Agtakderkayo a Siiintek ket Kitaenyo ti Panangisalakan ni Jehova!
“Agsaadkayo, agtakderkayo a siiintek ket kitaenyo ti panangisalakan ni Jehova maigapu kadakayo.”—2 CRONICAS 20:17.
1, 2. Apay a dakdakes ti umad-adani a panangraut ni “Gog [manipud] iti daga ti Magog” ngem iti pangta nga iyeg ti internasional a terorismo?
TI TERORISMO ket ibilang ti dadduma kas panangraut iti sangalubongan a komunidad, uray iti mismo a sibilisasion. Matarusantayo no apay a masapul a pakaseknan ti kasta a pangta. Iti sabali a bangir, adda sabali pay a panangraut a dakdakes ti iyegna ngem tagtagilag-anen wenno di ikankano ti sangalubongan a komunidad. Ania dayta?
2 Isu ti panangraut ni “Gog [manipud] iti daga ti Magog,” a dinakamat ti Biblia iti Ezequiel kapitulo 38. Panaglablabes kadi ti panangikuna a daytoy a panangraut ket nakarkaro ngem iti pangta nga iyeg ti internasional a terorismo? Saan a pulos, gapu ta saan laeng a basta iyaatake daytoy kadagiti gobierno ti tao, no di ket panangraut iti nailangitan a gobierno ti Dios! Nupay kasta, saan a kas iti tattao a nalabit limitado laeng ti balligida kadagiti panangraut iti sistemada, naan-anay a kabaelan ti Namarsua a parmeken ti makadadael a panangraut ni Gog.
Panangraut iti Gobierno ti Dios
3. Ania ti nayawis nga aramiden dagiti agtuturay ditoy lubong sipud idi 1914, ngem ania ti inaramidda?
3 Sipud idi naipasdek ti Pagarian ti Dios idiay langit idi 1914, nangrugin ti susik iti nagbaetan ti agturturayen nga Ari nga insaad ti Dios ken ti dakes a sistema ni Satanas. Iti dayta a tiempo, napakaammuan dagiti natauan nga agtuturay nga agpasakupda iti pinili ti Dios nga Agturay. Ngem nagkedkedda, kas naipadto: “Ti ar-ari ti daga agtakderda ket dagiti met laeng nangato nga opisial naguurnongda a nagmaymaysa maibusor ken Jehova ken maibusor iti daydiay pinulotanna, a kunkunada: ‘Pugsatentayo dagiti pagparautda ket dagiti paggalutda ibellengtayo iti adayo kadatayo!’” (Salmo 2:1-3) Nalawag a dumtengto ti kangitingitan ti ibubusor iti turay ti Pagarian kabayatan ti panangraut ni Gog iti Magog.
4, 5. Kasano a makirupak dagiti tattao iti di makita, nailangitan a gobierno ti Dios?
4 Mabalin nga agsiddaawtayo no kasano a makirupak dagiti tattao iti maysa a di makita, nailangitan a gobierno. Sigun iti Biblia, daytoy a gobierno ket buklen ti “sangagasut uppat a pulo ket uppat a ribu, a nagatang manipud iti daga,” agraman “ti Kordero,” ni Kristo Jesus. (Apocalipsis 14:1, 3; Juan 1:29) Gapu ta nailangitan, natukoy ti baro a gobierno kas “baro a langlangit,” isu a lohikal a maawagan dagiti iturayanna ditoy daga kas “baro a daga.” (Isaias 65:17; 2 Pedro 3:13) Simamatalek a naturposen ti naindagaan a biag ti kaaduan kadagiti 144,000 a makipagturay ken Kristo. Napaneknekanda ngarud a maikarida nga umawat kadagiti baro nga akem ti panagserbi idiay langit.
5 Nupay kasta, sibibiag pay ditoy daga ti bassit a natda iti 144,000. Kadagiti nasurok a 15,000,000 a timmabuno iti panangrambak iti Pangrabii ti Apo idi 2002, adda laeng 8,760 a nangyebkas iti namnamada kas napili agpaay iti daytoy nailangitan nga akem. Kinapudnona, bumusbusor iti Pagarian ti Dios ti asinoman a manggandat a mangraut kadagiti natda a kameng ti Pagarian.—Apocalipsis 12:17.
