Ti Paraiso a Naisublin Itan-okna ti Dios
“Ket aramidekto ti disso dagiti saksakak a nagloriaan.”—ISAIAS 60:13.
1, 2. (a) Babaen ken mammadtona nga Isaias, aniat’ impadto ti Dios maipapan iti daga? (b) No kumitkita iti sangaribo a tawen iti masanguanan, aniat’ makitatayo?
PINARSUA ni Jehova ti daga kas planeta iti babaen ti saksakana, kas ti piguratibo a pagbatayanna. Babaen ken mammadtona nga Isaias, ti Dios impadtona nga ‘aramidennanto ti disso dagiti saksakana a nagloriaan.’ (Isaias 60:13) Babaen iti tulong ti naipaltiing a Biblia, mabalintay ti kumita, a kasla babaen iti nagpigsa a teleskopio, sangaribo a tawtawen iti masanguanan ti tao. Anian a mangnibinibi a buya ti mangkablaaw kadagiti matmatatayo! Ti intero a daga sumilnag iti awan tulawna a kinapintas a pinataud ti kadadakkelan a Hardinero iti intero nga uniberso. Ti paraiso naisublinton iti sangatauan iti intero a daga!
2 Wen, ti nasantuan a Kangatuan a Persona a nangirugit’ kaadda ti tao iti minuyongan a paraiso pampanunotenna ti kadadakkelan a ragsak ti tao. Anian a managayat a Namarsua a maadda para iti sangatauan, a kenkuana awan kinamanaglablabes iti pagsasao iti panagkuna, “Ti Dios isu ti ayat”! (1 Juan 4:8, 16) Idiay naisublin a Paraiso, dagiti natataengan a lallaki ken babbai iti awan tultulawna a natauan a kinaperpekto agnaeddanto a sangsangkamaysa kas naayat a kakabsat a lallaki ken babbai. (Isaias 9:6) Natignay iti ayat, addadanto iti perpekto a panagpaituray iti nadayag a Namarsua iti langit ken daga, a ni Jehova a Dios.
3, 4. (a) Iti ania a pamay-an a ti langit ken daga agkatupag iti maysa ken maysa? (b) Kasanot’ rikna dagiti anghel inton ti Paraiso ket maisublin ditoy daga?
3 Rinibribo a tawen sakbayna, iti nasantuan pannakaipaltiingna a panangiladawan ti pagturayanna, inyebkas ti Dios dagitoy makaay-ayo a sasao iti pinilina nga ili: “Ti langit isu ti tronok, ket ti daga isu ti pagbatayan dagiti saksakak.” (Isaias 66:1) Ti naan-anay a kinadayag ti “pagbatayan ti saksakana,” ti Paraiso a daga, ti rebbeng a katupag ti dayag ti tronona kadagiti di makita a kangatuan.
4 Idi tiempo ti pannakaparsua ti daga, dagidiay katulongan idiay trono ti Dios kadagiti langlangit ti nangutob iti naindagaan a buya ditoy baba. Ania ngatan a pannakakayaw ti nariknada idi a dagiti matmatada miningmingminganda ti nadayag a kinaraniagna! Kasano a mamedmedanda ti aggigiddan nga ibebettak iti panagkantada? (Idiligyo ti Sofonias 3:17, Revised Standard Version; Salmo 100:2, The Jerusalem Bible.) Ti maay-ayo ken maragsakan a Namarsua pinaltiinganna ti naindagaan a mannuratna a mangiladawan iti apagpag-isu a panangisalaysay ti nailangitan a buya, a kunkunana: “Idi dagiti bitbituen ti agsapa nagdaniwda a sangsangkamaysa, ken amin dagiti annak a lallaki ti Dios dimmir-ida gapu iti rag-o.” (Job 38:7) Anian nga ad-adda pay ti panagdir-i dagiti angeliko nga annak ti Dios, iti dayag ti Dios, inton ti Paraiso ket naisublin!
