PIRMA

Marka nga ar-aramaten ti maysa a tao kas pakabigbiganna. Ti sao a “pirma” ket pakaipatarusan ti Hebreo a sao a taw, ti nagan ti maudi a letra ti Hebreo nga alpabeto. (Naipatarus met ti taw kas “marka”; Eze 9:4 [idiligyo ti Rbi8 ftn], 6.) No dadduma, ti pirma ket mabalin a ti lamma manipud iti pangtanda a singsing wenno tubo a pagselio ti maysa a tao, wenno mabalin a naisurat a marka a para laeng iti makinkukua wenno ti marka a pinilina a pakabigbiganna.

Idi a ti tallo a ‘kakadua’ ni Job inakusaranda isuna nga agsagsagaba gapu iti basbasolna iti Dios, inkalinteganna nga awan basolna ket nangidatag iti argumento ken pammaneknek nga awan ti pakababalawanna. Immawag iti Dios a denggenna ti kasona ken ipaayanna iti sungbat, ket kinunana: “O no addaanak koma iti maysa nga umimdeng kaniak, a maitunos iti pirmak sungbatannak ti mismo a Mannakabalin-amin! Wenno ti maysa nga addaan kaso iti linteg maibusor kaniak nangisurat iti mismo a dokumento!” (Job 31:35) Inyebkas ditoy ni Job a kayatna nga idatag ti kasona iti Dios, nga inkabilna iti dayta ti bukodna a pirma kas pammasingked.