Agimtuod Dagiti Agtutubo . . .

Kasano a Makalapsutak iti Doble a Panagbiag?

“Diak inkankano amin nga ibagbaga dagiti dadakkelko,” ipudno ni Ann.a “Nagrebelde ken nagulbodak kadakuada. Ibagak a mapanak makitienda, ngem ti kinaagpaysuanna, makisinnarakak iti maysa a lalaki.”

DOBLE ti panagbiag ni Ann, ket idi agangay saan laeng a dagiti nagannakna ti dinan inkankano no di ket uray ti nasanay-Biblia a konsiensiana. Ngamin, ilimlimed gayam ni Ann ti pannakidennana iti nobiona. Malagipna: “Pinadasko a lipatan nga unabes ni Jehova.” Nupay kasta, kapilitan a binigbigna ti kinapudno nga ‘aniaman nga imula ti maysa a tao, daytoy met laeng ti apitennanto.’ (Galacia 6:7) Nagsikog ni Ann. “Dungdungnguek unay ti anakko,” kunana, “ngem didak koma tultuladen. Di naikasar. Agmaymaysa.”

Naigamerkay met kadi iti doble a panagbiag​—nga ilimlimedyo ti pudno a kinataoyo kadagiti nagannakyo ken padayo a Kristiano? Nalabit makibarbarkadakayo kadagiti gagayyemyo idiay eskuelaan nga ammoyo a di magustuan dagiti nagannakyo. Wenno nalabit makiramramankayon iti nalulok nga aramid, kas ti panagsigarilio, panagbartek, wenno pannakiabig. Aniaman ti ar-aramidenyo, kas ken Ann, dumtengto ti tiempo nga apitenyo ti dakes nga ibunga dagiti aramidyo.b

Nupay kasta, daytoy a kinapudno kaskasdi a dina matignay dagiti dadduma nga agtutubo tapno umikay iti rebelioso a daldalanda. Kasda la ti maysa a lalaki a mingmingminganna ti bagina iti sarming ket “dagus a malipatanna no ania ti kitana a tao.” (Santiago 1:23, 24) Manginanamakami a saankay a kasta. Nalabit rinugianyon nga inutob ti bagiyo​—ket diyo kayat ti natakuatanyo. Kayatyo ti agbalbaliw. Naamirisyo a masapul nga agbalbaliwkayo. Ti saludsod ket, kasano nga agbalbaliwkayo?

Panagbabawi​—Ti Umuna nga Addang

Umuna, masapul a mangaramidkayo iti natibker a pangngeddeng nga agbalbaliw. Iyunay-unay ti Aramid 3:19: “Agbabawikayo, ngarud, ket agbaw-ingkayo tapno mapunas dagiti basolyo, tapno dagiti panawen ti pannakabang-ar umayda manipud iti persona ni Jehova.” Ti panagbabawi, nupay kasta, ket saan laeng nga iti panunot. Ti panagbabawi kaipapananna ti “pannakarikna iti panagbabawi, wenno panagbaw-ing iti aniaman a naaramidan.” Idagadag ti mannurat ti Biblia a ni Santiago: “Agladingit ke[n] agleddaang ke[n] agsangitkayo. Ti panagkatawayo mapagbalin koma a panagleddaang, ket ti panagrag-oyo panagliday. Agpakumbabakayo iti imatang ni Jehova.” (Santiago 4:9, 10) Kasanoyo a pagbabawyan ti ar-aramidenyo pay met laeng? Panunotenyo a dakes dayta. Panunotenyo ti pannakasair ti Dios iti dayta. Panunotenyo dagiti parikut nga imbungana kadakayo ken dagiti panagulbodyo tapno maikurimed dayta. Palagipanyo ti bagiyo a kagura ni Jehova ti panagulbod! (Salmo 5:6) Ti panangmennamenna kadagitoy a kinapudno ti makatulong kadakayo a mangiwaksi iti dakes nga aramid iti panunot man ken rikriknayo.

