ANTONIA, TORRE TI

Maysa a nasarikedkedan a patakder idiay Jerusalem ken nagserbi a kuartel dagiti soldado. Sigun ken Josephus, addaan dayta kadagiti siled, pagdigusan, pagturogan, ken paraangan.​—LADAWAN, Tomo 2, p. 535.

Ti Torre ti Antonia ket adda iti amianan a laud a nagsulian ti paraangan ti templo ken nabatad nga adda iti disso a nangibangonan idi ni Nehemias iti Kastilio (wenno baluarte) a nadakamat iti Nehemias 2:8. Adu ti tinarimaan ken ginastos ni Herodes a Dakkel iti panangtarimaanna iti dayta kasta met a pinangatona dagiti sarikedkedna. Sigud a pagaammo iti nagan a Baris, ngem pinanaganan ni Herodes iti Antonia kas pammadayaw ken Mark Antony. Kas ti inar-aramid ti Judio a nangato a padi ken agturay a ni Juan Hircanus iti naglabas, impaidulin sadiay ni Herodes dagiti kawes ti papadi, nalawag a tapno kanayon a mabantayan ken makontrol ti nangato a padi.

Sigun ken Josephus, nabangon ti baluarte iti rabaw ti dakkel a bato a 50 a kasiko (a. 22 m; 73 pie) ti kangatona. Iti rabaw ti bato, adda padpader a bato nga agtayag iti 40 a kasiko (a. 18 m; 58 pie) ken uppat a torre iti nagsulian, a ti tallo kadagita agtayag iti 50 a kasiko (a. 22 m; 73 pie) ket ti maysa agtayag iti 70 a kasiko (a. 31 m; 102 pie), nga adda iti abagatan a daya a suli ken tumannawag iti intero a lugar ti templo. (The Jewish War, V, 238-247 [v, 8]) Sakbay ti tiempo ni Herodes, nangnangruna a nagserbi ti baluarte kas depensa kadagiti iraraut manipud amianan, ngem idi agangay kangrunaanna a nausar kas disso a pakaimatonan dagiti Judio ken pagsiputan iti ar-aramid iti templo, nga iti dayta adda direkta a pagserkan manipud iti baluarte.

Ti kuadrado a disenio ti baluarte ipasimudaagna nga adda paraangan iti tengngana. Maipagpagarup nga iti kasta a paraangan iti uneg daytoy a torre ti dimmatagan ni Jesus iti saklang ni Pilato maipaay iti pannakaukom. (Jn 19:13) Adda dagiti mangibaga a ti dappat a bato (wenno, batbato a nayaplag) a nasarakan iti daytoy a disso isu ti natukoy kas “Gabbatha.” Nupay kasta, patien ti dadduma a ti panangukom ni Pilato ken Jesus napasamak iti sanguanan ti palasio ni Herodes.​—Kitaenyo ti DAPPAT A BATO.

Ti ad-adda a sigurado a pannakatukoy ti Torre ti Antonia isu ti nailanad iti salaysay iti Aramid 21:30-40 ken 22:24. Agparang a manipud kadagiti tukad ti agdan daytoy a baluarte nga indatag ni Pablo ti panangikalinteganna ken pammaneknekna iti sanguanan ti maysa a bunggoy dagiti relihioso a managderraaw ket kalpasanna naipan kadagiti kuartel dagiti soldado tapno mapalutpot. Nalabit naisubli ni Pablo iti daytoy a disso kalpasan ti nagubsang a panangusig kenkuana ti Sanhedrin, ken adda ditoy idi immay pakdaaran ti kaanakanna maipapan iti gakat a mangpapatay kenkuana.​—Ara 23:10, 16.

Naan-anay a narebbek ti Torre ti Antonia idi a ni Romano a Heneral Tito dinadaelna dayta agraman ti templo ken siudad idi 70 K.P.