An-anayen ti Ari ti Panagballigina
6. Ania ti panangmatmat da Jehova ken Kristo kadagiti bumusbusor kadagiti adipen ti Dios?
6 Naipakpakauna no ania ti aramiden ni Jehova kadagiti bumusbusor iti naipasdek a Pagarianna: “Daydiay mismo a situtugaw iti langlangit agkatawanto; ni met laeng Jehova aramidennanto ida a mauy-uyaw. Iti dayta a tiempo isu agsaonto kadakuada iti ungetna ket iti nabara a rurodna riribukennanto ida, a kunkunana: ‘Siak, mismo a siak, insaadko ti arik iti rabaw ti Sion, ti nasantuan a bantayko.’” (Salmo 2:4-6) Dimtengen ti oras ni Kristo, iti sidong ti panangiwanwan ni Jehova, “tapno an-anayenna ti panagballigina.” (Apocalipsis 6:2) Kasano a matmatan ni Jehova dagiti bumusor iti ilina kabayatan ti kangitingitan ti panagballigina? Matmatanna ida kas bumusbusor kenkuana ken iti insaadna nga agturturay nga Ari. “Ti mangsagid kadakayo sagidenna ti bukel ti matak,” kuna ni Jehova. (Zacarias 2:8) Inyunay-unay met ni Jesus nga aniaman nga aramiden wenno di aramiden dagiti tattao kadagiti napulotan a kakabsatna, kas da met la inaramid wenno di inaramid kenkuana.—Mateo 25:40, 45.
7. Kadagiti ania a rason a ti “dakkel a bunggoy,” a nadakamat iti Apocalipsis 7:9, mairamanda iti pungtot ni Gog?
7 Siempre, mairaman met iti pungtot ni Gog dagidiay sireregta a mangsupsuporta kadagiti napulotan a natda. Maysa a “dakkel a bunggoy” dagiti agbalinto a kameng ti “baro a daga” ti Dios a naayaban “manipud kadagiti amin a nasion ken kadagiti tribu ken kadagiti ili ken kadagiti pagsasao.” (Apocalipsis 7:9) Nailadawanda kas ‘sitatakder iti sanguanan ti trono ken iti sanguanan ti Kordero, a sikakawesda kadagiti puraw a pagan-anay.’ Addaanda ngarud iti naanamongan a takder iti imatang ti Dios ken ni Kristo Jesus. “Adda sangsanga ti palma kadagiti imada,” nga itantan-okda ni Jehova kas ti nainkalintegan a Soberano iti uniberso, a naiparangarang ti kinasoberanona babaen ti panagturay ti insaadna nga Ari, ni Jesu-Kristo, “ti Kordero ti Dios.”—Juan 1:29, 36.
8. Ania ti aramiden ni Kristo gapu iti iraraut ni Gog, ket ania ti resultana?
8 Gapu iti iraraut ni Gog, agtignay ti insaad ti Dios nga Ari tapno makigubat iti bakal ti Armagedon. (Apocalipsis 16:14, 16) Agsagaba iti pannakadadael dagidiay saan a nangbigbig iti kinasoberano ni Jehova. Iti sabali a bangir, permanente a mabang-aran dagidiay nangibtur iti rigat gapu iti kinasungdoda iti Pagarian ti Dios. Maipapan iti dayta, insurat ni apostol Pablo: “Daytoy ket pammaneknek iti nalinteg a panangukom ti Dios, a mangiturturong iti pannakaibilangyo a maikari iti pagarian ti Dios, a maigapu iti dayta pudno unay nga agsagsagabakayo. Daytoy ibilangna a nalinteg iti biang ti Dios ti panangisupapak iti rigat kadagidiay mangparigat kadakayo, ngem, kadakayo nga agsagaba iti rigat, gin-awa a mairaman kadakami iti pannakaipanayag ni Apo Jesus manipud langit a kadua dagiti mannakabalin nga anghelna iti dumardarang nga apuy, bayat nga iyegna ti pammales kadagidiay saan a makaammo iti Dios ken kadagidiay saan nga agtulnog iti naimbag a damag maipapan ken Apotayo a Jesus.”—2 Tesalonica 1:5-8.
