Pannagna Buyogen ti Nagkaysa a Puso

“Isuronak, O Jehova . . . Pagkaysaem ti pusok nga agbuteng iti naganmo.”​—SALMO 86:11.

1. Kasano a gunggonaan ni Jehova dagiti nasungdo kenkuana?

‘O JEHOVA, sika ti Dios, siksika laeng.’ (Salmo 86:8, 10) Indayaw ni David ti Dios manipud iti puso a napno iti panangapresiar. Uray idi sakbay a nagbalin ni David nga ari iti intero nga Israel, isut’ inispal ni Jehova manipud ken Saul ken kadagiti Filisteo. Isu a naikantana: “Ni Jehova isu ti batok ken ti sarikedkedko ken mangispal kaniak. Iti tao a nasungdo agtignayka iti kinasungdo.” (2 Samuel 22:2, 26) Intalimeng ni Jehova ti nasungdo nga adipenna kadagiti adu a suot. Nagtalek ni David iti nasungdo a Diosna, ngem kasapulanna ti agtultuloy a panangidalan. Dinawat ni David iti Dios: “Isurom kaniak ti dalanmo, O Jehova.”​—Salmo 86:11.

2. Kasano a nangaramid ni Jehova iti probision iti panangisurona kadatayo?

² Tinarigagayan ni David a liklikan a naan-anay dagiti nailubongan a kapanunotan wenno pilosopia. Tinarigagayanna ti ‘paisuro ken Jehova,’ kas inyebkas ti mammadto ti Dios idi agangay. (Isaias 54:13) Dagiti laeng siam a libro ti Biblia a magun-odan idi kaaldawanna ti mabalin a mennamennaen ni David. Kaskasdi, napateg kenkuana dayta nga instruksion a naggapu ken Jehova! Iti panagsursurotayo, mabalintay ita ti agpiesta iti amin nga 66 a libro ti Biblia, kasta met iti nawadwad a literatura ti Pagarian a maipapaay babaen ti “matalek ken naannad nga adipen.” (Mateo 24:45) Agdawattayo ken Jehova, kas ken David, tapno tulongannatayo ti espirituna a mangsukimat kadagiti “bambanag nga insagana ti Dios kadagiti agayat kenkuana, . . . uray dagiti nauneg a bambanag ti Dios.”​—1 Corinto 2:9, 10.

3. Kadagiti ania a pamay-an a magunggonaannatayo ti instruksion ti Biblia?

³ Addaan ti Biblia iti sungbat iti amin a saludsod ken parikut a mabalin a rumsua iti biagtayo. “Ta dagup dagiti immun-una a naisuraten, naisuratdan tapno pakasursuruantayo, tapno babaen ti panagibturtayo ken babaen ti liwliwa manipud iti Kasuratan maaddaantayo koma iti inanama.” (Roma 15:4) Ti panangadal ken panangtarus a naimbag iti instruksion ni Jehova papigsaennatayo a mangibtur kadagiti pakarigatan, liwliwaennatayo iti panawen ti leddaang, ken taginayonenna a naraniag ti namnama ti Pagarian kadagiti pusotayo. Pagragsakantay koma a basbasaen ti Sao ti Dios ken mennamennaen dayta iti “aldaw ken rabii,” ta ti naibatay-Biblia a sirib agbalin a “kayo ti biag kadagiti kumpet kenkuana, ket naragsak dagidiay mangsalimetmet kenkuana.”​—Salmo 1:1-3; Proverbio 3:13-18; kitaenyo met ti Juan 17:3.

4. No maipapan kadagiti tignaytayo, ania nga ulidan ti intuyang ni Jesus kadatayo?

⁴ Kanayon a nagpaisuro ken ni Jehova ti Anak ti Dios, ni Jesus, a naawagan met iti “Anak ni David.” (Mateo 9:27)a Kinunana: “Ti Anak saanna a mabalinan ti agaramid iti uray ania a bukbukodna, no di laeng ti makitana nga ar-aramiden ti Ama. Ta aniaman nga aramiden Dayta, dagitoy a bambanag ti aramiden met ti Anak iti isu met la a wagas.” “Awan ti aramidek a sisiak; no di ket sawek kas ti insuro kaniak ni Ama.” (Juan 5:19; 8:28) Nangibati ni Jesus iti pagwadan kadatayo ‘tapno surotentayo a naimbag dagiti addangna.’ (1 Pedro 2:21) Panunotenyo laengen! No agadaltayo a kas iti inaramid ni Jesus, iti aniaman a situasion makapagtignaytayto a kas iti kayat ni Jehova a panagtignaytayo. Kanayon nga umiso ti wagas ni Jehova.