5. Kasanot’ rebbeng a panagriknatayo maipapan iti pannakaragpat ti orihinal a panggep ti Dios maipapan iti daga?
5 Pudno a makaparagsak kadatayo a mapasiguruan babaen iti naipaltiing a Nasantuan a Kasuratan a ti grande a pannakaragpat ti paraiso a daga ket isut’ rinanta ni Jehova a Dios nanipud pay idi punganay. Daytoy makapataud-ragsak, makapataud ti dayaw a tampok ti panggep ti Dios agpaay iti daytoy a daga ket isut’ nainkalintegan a banag a namnamaen iti Dios nga agsasaruno ti kinadayagna nga awan mintis iti panangipanayag ti kinatan-okna. Amin a dayaw agpaay kenkuana!—Salmo 150:1, 2; Isaias 45:18; Apocalipsis 21:3-5.
Dagidiay Mapagungar Bumadangda iti Pannakaisublit’ Paraiso
6. Kalpasan ti Armagedon, kasanonto a matagitauan ti daga?
6 Nupay dagiti makalasat iti Armagedon ket bassitda iti bilang no iyar-arig, saanto nga interamente a babaen iti panaganak iti biangda a matagitauanto a naan-anay ti daga. Ni Jehova ‘aramidennanto ti disso ti saksakana a nagloriaan’ babaen iti panangisublina iti biag dagidiay adda kadagiti tanem a pakalaglagipan ken dagidiay umay iti sidong ti gunggona ti daton a subbot ni Kristo. Dagitoy, iti biangda, maaddaandanto ti pribilehio a makiraman iti makaay-ayo a trabaho a panamagbalin iti naindagaan a globotayo a paraiso iti aglaplapusanan a kinapintas.—Aramid 24:15.
7. Ania a sasao ni Jesus ti laglagipento dagiti makalasat ti Armagedon?
7 Dagiti makalasat ti Armagedon silalagipdanto a kanayon kadagiti makatignay-kararua a sasao ni Apo Jesu-Kristo iti okasion idi a natignay a kinunana: “Dikay pagsiddaawan daytoy, ta umay ti oras a dagiti amin nga adda kadagiti tanem a pakalaglagipan mangngegdanto ti timekna ket rummuardanto.” (Juan 5:28, 29) Anian nga orasto dayta inton dagiti tao a natnatay nga adda kadagiti tanemda a pakalaglagipan mangruginton a mangngeganda ti timek ti Anak ti Dios a mangiyebkas kadagiti sasao a maiyasping iti naiturong ken Lazaro, a ti bangkayna adda idiay tanem sadi Betania: “Lazaro, rummuarka!”—Juan 11:43.
8, 9. Asinonto dagiti mabalbalin nga umuna a mapagungar iti napabaro a biag ditoy daga, a mangyeg ragsak kadagiti makalasat ti Armagedon?
8 Asinonto ngata dagiti mabalbalin nga umun-una a mapagungar iti napabaro a biag ditoy daga iti sidong ti Sangaribo a Tawen a Panagturay ni Jesu-Kristo ken sumungbat iti bilinna? Nainkalinteganto laeng nga isuda dagiti “sabsabali a karnero” a natay bayat dagiti maudi nga al-aldaw sakbay ti panungpalan daytoy a sistema dagiti bambanag. Mapasarandanto ti nasapsapa a panagungar. (Juan 10:16) Nalabit isudanto ti basbassit pakarigatanda a mangibagay ti bagbagida iti baro a lubong.—Idiligyo ti Mateo 25:34; Juan 6:53, 54.
9 Anian a makaparagsak kadagiti makalasat ti Armagedon inton makitada a mapagungar dagidiay “sabsabali a karnero” a natay bayat ti kaputotan sakbay ti “dakkel a rigat”! (Mateo 24:21) Babaen kadagiti nalawag a pannakabalin ti panangilasin, mabigbigto ida dagiti nakalasat ti Armagedon, abrasaenda ida, ket kaduadanto ida a mangituloy a mangpabaro ti sangsangkamaysa a serbisioda iti Kangatuan Unay a Dios!