Ngem, saan nga umdas ti basta pannakarikna a dakes ti ar-aramidenyo. Bigbigen ti maysa nga agtutubo nga agnagan Robert, a nairaman iti nalimed a panagusar iti maiparit nga agas: “Nakapimpimanak. Ammok ti maiparbeng ken di maiparbeng. Kaskasdi nga intultuloyko ti doble a panagbiagko.” Kasapulan ngarud ti determinado a panagtignay! Idiay 2 Cronicas 7:14, kinuna ti Dios a no dagiti managbasol “agpakumbabada ken agkararagda ken sapulenda ti rupa[na] ken sumiasida kadagiti nadangkes a dalanda, ngarud dengge[nnan]to ida manipud langit ket pakawane[nnan]to dagiti basolda.”

Ti ‘panangsapul iti rupa ti Dios’ kaipapananna ti iyaadani kenkuana babaen iti kararag, ipudno kenkuana ti salungasingyo, ken kiddawen ti pammakawanna. Mabalin a narigat daytoy, ngem sigurado a mabang-arankayto no aramidenyo dayta. Kinuna ti salmista: “Idi nagulimekak, dagiti tulangko narmayda bayat ti panagungorko nga agpatnag ken agmalem. Ta aldaw ken rabii ta imam sibabantot a naiparabaw kaniak. . . . Binigbigko ti basolko kenka, ket ti kinadakesko diak inlinged.”​—Salmo 32:3-5.

Panangipudno Kadagiti Nagannakyo

Adda pay rumbeng a pangibagaanyo kadagiti parikutyo. Ngem asinoda? Binigbig ti tin-edyer nga agnagan Brian: “Maysa kadagiti kadakkelan a nagkamaliak isut’ panangibagak iti problemak kadagiti maaw-awagan gagayyemko imbes a ken Kristiano a nanangko. Ngem maamakak idi a makisarita kenkuana gapu iti impagarupko a reaksionna, isu a napanak kadagiti gagayyemko, nga isuda ketdi ti ad-adda a nangiyadayo kaniak iti kinapudno.” Diyo koma tultuladen dayta. Ipeksayo dagiti rikriknayo kadagiti managbuteng-Dios a nagannakyo. (Idiligyo ti Proverbio 23:26.) Adda kalinteganda a makaammo iti ar-aramidenyo. Adut’ isingasing ti kapitulo 2 ti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo no kasanot’ panangipudnoyo kadagiti dadakkelyo iti daytoy a banag.c

Gangangay laeng a didanto maragsakan a makaammo nga inulbodanyo gayam ida. Ngem nalawag a kasta unay ti panangdungngo dagiti nagannak kadagiti annakda. Napaliiw ni mannurat a Clayton Barbeau: “Didakayto nga ilaksid gapu ta nakabasolkayo wenno nairamankayo iti riribuk. Adun nga ubbing ti nagsikog, naakaran iti iyakar-sekso a sakit, naaddaan parikut gapu iti panaginum wenno panagdroga wenno naisarsarak ket impapanda a makapungtot ken makaungetto la ketdi dagiti nagannakda. Ngem idi impudnoda dagiti parikutda kadagiti nagannakda, inarakup wenno sinallabayda ketdi ida, sada kinuna, ‘Talaga la ketdi a dakes ti napagtengmo, ngem kitaentayo no kasano a marisut dayta.’” Wen, no bimmaawen ti pannakakellaat ken pungtotda, ikagumaan ti kaaduan a nagannak ti sumaranay. Lallalo pay a pudno daytoy no managbuteng-Dios dagiti nagannakyo! Ti kangrunaan a pakaseknanda isut’ panangatur kadagiti bambanag, imbes a pabainan wenno saktandakayo. (Idiligyo ti Isaias 1:18.) Iti daytoy a banag mabalin nga iyurnosda met ti pannakisaritayo kadagiti panglakayen ti kongregasion.​—Santiago 5:14, 15.

Talaga nga addanto dagiti maitutop a dusa a lak-amenyo manipud kadagiti dadakkelyo ken nalabit sumagmamano a naing-inget a restriksion. Ngem kinapudnona, makatulongto daytoy kadakayo tapno dikay agsublin iti dati a nakairuamanyo. Maysa pay, ti panangipudnoyo kadagiti bambanag iti nagannakyo ken ti pannakaimatangyo iti naayat a pannakaseknanda ti mabalin a mamagbalbaliwto unay iti dati a panangmatmatyo kadakuada. Agingga ita, nalabit pagsaksakitan ti nakemyo dagiti pagalagadan ken iparitda. Bigbigen ti balasitang nga agnagan Paulette: “Nagrigat nga aklonen ti balakad ken pammilin dagiti dadakkelmi. Ngem naamirisko a dagitoy ket agpaay iti pagimbagan ken manayon a kinaragsakmi.”