5. Ania ti “kinapudno”?

⁵ Kalpasanna kunaen ni David: “Kayatko ti magna iti kinapudnom.” (Salmo 86:11) Sangaribo a tawen kamaudiananna, sinaludsod ni Pilato iti Anak ni David, ni Jesus: “Ania ti kinapudno?” Ngem kalkalpas a sinungbatan ni Jesus dayta a saludsod, a kunkunana ken Pilato: “Ti pagariak saan a paset toy lubong,” sana innayon: “Kunam nga ariak. Nayanakak gapu itoy, ken gapu itoy immayak ditoy lubong, tapno paneknekak ti kinapudno.” (Juan 18:33-38) Impakaammo no kasta ni Jesus a naisentro ti kinapudno iti Mesianiko a Pagarian. Wen, ti dagup a tema ti Biblia isu ti pannakasantipikar ti nagan ni Jehova babaen dayta a Pagarian.​—Ezequiel 38:23; Mateo 6:9, 10; Apocalipsis 11:15.

6. Iti pannagna iti kinapudno, aniat’ rumbeng a pagannadantayo?

⁶ Aniat’ kaipapanan ti pannagna iti kinapudno? Kaipapananna ti panamagbalin iti namnama ti Pagarian a kangrunaan a pakaseknan iti biagtayo. Masapul nga agbiagtayo a maitunos iti kinapudno ti Pagarian. Masapul a saantayo a nabingay iti panangiyun-una kadagiti intereses ti Pagarian, naregta no kadagiti gundawaytayo a mangpaneknek ti kinapudno ti Pagarian, a kas panangtulad iti ulidan ni Jesus. (Mateo 6:33; Juan 18:37) Ditay mabalin ti agpagnapagna iti kinapudno, a mangipapaay laeng iti pammarang a serbisio ngem ti bagitayo met ti pagpagustuantayo babaen ti panagbaw-ing kadagiti dalan a mangigamer iti aglablabes a panaglinglingay wenno mangibus-panawen a karera wenno panagbalin nga “adipen . . . ti Kinabaknang.” (Mateo 6:24) Mabalin a mayaw-awantayo, ket ditayton masurotan ti ‘akikid a dalan a mangiturong iti biag.’ Ditay koma sumiasi iti dayta a dalan! (Mateo 7:13, 14) Ti Naindaklan nga Instruktortayo, ni Jehova, babaen ti Sao ken organisasionna, lawaganna ti dalan, a kunkunana: “‘Isu daytoy ti dalan. Magnakayo kenkuana, dakayo a tattao,’ intono agbaw-ingkayo iti makanawan ken intono agbaw-ingkayo iti makatigid.”​—Isaias 30:21.

Umiso a Panagbuteng

7. Kasanotay a “mapagkaysa” ti pusotayo?

⁷ Kunaen pay ti kararag ni David iti Sal 86 bersikulo 11: “Pagkaysaem ti pusok nga agbuteng iti naganmo.” Kas ken David, kayattay a di nabingay, naan-anay ti pusotayo iti panangaramid iti pagayatan ti Dios. Maitunos daytoy iti pammagbaga ni Moises: “Ket ita, O Israel, ania ti kiddawen ni Jehova a Diosmo kenka no di la ti panagbuteng ken Jehova a Diosmo, ti pannagnam kadagiti amin a dalanna ken ti panagayatmo kenkuana ken ti panagserbim ken Jehova a Diosmo iti amin a pusom ken amin a kararuam; ti panangsalimetmet kadagiti bilin ni Jehova ken dagiti alagadenna nga ibilinko kenka ita nga aldaw, agpaay iti pagimbagam?” (Deuteronomio 10:12, 13) Pudno unay nga agpaay iti pagimbagantayo no agserbitayo ken Jehova iti amin a puso ken kararua. Iti kasta ipakpakitatayo ti umiso a panagbuteng iti natan-ok a naganna. Ti nagan ni Jehova literal a kaipapananna “Isut’ Mamagbalin,” nangruna mainaig iti pannakairingpas dagiti naindaklan a panggepna. Itakderan met dayta ti naan-anay a kinaturayna iti intero a sapasap. Iti panagserbi a buyogen ti panagbuteng iti kinatan-ok ti Dios, dinatay masinga ti panagbuteng iti mortal a tao. Dinto mabingay ti pusotayo. Imbes ketdi, mabutengtayo a mangaramid iti aniaman a mamagpungtot ken Jehova, ti Kangatuan nga Ukom ken Soberano nga Apo, a mangsalsaluad iti mismo a biagtayo.​—Isaias 12:2; 33:22.