10. Babaen ti pannakalasat iti Armagedon, aniat’ mabalin a maimatanganyonto?
10 No maysakayto kadagiti makalasat ti Armagedon, maimatanganyonto ti kauunaan nga agungar kadagiti mismo a naindagaan a kakabagianyo. Awanen sabali nga emosional nga epekto daytoy kadakayo no di kas met laeng kadagiti nagannak a nakakita ti panangisubli ni Apo Jesus ti 12-años nga anakda a babai a sibibiag kadagiti mailiwanen a taktakkiagda? “Ket napagtalnada a dagus iti dakkel a siddaaw.” (Marcos 5:42) Ay wen, ti di maiyeb-ebkas a rag-o ket kukuayonto inton panagungar dagiti natay manipud Hades ken iti baybay. (Apocalipsis 20:13) Ay, anian a nagdayag a masanguanan dayta, maysa a masanguanan a dandani adtoyen!
“Piprinsipe iti Amin a Daga”
11, 12. (a) Aniat’ ipaganetget ti Salmo 45:16? (b) Manipud kadagiti siasino ti mabalin a pangdutokan ni Ari, a Jesu-Kristo, kadagiti “piprinsipe iti amin a daga”?
11 Babaen iti panangwatwatna ti pannakabalinna a mangpagungar kadagiti tao a natnatay a nangipaayanna ti perpekto a natauan a biagna kas daton a subbot, maiyegto ni Jesus ti kaitungpalan ti Salmo 45:16. Babaen iti padto tinukoy daytoy a salmo ni Jesu-Kristo kas ti naipatugawen nga Ari: “Maisandi kadagiti [naindagaan a] dadakkelmo dagitinto annakmo, isuda a pagbalinemto a piprinsipe iti amin a daga.” Daytoy a salmo ipaganetgetna a ni Jesu-Kristo ket agbalinto a nailangitan nga ama kadagiti annak ditoy daga ket isaadnanto dagiti annak manipud kadakuada kas “piprinsipe iti amin a daga.” Kas “anak ni David” ken kas ti inauna nga anak ti birhen a taga Judea nga isu ni Maria, addaan ni Jesus kadagiti natauan nga amma nga agsubli agingga iti umuna nga ama, a ni Adan.—Lucas 3:23-38.
12 Ibagbaga kadi ti Salmo 45:16 a dagidiay dati a natural nga amma ni Jesus agbalindanto nga annakna babaen iti panangpagungarna kadakuada manipud ken patay? Wen. Ibagbaga pay met kadi ti Salmo 45:16 a gaput’ panagtaudna kadakuada, ikkanto ni Jesus ida ti naisangsangayan a naarian a pabor ken dutokannanto ida nga agbalin a “piprinsipe iti amin a daga” iti Paraiso a kasasaadna? Saan. Ti kaitungpalan ti padto iti kasta a pamay-an ti mangipalubos laeng iti limitado a bilang ti “piprinsipe” iti amin a daga. Malaksid iti dayta a kinapudno, saan nga amin dagitoy nga ammana ket naisalsalumina tapno maikarida ti naisangsangayan a kinatan-ok ditoy daga bayat ti Milenio a Turayna. Addaanto pay ni Ari, a Jesu-Kristo, ti ad-adu ngem kadagiti naindagaan nga ammana a dutokanna kas “piprinsipe”—dagiti kualipikado kadagiti makalasat ti Armagedon, kadagiti mapagungar a “sabsabali a karnero,” agraman dagiti sakbay ti Kinakristiano a tattao ti pammati. Manipud amin kadagitoy, mabalinnanto ti mangdutok kadagidiay kualipikado a maikari a mangiggem iti naprinsipean a saad kas dagiti naindagaan a pannakabagina.
