nangipangag iti panagpakaasi ni mammadto Oded nga isublida dagiti kautibo. Tinulonganna met dagidiay naggapu iti Juda babaen kadagiti abasto ken pagsakayan a kasapulan iti panagsublida.—2Cr 28:8-15.