KUDIL

Ti makinruar a balkut ti bagi ti tao wenno animal. Naibilang ti kudil kas paset ti bagi nga addaan espesipiko a panggep, ket pudno nga adu ti maaramidanna agpaay iti pagsayaatan ti bagi, agpaay met kas salaknib, mangtimbeng iti temperatura ti bagi, ken mangikkat iti sumagmamano a rugit.

Mangdakamat ti Biblia kadagiti sakit ti kudil (Le 13:1-46; 21:20; De 28:27) ken iti sumagmamano a sagubanit ti kudil gapu iti sakit ken panagbisin.​—Job 7:5; 30:30; Un 4:8; 5:10.

Sigun iti Linteg, dagiti kudil wenno lalat ti animal a naaramat iti sumagmamano a daton gapu iti basol ket napuoran iti ruar ti pakarso ti Israel, wenno iti ruar ti ruangan ti Jerusalem. (Ex 29:14; Le 4:11, 12; 8:17; 9:11; 16:27; Heb 13:11) Ti padi inawatna ti lalat ti maysa nga animal nga indatag ti maysa nga Israelita maipaay a daton a mapuoran.​—Le 7:8.

Kalpasan ti panagbasol da Adan ken Eva, impaayan ida ni Jehova iti kawkawes a lalat kas pangabbong iti kinalamolamoda. (Ge 3:21) Nagkawes ti sumagmamano kadagiti di nakuskosan a lalat, nangnangruna ti sumagmamano a mammadto (2Ar 1:8), agraman ti sumagmamano nga ulbod a mammadto. (Zac 13:4) Dagiti lalat ti animal nagpaayda met a palloka (Eze 16:3, 10); naaramid a supot (1Sm 17:40) ken lalat-a-botelia maipaay iti danum, gatas, ken arak (Ge 21:14; Jos 9:13; Uk 4:19; Mt 9:17); kas tambor; ken mabalin a kas pagallungogan ti uni ti neʹvel wenno “pagtokar nga adda kuerdasna.” (Isa 5:12) Naaramat dagiti lalat kas abbong ti tabernakulo.​—Ex 25:2, 5; 26:14; 35:7, 23; 36:19.

Naaramat met ti lalat dagiti karnero, kalding, wenno kigaw a baka kas pagsuratan.​—Kitaenyo ti PERGAMINO.

Piguratibo nga Usar. Maipapan ken Job, ni Satanas kinunana ken Jehova: “Kudil maigapu iti kudil, ken isuamin nga adda iti maysa a tao itednanto maigapu iti kararuana.” (Job 2:4) Ngarud ti Diablo kinuestionaranna ti kinatarnaw ti tao, a kinuna a ni Job ilunodna ti Dios no madadael ti mismo a pisikal a salun-atna.

Kinuna a mismo ni Job: “Makatalawak a kas iti kudil ti ngipenko.” (Job 19:20) Adda insingasing dagiti managipatarus a sabali pay nga interpretasion daytoy a kasuratan, ngem no suroten dayta kasapulan a maatur ti Hebreo a teksto. Agparang a saanen a nasken nga ikagumaan nga ilawlawag ti sasao ni Job maibatay kadagiti takuat dagiti sientista kadagiti naglabas a tiempo babaen kadagiti mikroskopio. Agparang nga ibagbaga laeng ni Job nga awan banag a natalawanna, wenno gistay saan a nakalasat. Ti natalawanna ket kas iti kudil ti ngipenna, kayatna a sawen, ti “kudil” ti maysa a banag a nalawag nga awanan kudil.