Umuna, tinubngar ni Jehova da Elifaz, Bildad, ken Sofar. Iti pannakisaritana ken Elifaz, a nabatad nga inaunaan, kinunana: “Ti ungetko bumara a maibusor kenka, ken iti dua a gayyemmo; ta dikay insao ti pudno maipapan kaniak, kas insao ni adipenko a Job. Ita ngarud mangalakayo iti pito a baka, ken pito a karnero, ket inkayo ken adipenko a Job, ket idatagyo gapu kadakayo ti daton a mapuoran; ket ni adipenko a Job ikararagannakayonto.” (Job 42:7, 8, NW) Panunotenyo no ania ti ipamatmat daytoy!

Kinalikaguman ni Jehova a mangidatag da Elifaz, Bildad, ken Sofar iti adu a daton, nalabit tapno ipabigbigna kadakuada ti kinadagsen ti basolda. Kinapudnona, inggagara man wenno di inggagara, tinabbaawanda ti Dios babaen ti panagkunada nga ‘awan ti panagtalekna kadagiti adipenna’ ket awan aniamanna kenkuana no matalek wenno saan ni Job. Kinuna pay ni Elifaz nga iti imatang ti Dios saan a napateg ni Job a kas iti simotsimot! (Job 4:18, 19; 22:2, 3) Di pakasdaawan a kinuna ni Jehova: “Dikayo insao ti pudno maipapan kaniak”!

Ngem saan la a dayta. Personal met a nakabasol da Elifaz, Bildad ken Sofar ken Job babaen ti panangibagada kenkuana nga isu a mismo ti nakaigapuan dagiti parikutna. Dagiti awan nakaibatayanna a pammabasolda pinagsakitda ti nakem ken pinagleddaangda ni Job, isut’ gapuna nga inyasugna: “Kasano kapaut ti panangpaungetyo iti kararuak, ken panangdudugyo kaniak kadagiti sasao?” (Job 10:1; 19:2) Panunotenyo dagiti napabainan a langa dagitoy tallo a lallaki bayat nga idatagda itan ken Job ti datonda a maigapu kadagiti basolda!

Ngem saan a pagragsakan ni Job ti pannakaibabainda. Kinapudnona, kinalikaguman ni Jehova nga ikararaganna dagiti nangakusar kenkuana. Inaramid ni Job ti naibilin kenkuana, ket gapu iti daytoy nabendisionan. Umuna, inagasan ni Jehova ti nakaam-amak a sakitna. Kalpasanna, dagiti kakabsat ni Job a lallaki ken babbai ken dagiti kakaduana idi immayda a nangliwliwa kenkuana, ‘ket tunggal tao nangted kenkuana iti sangkapisi a kuarta, ken tunggal maysa ti maysa a singsing a balitok.’a Kasta met, ni Job “naaddaan iti sangapulo ket uppat a ribu a karkarnero, ken innem a ribu a kamkamelio, ken sangaribu a kasangolan a bakbaka, ken sangaribu nga as-asna.”b Ket nabatad a nagsubli ti asawa ni Job kenkuana. Idi agangay, naparaburan ni Job iti pito nga annak a lallaki ken tallo nga annak a babbai, ket nagbiag a nakakita kadagiti kaputotan dagiti annakna agingga iti maikapat a kaputotan.​—Job 42:10-17.

Sakbay a naisubli ti kinasalun-at ni Job, kinalikaguman ni Jehova nga ikararaganna dagidiay nakabasol kenkuana. Anian a nagsayaat a pagwadantayo! Kalikaguman ni Jehova a pakawanentayo dagidiay makabasol kadatayo sakbay a pakawanenna dagiti basoltayo. (Mateo 6:12; Efeso 4:32) No ditay situtulok a mangpakawan kadagiti sabsabali no adda nainkalintegan a pakaibatayan ti panangaramid iti kasta, siuumiso kadi a mainanamatayo a kaasiannatay ni Jehova?​—Mateo 18:21-35.