8, 9. (a) Aniat’ kaipapanan ti panagbalin a “saan a paset ti lubong”? (b) Gapu ta datayo ket ‘‘bubuyaen,’’ aniada nga addang ti rumbeng nga alaentayo?

⁸ Uray iti sango ti pannakaumsi ken pannakaidadanes, surotentayo ti natured nga ulidan ni Jesus iti panagbalin a saan a paset ti dakes a lubong nga adda iti aglawlawtayo. (Juan 15:17-21) Di kayat a sawen daytoy nga agbiag a kas ermitanio wenno agpakni iti monasterio dagiti adalan ni Jesus. Kinuna ni Jesus iti kararagna iti Amana: “Diak dawaten nga ikkatem ida ditoy lubong, no di ket igagam koma ida gapu iti managdakdakes. Saanda a paset ti lubong, a kas kaniak a saanak a paset ti lubong. Pagsantuem ida babaen ti kinapudno; ti saom isu ti pudno. Kas imbaonnak ditoy lubong, imbaonko met ida ditoy lubong.” (Juan 17:15-18) Kas ken Jesus, naibaontayo a mangirakurak ti kinapudno ti Pagarian. Nalaka a maasitgan ni Jesus. Nabang-aran dagiti tao iti wagas ti panangisurona. (Idiligyo ti Mateo 7:28, 29; 11:28, 29; Juan 7:46.) Kasta met koma kadatayo.

⁹ Ti kinamannakigayyem, nadalimanek a panagkawkawes ken langa, naanus ken nadalus a panagsasaotayo, ti mamagbalin koma kadatayo ken ti mensahetayo a makaay-ayo kadagiti nalinteg-panagpuspusona a tattao. Masapul a liklikantayo ti kinaburara, naalas a panagkawkawes, dagiti pannakikadua a mangiturong kadagiti nailubongan nga aramid, ken ti napanuynoy, nalulok a wagas ti panagbiag a makitkitatayo iti lubong nga adda iti aglawlawtayo. Gapu ta “nagbalin[tayo] a bubuyaen ti lubong, dagiti anghel, ken dagiti tattao,” 24 oras iti tunggal aldaw nga agserbi ken agbiagtayo a kas mapagulidanan a Kristiano. (1 Corinto 4:9; Efeso 5:1-4; Filipos 4:8, 9; Colosas 4:5, 6) Gapuna, masapul a nagkaysa ti pusotayo.

10. Kasano a laglagipen ni Jehova dagidiay mamagkaysa ti pusoda iti sagrado a serbisio?

¹⁰ Datayo a mamagkaysa iti pusotayo nga agbuteng iti nagan ni Jehova, mangmennamenna kadagiti naindaklan a panggepna ken mangpunno iti biagtayo iti sagrado a serbisio, ti laglagipento ni Jehova. “No maipapan ken Jehova, agsursursor dagiti matana iti amin a daga tapno ipakitana ti pigsana maipaay kadagidiay a ti pusoda naan-anay kenkuana.” (2 Cronicas 16:9) Iti naimpadtuan a panangtukoyna iti kaaldawantayo, kunaen ti Malakias 3:16: “Iti dayta a tiempo dagiti agbuteng ken Jehova nagsaoda iti maysa ken maysa, tunggal maysa iti kaduana, ket ni Jehova nagimdeng ken nangipangag. Ket maysa a libro ti pakalaglagipan ti nangrugi a nasuratan agpaay kadagiti agbuteng ken Jehova ken kadagiti mangpampanunot iti naganna.” Nagkaysa koma ti pusotayo iti dayta nasalun-at a panagbuteng ken Jehova!