13, 14. Ania kadagidiay mapagungar ti pribilehio a makitanto dagiti makalasat ti Armagedon iti mismo a matada?
13 Pampanunotenyo laengen dagita a nakalinea iti panagungar iti sidong ti Mesianiko a Pagarian. Adtoy! Patientay aya dagiti matatayo? Adda dita ni Abel, ti umuna a natauan a martir, ken ni Enoc, a nagtultuloy a nakipagna iti pudno a Dios. Adda met dita ni Noe, ti nangibangon ti daong. Adda dita ni Abraham, Isaac, ken Jacob, nga amma ti nasion ti Israel. Adda ni Moses (iti tribo ni Levi a papadi) ken ni David a nakaaramidan ti agnanayon a tulag maipaay ti Pagarian. Ken adda dita, ni Isaias, Jeremias, Ezequiel, Daniel, ken amin dagiti dadduma pay a manangisurat ti Biblia a Hebreo a mammadto agingga iti kaudian kadakuada, nga isu ni Malakias, ken, siempre, ni Juan a Mammautisar ken kasta met ken ni Jose, ti agsioman ken Jesus.
14 Iti naminsan nga okasion kinuna ni Jesus kadagiti Judio a “makitayo ni Abraham ken ni Isaac ken ni Jacob ken dagiti amin a mammadto idiay pagarian ti Dios, ket [isuda met laeng] maparuarkayto.” (Lucas 13:28) Ti “dakkel nga umariwekwek” kadagiti naindagaan a makalasat “ti dakkel nga aldaw ti Dios a Mannakabalin-amin” maparaburanto iti pribilehio iti literal a pannakakita kada napagungar nga “Abraham ken ni Isaac ken ni Jacob ken dagiti amin a mammadto” ditoy Paraiso a daga ken iti naarian a serbisio iti sidong ti Pagarian ti Dios babaen iti “Agnanayon nga Ama,” nga isu ni Jesu-Kristo.—Apocalipsis 7:9, 14; 16:14; Isaias 9:6.
15. Ania nga awan pakaiyaspinganna a pribilehio ti agur-uray kadagidiay makalasat ti Armagedon?
15 Anian a makatignay-kararuanto para kadakayo a makalasat ti panungpalan daytoy agdama a dakes a lubong tapno makapagkinnumpara iti notas ken Noe ken ti kapamiliaanna, dagiti “walo a kararua,” a nakalasat iti panungpalan ti umuna a lubong iti sangalubongan a Layus idi 2370 K.K.P.! Nikaanoman awanton ti sabali a maaddaan kadagiti kapadasan kas ti kapadasanyo ket iti kasta makapagserbikayto kas Saksi ni Jehova a Dios iti daytoy naisalsalumina, di mauliten a banag.—1 Pedro 3:20; Marcos 13:19; 2 Pedro 3:5-7.
Ti Mannakipagrikna a Managdakdakes Malagipto
16, 17. (a) Inton lagipenen ni Jesus ti mannakipagrikna a managdakdakes, ania a pribilehio ti addanto kadagidiay makalasat ti Armagedon ken daddumanto pay a sibibiag? (b) Ania a namnama ti mapampanunot maipapan iti napagungar a managdakdakes?
16 Awan duadua, iti dayta a tiempo madamanton ti pannakaisubli ti Paraiso ditoy daga. Ti managdakdakes a nailansa idiay Kalbaryo a kaasibay ni Jesus a nagkuna kas panangbigbig ti karatula iti uluananna, “Jesus, laglagipennak inton umayka iti pagariam,” mapagungarto iti naindagaan a biag idiay naisublin a Paraiso. (Lucas 23:42) Pribilehionto dagiti makalasat ti Armagedon ken dagiti daddumanto a sibibiag iti dayta a tiempo a mangabrasa kenkuana manipud ken patay. Isudanto ti mangisuro a naan-anay kenkuana maipapan ti agturturayen nga Ari, nga isu ni Jesu-Kristo, a nangipakitaanna ti nauneg a simpatia idi Nisan 14, idi tawen 33 K.P.
