CASLUHIM

Maysa nga anak wenno ili a nagtaud ken Mizraim, ti anak ni Ham. Ipakita ti rekord ti Biblia nga isu ti Casluhim a “manipud kenkuana nagwaras dagiti Filisteo.” (Ge 10:6, 13, 14; 1Cr 1:8, 11, 12) Yantangay dakamaten ti dadduma a teksto a dagiti Filisteo naggapuda iti Caftor wenno Creta (Jer 47:4; Am 9:7), kunaen ti dadduma nga eskolar a ti sasao iti ngato ket rebbeng a mayakar kalpasan ti kaudian a nainaganan a kaputotan ni Mizraim, ti Caftorim. Nupay kasta, saan a rebbeng nga ipapan nga agkontra dagitoy a teksto. Ti rekord iti Genesis (kapadpada ti rekord iti Cronicas) ket sigun iti kapuonan. Ti dadduma pay a panangtukoy kadagiti Filisteo kas nagtaud ken Caftor ket nalablabit geograpiko, a mangipasimudaag a naggapuda iti teritoria ti Caftorim idi immakarda.

Ti Casluhim ket saan nga agparang iti dadduma pay a paset ti Biblia ken saan a nairaman iti sekular a pakasaritaan. Malaksid iti panagtaudda ken Mizraim, a ti naganna ket katupag ti Egipto kadagidi tiempo ti Biblia, awan ti impormasion a mangipakita no sadino ti nagyananda.