9, 10. (a) Kasano a pinagballigi ni Jehova ti Juda nupay nabileg ti kabusor? (b) Ania ti masapul nga itultuloy nga aramiden dagiti Kristiano ita?
9 Kabayatan ti umad-adani a dakkel a rigat, nga agngudo inton Armagedon, makibakal ni Kristo iti amin a kinadakes. Ngem saanen a kasapulan a makirupak dagiti pasurotna, no kasano a saan idi a masapul a makirupak dagiti agnanaed iti dua a tribu a pagarian ti Juda rinibu a tawenen ti napalabas. Kukua ni Jehova daydi a gubat, ket intedna ti balligi. Kuna ti rekord: “Nangikabil ni Jehova kadagiti lallaki nga agsaneb maibusor iti annak ti Ammon, Moab ken ti nakabambantay a rehion ti Seir isuda nga um-umay idi iti Juda, ket kinabilda ti maysa ken maysa. Ket timmakder ti annak ti Ammon ken Moab maibusor kadagiti agnanaed iti nakabambantay a rehion ti Seir tapno ipaay ida iti pannakadadael ken talipuposen ida; ket apaman a nalpasda kadagiti agnanaed iti Seir, tinulonganda ti tunggal maysa a mangdadael iti bukodna a kadua. Ngem no maipapan iti Juda, dimteng agingga iti pagwanawanan ti let-ang. Idi timmaliawda a sumango iti bunggoy, ay ket, sadiay addada idi, dagiti bangkayda napasag iti daga nga awan asinoman a nakatalaw.”—2 Cronicas 20:22-24.
10 Kasta ti eksakto nga impadto ni Jehova: “Saanyonto a kasapulan ti makirupak.” (2 Cronicas 20:17) Dayta nga ulidan ti tuladen dagiti Kristiano inton agtignay ni Jesu-Kristo tapno “an-anayenna ti panagballigina.” Kabayatanna, agtultuloy ti pannakirupakda iti kinadakes, saan a babaen dagiti literal nga igam, no di ket babaen dagiti naespirituan nga igam. Iti kasta, ‘itultuloyda a parmeken ti dakes babaen ti naimbag.’—Roma 6:13; 12:17-21; 13:12; 2 Corinto 10:3-5.
Siasino ti Mangidaulo iti Iraraut ni Gog?
11. (a) Aniada nga ahensia ti usaren ni Gog a mangibanag iti irarautna? (b) Ania ti ramanen ti panagbalin a nasalukag iti naespirituan?
11 Ni Gog iti Magog isu ni Satanas a Diablo iti naipababa a saadna sipud idi 1914. Kas maysa nga espiritu a parsua, dina maibanag a direkta ti panangrautna, ngem usarenna dagiti natauan nga ahensia a mangibanag iti panggepna. Siasino dagitoy a natauan nga ahensia? Saan a detalyado ti ibaga kadatayo ti Biblia, ngem mangipaay iti sumagmamano a pagilasinan a tumulong kadatayo a mangbigbig no siasinoda. Bayat a matungtungpal dagiti padto ti Biblia babaen dagiti pasamak ditoy lubong, ad-adda a maawatantayo nga in-inut dagiti bambanag. Liklikan ti ili ni Jehova nga agpattapatta ngem agtalinaedda a sisasalukag iti naespirituan, a naan-anay a maawatanda dagiti napolitikaan ken narelihiosuan a pasamak a kaitungpalan dagiti padto iti Biblia.
12, 13. Kasano nga impadto ni propeta Daniel ti maudi a panangraut iti ili ti Dios?