17 Dinto mapaay ni Apo Jesu-Kristo a manglagip kenkuana bayat ti panagturayna ti sangaribo a tawen. Awan duadua a dayta mannakipagrikna, napagungarto a managdakdakes idemostrananto ti panangapresiarna iti agturturayen nga Ari, ni Jesu-Kristo, nga isut’ nakautanganna ti pannakapagungarna, babaen ti panangpanekneknat’ kinamatalekna iti Sapasap a Soberano, ni Jehova a Dios. Kalpasanna isuntot’ maibilang a maikari a mangtagiragsak ti panagbiag iti Paraiso a baro a lubong iti kinaagnanayon agraman dagiti dadduma iti naisubli, natulnog a sangatauan.
Biag iti Sangalubongan, Naisublin a Minuyongan ti Eden
18. Anianto ti kasasaad ti biag idiay naisublin a Paraiso?
18 Iti naisublin a Paraiso, tunggal maysa ket gayyemto iti tunggal maysa. Dagiti singgalut ti sangalubongan a relasion ti pamilia ket marikna agingga kadagiti kaunggan ti kararua ti kada maysa. Amin makapagkikinnaawatan iti maysa ken maysa. Agsasaodanto iti maymaysa a sangalubongan a pagsasao. Mabalin a daytanto ti orihinal a pagsasao ti sangatauan, nga isut’ inus-usaren ti tunggal maysa ditoy daga kadagiti umuna a 1,800 a tawtawen a panagbiag ti tao—manipud pannakaparsua ni Adan idi 4026 K.K.P. agingga iti kaaldawan ni Peleg (2269 ingganat’ 2030 K.K.P.), ta “kadagiti aldawna nabingay ti daga [kayatna a sawen, ti populasion ti daga].” (Genesis 10:25; 11:1) Tunggal maysa tagtagiragsakenna ti pribilehio ti panagbiag, ket makablaawan ti kada baro nga aldaw iti panagyaman iti nainayon manen nga aldaw ti panagbiag. Saan a lumanlanlan ti pagkapuyan ti bagi bayat ti panaglabas ti panawen. Bumilbileg dagiti pisikal a puersa, ket dagiti bagi saanda a kumapkapuy.—Idiligyo ti Job 33:25.
19. Anianto ti mapaliiw maipapan kadagiti dati nga addaan pakarigatan wenno handicap?
19 Ken adtoy! Daydiay naminsan a pilay ket makapagnan, wen, aglaglagto gaput’ rag-ona. Dagiti napukpukaw a takkiag ken saka ket simimilagro a naisublidan. Dagidiay dati a bulsek makakitadan, dagiti tuleng makangngegdan, dagiti umel makapagsaodan ken makapagkantadan gaput’ pudpudno a rag-o. (Idiligyo ti Isaias 35:5, 6.) Ti kinalaad maipapan iti natauan a porma ken pigura agawandanton. Ti natauan a kinalalaki ket nagpintas pannakabalansenan iti natauan a kinababai. (Genesis 2:18) Ti natauan a kinaperpekto ti mangipadayag ken Jehova a Dios, ti Namarsua ti perpekto a natauan a bagi.
20. Anianto ti mapaliiw maipapan kadagiti puersa a naturales, abasto ti taraon, ti animal a sangaparsuaan, ken no kasanot’ pannakaaramat iti daga?
