BARAQUIAS
[Nangbendision ni Jehova].
Ama ti Zacarias a napapatay iti “nagbaetan ti santuario ken ti altar.”—Mt 23:35; Lu 11:50, 51.
No maipapan iti sasao nga “anak ni Baraquias,” saan a masarakan iti salaysay ni Lucas, ken naikkatda iti salaysay ni Mateo iti Codex Sinaiticus (orihinal nga eskriba). Naikuna a mabalin a dua ti nagan ni Jehoiada, ti ama ti maysa a Zacarias a napapatay, kas iti dadduma a tattao iti Biblia.—Idiligyo ti Mt 9:9 ken Mr 2:14; Mt 10:2, 3.
Maawatan ti kaaduan a tuktukoyen ni Jesus ditoy ni Zacarias “nga anak ni Jehoiada a padi.” (2Cr 24:20-22) Daytoy ti lohikal unay a konklusion, yantangay ti Cronicas ket kaudian a nailista iti nabayagen a kanon dagiti Judio, a dayta ti mamagbalin ken Abel kas kaunaan a nalinteg a tao a nairekord iti Hebreo a Kasuratan a napapatay ket ni Zacarias ti kaudian. Sigun iti 2 Cronicas 24:21, napapatay ni Zacarias “idiay paraangan ti balay ni Jehova.” Ti altar ti daton a mapuoran ket adda idi iti makin-uneg a paraangan, iti ruar ti santuario ken iti sanguanan ti pagserkan ti santuario. Tumunos daytoy iti dinakamat ni Jesus a lugar a nakapasamakan dayta nga isu ti “nagbaetan ti santuario ken ti altar.”
Agpadpada a naipadto ti pannakaisingir ti naiparukpok a dara da Abel ken Zacarias. (Ge 4:10; 2Cr 24:22) Kasta met, adda dakkel a pagpadaan dagiti kasasaad ken pasamak idi kaaldawan ni Zacarias nga anak ni Jehoiada ken dagiti kasasaad ken pasamak iti kaputotan nga agbibiag idi sinao ni Jesus dagitoy a sasao. Kinuna ni Zacarias idi matmatayen: “Kitaen koma ni Jehova dayta ket singirenna dayta.” Saan a nagbayag nangrugin a matungpal ti naimpadtuan a sasaona. Simmang-at ti maysa a bassit a puersa dagiti Sirio, ket inyawat ni Jehova iti imada ti dakkel a puersa militar ti Juda, a kasta unay ti pannakadadael ken pannakasamsam dagiti prinsipe ti Juda. Impakat dagiti Sirio ti ar-aramid ti panangukom ken Jehoas ket pinanawanda nga addaan adu a sagubanit, kalpasanna isu pinapatay dagiti adipenna. (2Cr 24:23-25) Kalpasan ti panangiladawanna iti panagbasol ti dara dagidiay kasasaona, kinuna ni Jesus: “Amin dagitoy a banag umaydanto itoy a kaputotan.” (Mt 23:36) Ti padto ni Jesus ket natungpal iti Jerusalem ken Juda idi 70-73 K.P.