Ania a Kita ti Naganyo?

ITI Biblia, ti sao a “nagan” tukoyenna no dadduma ti reputasion. Kas pagarigan, insurat ni masirib nga Ari Solomon: “Ti naimbag a nagan napatpateg ngem iti nangina a lana; ket ti aldaw ti patay, ngem ti aldaw ti pannakayanak.” (Eclesiastes 7:1; idiligyo ti Proverbio 22:1.) Sigun iti sasao ni Solomon, saan a mayanak ti tao nga addaan iti naimbag a nagan. Imbes ketdi, kabayatan ti panagbiagna magun-odna ti reputasion nga addaan pudpudno a kayulogan. Ti naganna ti mangipakaammo no ania dagiti personal a kababalinna, no isu ket naparabur wenno agimbubukodan, naasi wenno saan a mannakipagrikna, napakumbaba wenno natangsit, nalinteg wenno nadangkes pay ketdi.

Amirisenyo ni David. Bayat ti panagarina, pinaneknekanna nga isu ket napigsa ken di maisin. Maigiddato iti dayta, sipapakumbaba a binigbig ni David dagiti kamalina ket nagbabawyanna dagiti nadagsen a basolna. Maikanatad ngarud, a ti mammadto ni Jehova impasimudaagna a ni David “maysa a lalaki a mayannurot iti puso [ti Dios].” (1 Samuel 13:14) Ni agtutubo a David addaan idi iti naimbag a nagan iti Dios.

No idilig, ni Jehoram nga ari ti Juda nakaaramid ti dakes a nagan para kenkuana. Inyadayona dagiti inturayanna manipud panagdayaw ken Jehova ket impapatayna ti innem a kakabsatna a lallaki ken dadduma a prinsipe ti Juda. Idi agangay, sinaplit ni Jehova ni Jehoram iti naut-ot a sakit nga isut’ impatayna. Kunaen ti Biblia a ni Jehoram “simmina a saanda nga impatpateg,” wenno kas panangipatarus ti Today’s English Version, “awan limdaang iti ipapatayna.”​—2 Cronicas 21:20.

Ti kabibiag da David ken Jehoram inyilustrarna ti kinapudno ti proverbio ti Biblia a: “Ti pakalaglagipan ti nalinteg nagasat, ngem ti nagan ti nadangkes aglungsotto.” (Proverbio 10:7) Siseserioso koma ngarud nga amirisen ti tunggal maysa kadatayo ti saludsod nga, ‘Ania a kita ti nagan ti ar-aramidek iti saklang ti Dios ken iti padak a tao?’