12 Iti suratna, nangipalgak ni propeta Daniel kadagiti kanayonan nga impormasion maipapan iti maudi a panangraut kadagiti adipen ti Dios: “Sigurado a rummuarto [ti ari ti amianan] nga addaan iti dakkel a pungtot tapno mangtalipupos ken tapno ipaayna ti adu iti pannakadadael. Ket ipasdeknanto dagiti pimmalasio a toldana iti nagbaetan ti naindaklan a baybay ken ti nasantuan a bantay ti Arkos.”—Daniel 11:44, 45.
13 Iti konteksto ti Biblia, “ti naindaklan a baybay” isu ti Dakkel a Baybay, wenno ti Mediteraneo, ket “ti nasantuan a bantay” isu ti Sion, ti tuktukoyen ni Jehova idi kinunana: “Siak, mismo a siak, insaadko ti arik iti rabaw ti Sion, ti nasantuan a bantayko.” (Salmo 2:6; Josue 1:4) Gapuna, iti naespirituan nga anag, ti daga “iti nagbaetan ti naindaklan a baybay ken ti nasantuan a bantay” irepresentarna ti narang-ay a naespirituan a kasasaad dagiti napulotan a Kristiano. Pinanawandan ti baybay ti sangatauan a naisina iti Dios, ket mangnamnamada a makipagturayda ken Kristo Jesus iti nailangitan a Pagarian. Nalawag a dagiti napulotan nga adipen ti Dios, agraman dagiti nasungdo a kakaduada a dakkel a bunggoy, ti agbalinto a puntiria ti ari ti amianan inton iyussuatna ti mangdadael a panangrautna kas kaitungpalan ti padto ni Daniel.—Isaias 57:20; Hebreo 12:22; Apocalipsis 14:1.
Anianto ti Aramiden Dagiti Adipen ti Dios?
14. Ania ti tallo a banag nga aramiden ti ili ti Dios inton marautda?
14 Ania ti manamnama nga aramiden dagiti adipen ti Dios apaman a marautda? Agserbi a padron ti inaramid ti ili ti Dios idi kaaldawan ni Jehosafat. Imutektekanyo ta adda tallo a naibilin nga aramiden idi dagiti umili: (1) agsaadda, (2) agtakderda a siiintek, ken (3) kitaenda ti panangisalakan ni Jehova. Ania ti aramiden ita ti ili ti Dios maitunos kadagita a sasao?—2 Cronicas 20:17.
15. Para iti ili ni Jehova, ania ti kayatna a sawen ti agsaadda?
15 Agsaadda: Imbes a kumapuy, agtultuloy ti ili ti Dios nga aktibo a mangsuporta iti Pagarian ti Dios. Itultuloyda a salimetmetan ti neutral a takderda kas Kristiano. Agbalinda a “natibker, di magaraw” iti nasungdo a panagserbida ken ni Jehova ken agtultuloy ti publiko a panangidaydayawda kenkuana gapu iti naayat a kinamanangngaasina. (1 Corinto 15:58; Salmo 118:28, 29) Awan ti agdama wenno masanguanan a suot a mamagbaw-ing kadakuada iti daytoy naanamongan a takderda iti Dios.
16. Iti ania a pamay-an nga agtakder a siiintek dagiti adipen ni Jehova?
16 Agtakderda a siiintek: Saan a padasen dagiti adipen ni Jehova nga isalakan ti bagbagida no di ket naan-anay nga agtalekda ken ni Jehova. Isuna laeng ti makabael a mangalaw kadagiti adipenna manipud iti nariribuk a lubong, ken inkarina a kasta ti aramidenna. (Isaias 43:10, 11; 54:15; Un-unnoy 3:26) Ti panagtalek ken ni Jehova iramanna ti panagtalek iti moderno a makitkita a kalasugan a nabatad nga us-usarenna iti dinekdekadan maipaay kadagiti panggepna. Ad-addanto a kasapulan dagiti pudno a Kristiano ti agtalek kadagiti padada nga agdaydayaw nga inautorisaran ni Jehova ken ti insaadna nga agturturay nga Ari tapno mangidaulo. Iturong dagitoy a matalek a lallaki ti ili ti Dios. Mabalin nga agbanag iti didigra ti panangyaleng-aleng iti panangiwanwanda.—Mateo 24:45-47; Hebreo 13:7, 17.