Ti Naayat a Kinamanangaasi ni Jehova

11. Kasano a maiyebkas ti naayat a kinamanangaasi ni Jehova kadagiti nasungdo?

¹¹ Nagpasnek ketdin ti kararag ni David! Ituloyna: “Idaydayawka, O Jehova a Diosko, iti amin a pusok, ket idaydayawko ti naganmo iti agnanayon, ta dakkel ti naayat a kinamanangaasim kaniak, ken inaonmo toy kararuak iti Sheol, ti kaunggan a dissona.” (Salmo 86:12, 13) Iti maikadua a gundaway iti daytoy a salmo, idaydayaw ni David ni Jehova gapu iti naayat a kinamangaasina​—ti nasungdo nga ayatna. Nagdakkel daytoy nga ayat ta makaisalakan kadagiti kasla imposible a situasion. Idi an-anupen ni Saul iti let-ang, mabalin a ti rikna ni David ket kasla agkarkaradap iti suli tapno matay. Kas ket tay adda iti kababaan a Sheol​—ti kaunggan ti tanem. Ngem inaon ni Jehova! Umasping iti dayta, masansan a binang-aran ni Jehova dagiti moderno-aldaw nga adipenna kadagiti nakaskasdaaw a pamay-an, ket sinaranayna met dagiti manangsalimetmet iti kinatarnaw a nagibtur a simamamatalek uray agingga ken patay. Magunggonaanto amin a nasungdo, uray babaen ti panagungar no kasapulan.​—Idiligyo ti Job 1:6-12; 2:1-6, 9, 10; 27:5; 42:10; Proverbio 27:11; Mateo 24:9, 13; Apocalipsis 2:10.b

12. Kasano a nagbalin a nakuspag ken naulpit dagiti klero, ket anianto ti gunggonada?

¹² Maipapan kadagiti manangidadanes, inyasug ni David: “O Dios, dagiti nakuspag bimmangonda a bumusor kaniak; ket ti bunggoy dagiti naulpit a tattao binirukda toy kararuak, ket saandaka nga insaad iti saklangda.” (Salmo 86:14) Itatta, karaman kadagiti manangidadanes dagiti klero ti Kakristianuan. Ipagarup dagitoy nga agdaydayawda iti Dios ngem sinuktanda met ti nasantuan a naganna iti titulo nga “Apo” ken isursuroda nga isut’ maysa a misterioso a Trinidad a kinapudnona saan a pulos a nadakamat idiay Biblia. Anian a kinakuspag! Santo maysa pay, ikagkagumaanda nga uyotan dagiti napolitikaan nga agtuturay a paritan ken ibalud dagiti Saksi ni Jehova, kas maar-aramid pay laeng iti adu a pagilian iti aglikmut ti daga. Apitento dagitoy nakaabito a managtabbaaw ti nagan ti Dios ti gunggonada, agraman amin a kasla balangkantis a benneg ti Babilonia a Dakkel.​—Apocalipsis 17:1, 2, 15-18; 19:1-3.

13. Aniada a galad ti ipakita ni Jehova iti panangipakaammona ti kinaimbagna?

¹³ Iti naragsak a panangisupadi, ituloy ti kararag ni David: “Ngem sika, O Jehova, ti Dios a manangngaasi ken managparabur, nainayad nga agpungtot, ken aglaplapusanan iti naayat a kinamanangaasi ken kinapudno.” (Salmo 86:15) Pudno a nakatantan-ok dagita a galad ti Diostayo. Isublinatayo dagitoy a sasao idiay Bantay Sinai idi dinawat ni Moises nga iparang ni Jehova ti dayagna. Insungbat ni Jehova: “Ipakitakto amin a kinaimbagko iti sangom ket ibunannagkonto ti nagan ni Jehova iti sangom.” Ngem binallaaganna ni Moises: “Dika mabalin a kitaen ti rupak, ta awan ti tao a makakita kaniak ket agbiag.” Kalpasanna, bimmaba ni Jehova iti ulep, a kunkunana: “Jehova, Jehova, Dios a manangngaasi ken managparabur, nainayad nga agpungtot, ken aglaplapusanan iti naayat a kinamanangaasi ken kinapudno.” (Exodo 33:18-20; 34:5, 6) Inadaw ni David dagitoy a sasao iti kararagna. Napatpateg nga amang dagita a galad ni Jehova kadatayo ngem ti aniaman a pisikal a langa! Manipud iti mismo a kapadasantayo, ditay kadi apresiaren ti kinaimbag ni Jehova kas naipakita kadagitoy nasudi a kualidad?

“Tanda ti Kinaimbag”

14, 15. Kasanot’ panangiparang ni Jehova iti “tanda ti kinaimbag” kadagiti adipenna?