20 Ti intero a daga ket agbalbalinen a maysa a sangalubongan a napintas a disso. Awan aniaman a paset ti daga ti paggapuan ti aniaman a report ti tikag wenno maibuybuyat a makadadael a tudo wenno kadagiti makadadael a bagyo, ken dagiti alipugpog. (Idiligyo ti Marcos 4:37-41.) Amin dagiti puersa naturales ket maiyegda iti naan-anay a kinabalanse iti panamagbalin iti intero a daga a nagpintas a disso a pagnaedan. Awan kinakirang ti taraon iti uray sadino, ta ti daga itdennanto a naan-anay ti bungana. (Salmo 72:16) Addanton ti talna ken talged iti sangalubongan agpadpada agpaay iti tao ken an-animal, kas kinuna ni Jehova: “Didanto mangranggas wenno mangdadael iti amin a bantayko a nasantuan.” (Isaias 11:9; kitaenyo met ti bersikulo 6-8.) Iti daytoy a pamay-an maaramidton ti daga a makaay-ayo a disso a pagnaedan ken pangitungpalan ti panagdayaw ken serbisio ni Jehova a Dios, ti Namarsua ken Makinkukua iti daga. Gapu ta daytat’ kukuana gaput’ panangparsuana iti dayta, daytat’ maikari a mausar iti pamay-an a makaparagsak kenkuana ken mangipadayag kenkuana.—Idiligyo ti Isaias 35:1, 2, 6, 7.
21. Kasanonto ti panangmatmat ti nasubbot a sangatauan iti isuamin nga adda iti daga, ket ania a musika ti mangngegan?
21 Makapabang-ar iti kinabaro—daytanto ti kasasaad ti isuamin ditoy daga nga agpaay kadagiti nasubbot a tattao a di pay pulos nagtataeng iti uneg ti Paraiso a minuyongan ti Eden a nangrugian ti natauan a biag iti nagpintas a kinaperpekto! (Apocalipsis 21:5) Anian a makaay-ayo a musika, iti instrumento man wenno iti bokadura, ti mangngeganto—amin daytat’ mangidaydayaw ken ni Jehova!—1 Cronicas 23:4, 5; Salmo 150:3-6.
22. Kasanontot’ rikna ti panagbiag iti Paraiso a baro a lubong?
22 Anian a nakaskasdaawto ti agnaed iti maysa a daga a sadiay ti natauan a biag aglaplapusananton a naan-anay ken sadiay amin a tukad ti ipapatay gaput’ orihinal a basol ni Adan ket napunaston! (Idiligyo ti Juan 10:10.) Wen, daytantot’ maysa a daga a sadiay tunggal naanamongan a natauan a parsua iparangarangnanto ti ladawan ken kaasping ni Jehova a Dios nga isut’ nakaparsuaan ti immuna a tao a ni Adan! (Genesis 1:26, 27) Ti daga ket saanton a sakit ti mata kadagiti serapines, kerubines, ken kadagiti naraniag nga angheles idiay langit. Inton iturongda dagiti makaay-ayo a rupa iti daga, a mingmingmingan dayta a naadornuan iti naparaisuan a kinapintas, addaandanto laeng ti dayaw ken panagyaman a maiyebkas iti Daydiay makinrupa a pribilehiodanto a makitkita a direkta—ni Jehova, ti Soberano iti Uniberso.—Mateo 18:10.
Maysa a Naragsak, Awan Inggana a Masanguanan
23. Aniantot’ posible maipapan kadagiti napulotan a Kristiano, ket anianto ti resultana kadagiti agnaed iti naindagaan a Paraiso?
23 Adda ti posibilidadna ken pannakabalinna a, maysa nga aldaw iti masanguanan, ti nagnagan amin dagidiay napulotan a Kristiano a nangaramid a natibker ti “pannakaawis ken pannakapili[da]” ken nabendisionan babaen iti daytoy nailangitan a panagungar ket maipablaakto a naan-anay agpaay a pakaimpormaran ti natauan a pamilia iti naindagaan a Paraisoda. (2 Pedro 1:10; Salmo 87:5, 6) Gapuna, ti kaawan dagiti 144,000 a naiyanak iti espiritu a napulotan nga ad-adalan ni Jesu-Kristo manipud ti naindagaan a Paraiso ket maawatanton a naan-anay a pakapnekan ti tunggal maysa ken buyogen iti amin-puso a panagragragsak gapu kadakuada ken makikaykaysa kadakuada.