17. Apay a makitanto dagiti matalek nga adipen ti Dios ti panangisalakan ni Jehova?
17 Kitaenda ti panangisalakan ni Jehova: Pannakaisalakan ti gunggona dagiti amin nga agtalinaed a nasungdo kas Kristiano ken agtalek ken ni Jehova agpaay iti pannakaispal. Agingga iti maudi a gundaway—ken agingga iti kabaelanda—ipakaammoda ti iyaay ti aldaw ti panangukom ni Jehova. Masapul a maammuan ti amin a sangaparsuaan a ni Jehova ti pudno a Dios ken addada matalek nga adipenna ditoy daga. Dinto pulos mauliten ti maysa a napaut a kontrobersia maipapan iti kinanainkalintegan ti kinasoberano ni Jehova.—Ezequiel 33:33; 36:23.
18, 19. (a) Kasano a ti kanta ti panagballigi iti Exodo kapitulo 15 iyanninawna ti rikna dagidiay makalasat iti iraraut ni Gog? (b) Ania ti maiparbeng nga aramiden ita ti ili ti Dios?
18 Buyogen ti napabaro a bileg, sumrekto ti ili ti Dios iti baro a lubong, a sigagagarda a mangkansion iti maysa a kanta ti panagballigi, kas inaramid dagiti nagkauna nga Israelita kalpasan ti pannakaispalda idiay Nalabaga a Baybay. Gapu ta agnanayon nga agyamanda iti salaknib nga impaay ni Jehova, kas indibidual man wenno kas maysa a grupo, iyikkisdanto ti sasao idi un-unana: “Bay-anyo a kantaak ni Jehova, ta nagbalin a natan-ok unay. . . . Ni Jehova ket malalaki a mannakigubat. Jehova ti naganna. . . . Ti makannawan nga imam, O Jehova, mabalinna a buraken ti kabusor. Ket iti kinaruay ti kinatan-okmo mabalinmo a rebbaen dagidiay tumakder a bumusor kenka; ibaonmo ti sumsumged nga ungetmo, ibusenna ida a kasla punget. . . . Sika iti naayat a kinamanangngaasim indalanmo ti ili a binawim; sika iti pigsam sigurado nga iturongmonto ida iti nasantuan a disso a pagyanam. . . . Ipanmonto ida ken imulamto ida iti bantay ti tawidmo, maysa a naipasdek a disso nga insaganam tapno pagnaedam, O Jehova, maysa a santuario, O Jehova, nga impasdek dagita imam. Ni Jehova agturayto kas ari agingga iti tiempo a di nakedngan, iti mismo nga agnanayon.”—Exodo 15:1-19.
19 Ita ta ad-adda a nalawlawag ti namnama a biag nga agnanayon, anian a gundaway dagiti adipen ti Dios a mangiparangarang iti debosionda ken ni Jehova ken pabaruenda ti determinasionda nga agserbi kenkuana kas ti agnanayon nga Arida!—1 Cronicas 29:11-13.
Mailawlawagyo Kadi?
• Apay a dagiti napulotan ken ti sabsabali a karnero ti puntiria ti iraraut ni Gog?
• Kasano nga agsaad ti ili ti Dios?
• Ania ti kaipapanan ti agtakder a siiintek?
• Kasano a makitanto ti ili ti Dios ti panangisalakan ni Jehova?
[Ladawan iti panid 18]
Pinagballigi ni Jehova da Jehosafat ken ti ilina, a dida kasapulanen idi ti makirupak
[Ladawan iti panid 20]
Dagiti napulotan ken ti sabsabali a karnero agpadpada nga itandudoda ti kinasoberano ni Jehova
[Ladawan iti panid 22]
Kas kadagiti nagkauna nga Israelita, agkansionto ti ili ti Dios iti maysa a kanta ti panagballigi