PAGYURIT

Maysa a kita ti pagsurat a naaramat iti panangikabil kadagiti lamma kadagiti material kas iti pila wenno allid. (Sal 45:1; Isa 8:1; Jer 8:8) Ti pagyurit a naaramat maipaay iti panagsurat iti cuneiform ket gagangay a naaramid iti runo wenno kayo ti tumadeng ken mabalin a kuadrado wenno sukog-basil ti murdongna.

Ti pagyurit wenno paet a naaramid iti metal wenno sabali pay a natangken a banag ti kasapulan idi tapno dagiti letra ket mayukrit wenno maikitikit iti bato wenno metal. Kinuna ni patriarka Job: “O no ita naisurat koma ti sasaok! O no nailanadda koma pay iti maysa a libro! Babaen iti landok a pagyurit ken babaen iti buli, O no nayukritda koma nga agnanayon iti bato!” (Job 19:23, 24) Mabalbalin a ni Job tinarigagayanna a ti sasaona mayukrit koma iti bato ket dagiti nakitikit a letra maikkan iti buli tapno ad-adda a makapagpautda. Adu a siglo kalpasanna, kinuna ni Jehova a ti basbasol ti Juda naisuratda babaen iti pagyurit a landok, kayatna a sawen, saan a mapunas ti pannakailanadna.​—Jer 17:1.