“Asino ti Nangikabil iti Sirib Kadagiti Ulep”?
“NO MAKITAYO ti maysa nga ulep a tumtumpuar kadagiti makinlaud a paset, dagus a kunaenyo, ‘Um-umay ti maysa a bagyo,’ ket agbanag a kasta. Ket no agpuypuyupoy ti angin nga abagat, kunaenyo, ‘Addanto nakaro a pudot,’ ket mapasamak dayta.” Dagitoy a sasao ni Jesus nga insurat ni Lucas a mannurat iti Ebanghelio ket pagarigan dagiti pakpakauna ti paniempo idi panawen ti nagkauna a Palestina. (Lucas 12:54, 55) Kadagiti dadduma a sirkumstansia, nabaelanda idi ugma a basaen dagiti pagilasinan ket siuumiso a maibagada dagiti mapasamak iti pangasitgen a tiempo.
Itatta, komplikado dagiti instrumento nga us-usaren dagiti meteorologo, kas kadagiti satellite nga agrikrikus iti tangatang, Doppler radar, ken dagiti kabaruan a kompiuter, tapno marukodda dagiti padron ti paniempo a mapasungad iti naun-unday a panawen. Ngem kadarato pumalso dagiti pakpakaunada. Apay?
Adu dagiti makagapu a narigat nga ipakauna a siuumiso ti paniempo. Kas pagarigan, mabalin a dagiti di mapakadaan a panagbalbaliw ti temperatura, kinadagaang, kapigsa ti angin, ken kinapaspas ti angin ken ti turongna ti mamagrikut iti bambanag. Mainayon kadagitoy isu dagiti komplikado a panagnanaig ti init, ul-ulep, ken dagiti taaw, a di pay la matarusan a naan-anay dagiti sientipiko. Gapu iti dayta, agtalinaed a di eksakto a siensia ti panangipadto iti paniempo.
Ti limitado a pannakaammo ti tao maipapan iti paniempo ipalagipna kadatayo dagiti naisaludsod ken Job: “Asino ti nangputot kadagiti tedted ti linnaaw? Asino ti akintian ti rinuaran ti yelo? . . . Maingatom aya ta timekmo kadagiti ulep, tapno ti kinaadu dagiti danum maabbongandaka koma? . . . Asino ti nangikabil iti sirib kadagiti akin-uneg a paset [“ulep,” NW]? Wenno asino ti nangted ti pannakaawat iti isip [“kinadatdatlag ti tangatang,” NW]? Asino ti makabilang kadagiti ul-ulep gapu iti sirib? Wenno asino ti makaibukbok kadagiti botelia ti langit?”—Job 38:28-37.
Ti sungbat amin kadagitoy a saludsod ket, Saan a ti tao no di ni Jehova a Dios. Wen, uray kasanot’ kinasirib dagiti tattao, natantan-ok nga amang ti sirib ti Namarsua kadatayo. Talaga a kinamanagayat iti biangna nga intedna ti siribna kadatayo baeten kadagiti binulong ti Biblia, tapno agballigitayo iti aniaman nga aramidtayo.—Proverbio 5:1, 2.