Maseknan Kadi Kadatayo ti Dios?

MADAGDAGSENANKAYO kadi gapu kadagiti parikut iti pamiliayo, salun-at, trabaho, wenno dadduma pay a nadagsen a responsabilidad? Adu ti makapaspasar iti kasta. Ken siasino ita ti saan nga apektado iti kinaawan hustisia, krimen, ken kinaranggas? Pudno unay ti kuna ti Biblia: “Ammotayo a ti intero a sangaparsuaan agtultuloy nga agas-asug a sangsangkamaysa ken agpapaut-ot a sangsangkamaysa agingga ita.” (Roma 8:22) Di pagsiddaawan nga adu a tattao ti mangyimtuod: ‘Maseknan kadi ti Dios? Tulongannatayo ngata?’

Ni masirib nga Ari Solomon inkararagna iti Dios: “Ta sika laeng ti makaammo unay iti puso ti annak ti sangatauan.” Nagtalek ni Solomon a ti Dios saanna laeng nga ammo ti maipapan kadatayo no di ket maseknan kadatayo kas indibidual. Kiniddawna a ti Dios ‘dumngeg manipud langlangit’ ket sungbatanna ti kararag ti tunggal managbuteng-Dios nga indibidual a mangipakaammo iti Dios “ti bukodna a saplit ken ti bukodna a rigat.”​—2 Cronicas 6:29, 30.

Kadagitoy a panawen, ni Jehova a Dios maseknan met kadatayo ken aw-awisennatayo nga umararaw kenkuana. (Salmo 50:15) Ikarina a sungbatanna dagiti naimpusuan a kararag a maitunos iti pagayatanna. (Salmo 55:16, 22; Lucas 11:5-13; 2 Corinto 4:7) Wen, dumngeg ni Jehova iti “uray ania a kararag, uray ania a panagkiddaw iti parabur ti maaramid iti biang ti asinoman a tao wenno ti intero nga ili[na].” Gapuna, no agtalektayo iti Dios, no ikararagtayo a tulongannatayo, ken no umadanitayo kenkuana, matagiragsaktayo ti naayat a panangaywan ken panangiwanwanna. (Proverbio 3:5, 6) Ipanamnama kadatayo ti mannurat ti Biblia a ni Santiago: “Umadanikayo iti Dios, ket isu umadaninto kadakayo.”​—Santiago 4:8.