MALBABISKO

[Heb., chal·la·muthʹ].

Mula a kankanayon nga agtubo ken asideg ti pannakainaigna iti mula a hollyhock. Ti katayag dagiti natangken nga ungkay ti malbabisko (Althaea officinalis) dumanon iti 1.8 m (6 pie). Giraygiray ti dadakkel, akaba a bulbulong ti mula ken nagkuntirad ti murdongda. Agpada dagiti ungkay ken bulbulong a nabungon iti nalamuyot a muldot. Ti pusasaw a pangindaraen ti marisna ken lima ti petalona a sabsabong ket agarup 5 cm (2 pul.) iti pagakabaanda. Kadagiti tiempo ti nakaro a bisin, ti puraw a kasla carrot a ramut ti malbabisko ket naaramat a pagtaraon. Ti kakaisuna a pannakatukoy ti malbabisko iti Kasuratan iparipiripna ti kinaawan raman dayta.​—Job 6:6.

Ti Hebreo a termino a chal·la·muthʹ, a masarakan laeng iti Job 6:6, nadumaduma ti pannakaipatarusna kas “itlog” (AS, KJ), “purslain” (AT), ken“malba-bisko,” sigun iti pannakadepinarna iti Hebreo ken Aramaiko a leksikon da L. Koehler ken W. Baumgartner (Lexicon in Veteris Testamenti Libros, Leiden, 1958, p. 304).