KINAAWAN PAKABABALAWAN

Ti maysa a Hebreo a sao a naipatarus nga “awan pakababalawanna” ket tam. Naaramat mainaig iti mapagulidanan a moral a takder ni Job ken maipapan iti awan pakapilawanna a kinalibnos ti Sulamita. (Job 1:1, 8; Sol 5:2; 6:9) Gapu iti natalna ken naulimek a biagna kadagiti tolda kas maisupadi iti nagulo ken mannakigasanggasat a biag ti kabsatna kas mangnganup, naikuna a ni Jacob awan pakababalawanna. (Ge 25:27) Ti sabali pay a Hebreo a sao a no dadduma naipatarus nga “awan pakababalawanna” ket ta·mimʹ, a ti anagna ket “awan pagkuranganna; nasimbeng; naan-anay.” (Pr 2:21; 11:5, 20) Ti Hebreo a sasao a tam ken ta·mimʹ nagtaudda iti berbo a ta·mamʹ, a ti kaipapananna ket “naan-anay, nalpas; dumteng iti kinanaan-anay; agpatingga.” (Sal 19:13; 1Ar 6:22; Isa 18:5; Jer 24:10; idiligyo ti 1Sm 16:11, a sadiay ti sasao a naipatarus a “Dagitoy kadi aminen dagiti lallaki?” literal a kaipapananna ti “Kompleto kadin dagiti lallaki?”) Iti Griego a Septuagint, ti Hebreo a sao a tam no dadduma naipatarus nga aʹmem·ptos. (Job 1:1, 8; 2:3; 9:20) Dagiti porma daytoy a sao agparang met iti Kristiano a Griego a Kasuratan ken mabalin a madepinar kas “awan pakababalawanna; awan pagkuranganna.”​—Lu 1:6; Fil 3:6; Heb 8:7; kitaenyo ti KINANAAN-ANAY, KINAPERPEKTO.

No maaramat iti panangdeskribir iti tattao, ti termino nga “awan pakababalawanna” masapul a kanayon a mamatmatan kas relatibo, saan a naan-anay. Ti agsagsagaba a ni Job naaddaan kadagiti di umiso a panangipapan maipapan ken Jehova, agraman iti wagas a panangmatmat ti Mannakabalin-amin kadagidiay awan pakababalawanda. (Job 9:20-22) Ni Zacarias, ti ama ni Juan a Manangbautisar, nangiparangarang iti kaawan pammati iti pakaammo ni Jehova babaen ken anghel Gabriel. (Lu 1:18-20) Kaskasdi, naikuna nga awan pakababalawan da Job ken Zacarias, ta naaramidanda ti inanamaen ni Jehova iti tattao a, nupay matalekda, namulitan iti kinaimperpekto.​—Job 1:1; Lu 1:6.

Sigun iti panangmatmat dagiti Judio a kapanawenanna, ni Pablo awan pakababalawanna sakbay a nagbalin nga adalan ni Jesu-Kristo. Inaramidna ti imbilin ti Linteg, a tinungpalna dagiti pagrebbengan a naisaad kenkuana ken liniklikanna no ania ti naiparit. (Fil 3:6) Ngem nupay kasta, saan a tinagiragsak ni Pablo ti awan pakababalawanna a takder iti sanguanan ni Jehova. Nadagsen ti basolna kas manangidadanes kadagiti kakabsat ni Kristo ket isu managtabbaaw ken nakuspag a tao.​—1Ti 1:13, 15.

Ti Kangatuan maragsakan kadagidiay a ti kababalinda iyanninawna ti naespirituan a kinasalun-atda, ti kinasin-awda, ti kinaawan pakababalawanda. (Pr 11:20) Gapuna, nasken nga agbiag dagiti Kristiano iti pamay-an nga awan pakababalawanna, siwayawaya iti nainkalintegan a pannakatubngar.​—Fil 2:15; 1Te 5:23.