TAKIAG

Maysa a ballawas ti bagi ti tao. Dagiti Hebreo ken Griego a termino maipaay iti “takiag” (zerohʹaʽ; bra·khiʹon) ket masansan a naaramat iti Biblia iti piguratibo a pamay-an kas mangirepresentar iti pannakabael a mangaramat iti pigsa wenno bileg. (Ge 49:24, Rbi8 ftn; Job 22:8, Rbi8 ftn; idiligyo ti Lu 1:51.) Di matukod ti pannakabalin ti “takiag” ni Jehova a Dios agsipud ta kabaelanna ti mangaramid iti nakaskasdaaw a parparsua. (Jer 27:5; 32:17) Babaen met iti “takiag” ni Jehova, isu agturay (Isa 40:10; Eze 20:33), isalakanna dagidiay maparparigatan (Sal 44:3; Isa 52:10), ispalenna ti ilina (Ex 6:6; Isa 63:12; Ara 13:17), saranayenna ken aywananna ida (De 33:27; Isa 40:11; Os 11:3), mangukom (Isa 51:5), ken iwarawarana dagiti kabusorna (Sal 89:10; Lu 1:51). Ti panangtukkol iti takiag ket iladawanna ti panangparmek iti bileg ti sabali. (Job 38:15; Sal 10:15; Jer 48:25) Iparangarang ni Jehova ti bilegna nga inrepresentar ti ‘takiagna,’ ni Jesu-Kristo, a nakawesan iti autoridad ken pannakabalin ken agtigtignay kas Ukom ken Manangdusa.​—Isa 53:1; Jn 12:37, 38.

Ti takiag a lasag, a mangirepresentar iti natauan a pannakabalin, ket nadeskribir iti Biblia kas di mapagtalkan ken mapaay daydiay agtalek iti dayta. Impakdaar ni Jehova iti ilina a makaallilaw ken mangibunga iti didigra ti panagtalek iti takiag ti tao. (2Cr 32:8; Jer 17:5) Tukkolennanto ti takiag ti nadangkes, a nadeskribir a mangirurumen a naiparabaw kadagiti biktimada.​—Job 35:9; 38:15; Sal 10:15.

Dagiti barukong ken takiag a pirak iti ladawan a natagtagainep ni Ari Nabucodonosor ket irepresentarda ti kabilgan idi a turay ti lubong nga isu ti Medo-Persia, ti pagarian a simmaruno iti Babilonia (ti ulo a balitok).​—Da 2:32, 39.