Panangbalbaliw Kadagiti Pakilangenanyo

Saan a naknakem ti maysa nga agtutubo ti doble a panagbiagna. Mabalin nga adu nga agtutubo ti kaduayo iti panagrebeldeyo! Tapno makalapsutkayo iti doble a panagbiagyo, kasapulan a balbaliwanyo dagiti pakilangenanyo. Kinuna ti salmista: “Saanak a nakikatugaw kadagiti tattao ti kinaulbod; ket diakto met sumrek a makikuyog kadagiti aginsisingpet.” (Salmo 26:4) Saan a nalaka ti umikay kadagiti dati a gagayyem. Kas ti salmista, mabalin a maikararagyo: “Ispalennak iti manangirubo ken nakillo a tao.” (Salmo 43:1) Itunosyo ti aramidyo itoy a kararag babaen ti panangibagayo kadagiti dati a gagayyemyo a nagbalbaliwkayon ket determinadokayo a mangaramid iti umiso. Imbes nga agbalinkayo a nalimed nga adalan ni Jesus, ibagayo ketdi ti pammatiyo kadagiti sabsabali. (Idiligyo ti Juan 19:38.) Masansan, a dagiti dakes a kakadua dagus a mangsapuldanto iti sabalin a pakigayyemanda.

Sumaganad, masapul a dagiti nasayaat a gagayyem ti isukatyo kadagiti dakes a gagayyemyo. Manmano kadi dagiti managbuteng-Dios nga agtutubo? Gapuna, lagipenyo ni mammadto Jeremias a nagkuna: “Saanak a nagtugaw iti nasinged a grupo dagidiay managangaw ket diak met nagrag-o. Gapu iti imam nagtugawak a bukbukodko.” (Jeremias 15:17) Nasaysayaat no agbukbukodkayo imbes a makikaduakayo kadagiti agtutubo a mangpakapuyto iti pammatiyo. Ngem masansan a makasarakkayo kadagiti napudno a gagayyem no ikagumaanyo dayta. Kas pangarigan, nakigayyem ni Tammy iti kasinsinna a maysa nga amin-tiempo a managebanghelio. “Nagbalinkami a nasinged,” malagip ni Tammy. “No saan nga aldaw ti panageskuela, makikuyogak kenkuana a mangasaba. Daytoy ti nakatulong kaniak a nangbalbaliw iti biagko.”

Ngem “ti kasayaatan a mangsalaknib,” kuna ti maysa nga agtutubo nga Aleman, “isut’ nadalus a konsiensia, nga aggubuay iti nasinged a relasion ken Jehova a Dios.” Bigbigen ti maysa a balasitang a dati a doble ti panagbiagna: “Diak pay napatanor ti maysa a nasinged a relasion ken Ama Jehova.” Babaen ti panagkararag ken personal a panagadal, isut’ nakapagbalbaliw. “Ita, addaanakon iti relasion ken Jehova a di pulos mawaswas ti asinoman,” ipagpannakkelna a kuna. Mabalinyo met a tagiragsaken ti nasinged a pannakigayyem iti Dios. Tarabayen ken saranayennakayto, nupay medio marigatankayto a mangbalbaliw kadagiti dati nga aw-awidyo. Kuna ti Salmo 37:24 maipapan iti maysa a matalek nga adipen ti Dios: “Uray matuang, saanto a madalupisak ta ni Jehova saranayenna ti imana.” Wen, babaen ti tulong ni Jehova, makalapsutkayo iti doble a panagbiag.

[Dagiti Footnote]

[Blurb iti panid 19]

“Pinadasko a lipatan nga unabes ni Jehova”

[Blurb iti panid 19]

Masapul a mangaramidkayo iti natibker a pangngeddeng nga agbalbaliw

[Ladawan iti panid 20]

Ilawlawagyo kadagiti dati a gagayyemyo a nagbalbaliwkayon ken dikayto makikaduan iti panangaramidda iti di umiso