SERAIAS
[Nakisupiat (Nagregget) ni Jehova].
1. Anak ni Quenaz a kameng ti tribu ni Juda, kabsat ni Ukom Otniel, ken kaanakan ni Caleb a managsimisim. Dagiti kaputotan ni Seraias babaen iti anakna a ni Joab nagbalinda a nasigo a trabahador.—1Cr 4:13, 14.
2. Ti sekretario bayat ti panagturay ni Ari David. (2Sm 8:15, 17) No saan a nasukatan iti daytoy a saad, isu ket naawagan iti dadduma pay a paset ti Kasuratan kas Seva (2Sm 20:25), Savsa (1Cr 18:16), ken Sisa a ti dua nga annakna idi agangay ket nagakemda kas sekretario idi tiempo ni Solomon. (1Ar 4:3) Kasta met laeng ti nagan ti adu a sabsabali pay nga opisial ti gobierno iti tallo a Davidiko a listaan.
3. Anak ni Asiel a kameng ti tribu ni Simeon. Dagiti kaputotanna a kapanawenan ni Ezekias ket kimmappon iti puersa a nangkabil kadagiti Hamita ken Meunim nga agnanaed iti maysa a lugar ken inaramatda dayta a lugar kas pagpaaraban.—1Cr 4:24, 35, 38-41.
4. Maysa kadagiti tallo nga imbaon ni Ari Jehoiaquim, iti naladaw a paset ti 624 K.K.P., a mapan mangsukon kada Jeremias ken Baruc gapu iti padto maibusor iti Jerusalem ken Juda nga inlanad ni Baruc nga indiktar ni Jeremias. Ni Seraias ket anak ni Azriel.—Jer 36:9, 26.
5. Ti agay-aywan kadagiti kuartel ni Ari Zedekias; anak ni Nerias ken kabsat ni Baruc. (Jer 32:12; 51:59) Idi 614 K.K.P., bayat ti maikapat a tawen a panagturay ni Zedekias, kimmuyog ni Seraias ken Zedekias a napan idiay Babilonia. Nangted kenkuana ni Jeremias iti lukot a naglaon kadagiti padto a mangkonkondenar iti Babilonia, a binilinna a basaenna dayta iti igid ti Karayan Eufrates, kalpasanna mangigalut iti maysa a bato iti lukot sana ipuruak iti karayan, a mangiladawan iti agnanayon a pannakarba ti Babilonia. (Jer 51:59-64) Nalabit inyallatiw ni Seraias kadagiti destiero nga Israelita nga agnanaed sadiay ti sumagmamano a kayulogan dagiti padto. Makapainteres ta nakasarak dagiti arkeologo iti maysa a pangselio nga addaan iti kitikit a “Kukua ni Seraias (ben) Nerias.”—Israel Exploration Journal, Jerusalem, 1978, Tomo 28, p. 56.
6. Ti panguluen a padi idi a ti Babilonia dinadaelna ti Jerusalem idi 607 K.K.P. Nupay napapatay ni Seraias kas imbilin ni Nabucodonosor, saan a napapatay ti anakna a ni Jehozadac ngem naidestiero idiay Babilonia. (2Ar 25:18-21; Jer 52:24-27) Babaen iti anak ni Seraias a ni Jehozadac, nagtultuloy ti linia ti nangato a padi a nagtaud ken Aaron; ti anak ni Jehozadac a ni Jesua ti nagakem iti daytoy a saad idi tiempo ti pannakaluk-at ken panagsubli dagiti Judio. (1Cr 6:14, 15; Esd 3:2) Ni Seraias ket naawagan met kas ama ni Esdras, ngem maigapu iti 139 a tawen a nagbaetan ti ipapatay ni Seraias ken ti isusubli ni Esdras, nalabit adda di kumurang a dua a di nainaganan a kaputotan iti nagbaetanda, maysa a kita ti pananglibtaw a gagangay kadagiti listaan ti kapuonan iti Biblia.—Esd 7:1.
7. Maysa kadagiti panguluen ti militar a nagtalinaed idiay Juda kalpasan ti sapasap a pannakaidestiero idiay Babilonia; anak ni Tanhumet. Ni Seraias ken ti dadduma pay a panguluen ti militar sinuportaranda ti pannakadutok ni Gedalias kas gobernador. Pinakdaaranda met ni Gedalias maipapan iti panangipangta ni Ismael iti biagna, ket idi agangay inkagumaanda nga ibales ti ipapatay ti gobernador. Nupay kasta, gapu ta kabutengda dagiti Babilonio, ni Seraias ken ti sabsabali pay a panguluen indauluanda dagiti nabatbati a Judio a mapan idiay Egipto.—2Ar 25:23, 26; Jer 40:8, 13-16; 41:11-18; 43:4-7.
8. Maysa kadagidiay nabatad a papanguluen a nailista a kimmuyog ken Zorobabel a nagsubli idi 537 K.K.P. manipud pannakaidestiero. (Esd 2:1, 2) Naawagan iti Azarias iti umasping a listaan iti Nehemias 7:7.
9. Maysa a padi a nagsubli a kadua ni Zorobabel manipud pannakaidestiero. Iti simmaruno a kaputotan, imbagian ni Meraias ti sangakabbalayan ni Seraias iti dasig ti amana. (Ne 12:1, 12) Ti Seraias a karaman kadagiti nagpirma iti tulag idi kaaldawan da Esdras ken Nehemias ket mabalin a maysa met a pannakabagi ti isu met laeng a pamilia, wenno sabali pay a padi a kastoy ti naganna. (Ne 10:1, 2, 8) Manen, ni Seraias, a mabalbalin a maysa a kameng daytoy a sangakabbalayan iti dasig ti ama wenno maysa a padi a kastoy met laeng ti naganna, ket nagtaeng idiay Jerusalem kalpasan ti pannakaibangon manen dagiti pader.—Ne 11:1, 10, 11.