ATER

[Naserraan; Napengdan].

1. Maysa a lalaki ti Israel, a ti 98 kadagiti annakna wenno kaputotanna ket nagsubli a kadua ni Zorobabel idi 537 K.K.P. manipud pannakaidestiero idiay Babilonia. (Esd 2:1, 2, 16; Ne 7:21) Kastoy ti pannakailistada: “Ti annak ni Ater, ni Ezekias, siam a pulo ket walo,” nalabit mangipasimudaag a putot ida ni Ater, ti kaputotan ti maysa nga Ezekias (ngem nalabit saan a ti Judeano nga ari nga addaan iti kasta a nagan), wenno kaputotan ida ni Ater babaen iti maysa nga Ezekias. Mabalin a ti kaputotan daytoy nga Ater ti maysa kadagiti panguluen dagiti umili a, babaen iti selio, nangpatalged iti “mapagpiaran nga urnos” idi kaaldawan ni Nehemias.​—Ne 9:38; 10:1, 17.

2. Ulo ti pamilia a dagiti putotna ket karaman kadagiti Levitico nga “annak dagiti agay-aywan iti ruangan” ti templo a nagsubli a kadua ni Zorobabel idiay Jerusalem manipud Babilonia.​—Esd 2:42; Ne 7:45.