24. (a) Anianto ti naaramidanen ni Jehova maipapan iti “pagbatayan ti saksakana”? (b) Kasanotay nga ammo a ti baro a lubong dinto agpatingga, ket ania a naimpadtuan a kanta ti matungpalen?
24 Naragsakto ti awan inggana a masanguanan ti isuamin nga agtalinaed iti di maisin a debosionda ken Jehova, ti ulidan a Soberano iti intero nga uniberso. Ti nanam-ay pannakapunnona a Paraiso a daga ket maibagbagayto a disso, nadayaw a lugar, kas “pagbatayan” nga isunto ti pangisadagan a piguratibo ti Dios ti saksakana. Wen, iti kinaagnanayon mapadayagton ni Jehova ‘ti disso a pagbatayan dagiti saksakana,’ ket ti amin a sangatauan addanto iti di maisin a panagpasakop kenkuana! (Mateo 5:34, 35; Aramid 7:49) Ti baro a lubong ket maysanto a lubong nga awantot’ inggana gapu ta “ti idadakkel ti panangiturayna ken ti kappia awanto ti inggana.” (Isaias 9:7) Kalpasanna, ti naimpadtuan a kanta dagiti nailangitan nga angheles idi pannakaiyanak ni Jesus idiay Betlehem ti Judea idi 2 K.K.P. ket matungpalton: “Dayaw iti Dios idiay kangatuan, ken talna iti rabaw ti daga kadagiti tattao nga addaan naimbag a nakem.”—Lucas 2:13, 14.
25. (a) Ania itan ti apresiaren dagidiay kameng ti “dakkel nga umariwekwek” dagiti “sabsabali a karnero”? (b) Aniat’ rebbeng a naimpusuan a tarigagaytayo?
25 Dagidiay a paset ti “dakkel nga umariwekwek” ti “sabsabali a karnero” ti Naimbag a Pastor apresiarenda dagiti makapatignay-kararua a sasao a kari ti Paraiso a naisublin. Pribilehioda ti maitimpuyog iti organisasion ti Dios itan ken ti sireregta a pannakiraman iti trabaho nga impadto ni Apo Jesu-Kristo, ti panangikaskasaba ti naimbag a damag ti Pagarian iti isuamin a mapagnaedan a daga nga agpaay a maudi a pammaneknek. (Mateo 24:14; Marcos 13:10) Ti napasnek, naimpusuan a tarigagaytayo kas dagiti Saksi ni Jehova ket isut’ panangsalimetmet ti kinatarnawtayo nga awan tulawna iti kinaawan-inggana, iti agnanayon a pakaidayawan ken pakaalangonan ti Sapasap a Soberano, ni Jehova a Dios, ken iti sidong ti naarian a panagturay ti Anakna a bugbugtong, ni Jesu-Kristo. “Aleluia!”—Apocalipsis 19:1, 3, 4, 6, RSV, New International Version; Proverbio 10:9.
Kasanot’ Panangsungbatyo?
◻ Ania a kari ti inaramid ni Jehova maipapan iti piguratibo a pagbatayan ti saksakana, nga isu ti daga?
◻ Asinontot’ tumulong iti panangisubli ti Paraiso?
◻ Manipud kadagiti siasino ti pangdutokan ti Ari, a ni Jesu-Kristo, kadagiti “piprinsipe iti amin a daga”?
◻ Ania a makapatignay-kararua a kapadasan ti lak-amenyonto inton maaramiden ti panagungar?
◻ Ania a masanguanan ti agur-uray kadagidiay agtalinaed iti di maisin a debosion ken Jehova?