¹⁴ Kiddawen manen ni David ti bendision ni Jehova, a kunkunana: “Tumaliawka kaniak ket kaasiannak. Itdem ta bilegmo itoy adipenmo, ket isalakanmo toy anak ti adipenmo a babai. Iparangannak iti tanda ti kinaimbag, tapno dagiti gumurgura kaniak makitada koma ket mabainanda. Ta sika, O Jehova, binadangannak ken liniwliwanak.” (Salmo 86:16, 17) Bigbigen ni David a kas ‘anak ti adipen a babai ni Jehova,’ isut’ kukua met ni Jehova. Kasta met kadatayo ita a nangidedikar ti biagtayo ken Jehova ken sipipinget nga agserserbi kenkuana. Kasapulantayo ti mangispal a pigsa ni Jehova babaen ti nasantuan nga espirituna. Gapuna, dawatentayo iti Diostayo nga iparangannatayo ti “tanda ti kinaimbag.” Ti kinaimbag ni Jehova saklawenna dagiti nasudi a galad a kasalsalaysaytayo. Maibatay itoy, ania a tanda, wenno pagilasinan, ti mabalintayo a namnamaen nga itden ni Jehova kadatayo?

¹⁵ Ni Jehova ti Manangted ti “isuamin a sagut a nasayaat ken isuamin a sagut a naan-anay” ken managparabur, kas ipanamnama ni Jesus kadatayo, iti pannangtedna iti “nasantuan nga espiritu kadagiti agdawat kenkuana.” (Santiago 1:17; Lucas 11:13) Nasantuan nga espiritu​—anian a di magatadan a sagut manipud ken Jehova! Babaen ti nasantuan nga espiritu, pagrag-oen ni Jehova ti puso, uray iti tiempo ti pannakaidadanes. Gapuna, nabalinan dagiti apostol ni Jesus, idi a maus-usigda, a sirarag-o a nangikuna nga itden ti Dios ti nasantuan nga espiritu kadagiti agtulnog kenkuana kas agturay. (Aramid 5:27-32) Ti rag-o ti nasantuan nga espiritu nagtultuloy a nangiparang kadakuada iti “tanda ti kinaimbag.”​—Roma 14:17, 18.

16, 17. (a) Ania a tanda ti kinaimbagna ti inted ni Jehova kada Pablo ken Bernabe? (b) Ania a tanda ti naited kadagiti naidadanes a taga Tesalonica?

¹⁶ Kabayatan ti panagdaliasatda kas misionero iti intero nga Asia Menor, napasaran da Pablo ken Bernabe dagiti pakarigatan, uray ti nakaro a pannakaidadanes. Idi nangasabada idiay Antioquia ti Pisidia, linaksid dagiti Judio ti mensaheda. Gapuna, napanda kadagiti tattao dagiti nasion. Aniat’ resultana? “Dagiti Gentil idi nangngegda daytoy, nagrag-oda ken indaydayawda ti sao ni Jehova, ket namati amin dagiti natudingan iti biag nga agnanayon.” Ngem nagarimbangaw dagiti Judio, ket pinagtalawda dagiti misionero iti dayta a pagilian. Naupayda aya ken dagiti baro a manamati gapu itoy? Saan pulos! Imbes ketdi, “dagiti adalan nagtultuloy a napnoda iti rag-o ken iti nasantuan nga espiritu.” (Aramid 13:48, 52) Inted ni Jehova kadakuada dayta a tanda ti kinaimbagna.

¹⁷ Idi agangay, naidadanes ti baro a kongregasion idiay Tesalonica. Isu a nangaramid ni apostol Pablo iti surat a pangliwliwa, a kinomendaranna ti panagibturda iti rigat. “Inawat[da] ti sao a nabuyogan ti adu a rigat agraman rag-o ti nasantuan nga espiritu.” (1 Tesalonica 1:6) Intultuloy ti “rag-o ti nasantuan nga espiritu” a pinapigsa ida kas nalawag a tanda a naggapu iti Dios a manangngaasi ken managparabur, nainayad nga agpungtot, ken aglaplapusanan iti naayat a kinamanangaasi ken kinapudno.

18. Kasano nga impakita dagiti kakabsattayo idiay Makindaya nga Europa ti panangapresiarda iti kinaimbag ni Jehova?

¹⁸ Kadagiti kallabes a tiempo, inyebkas ni Jehova ti kinaimbagna kadagiti matalek a kakabsattayo idiay Makindaya nga Europa, nga imbabainna dagidiay nanggura kadakuada​—dagiti nangidadanes idi kadakuada. Nupay nabiitda pay a naluk-atan iti pannakairurumen iti las-ud ti adu a dekada, masapul latta nga agibtur dagitoy nga ay-ayaten a kakabsat, ta adu ti naipasango kadagiti nakaro a rigat ti panagbiag. Nupay kasta, liwliwaen ida ti “rag-o ti nasantuan nga espiritu.” Ania pay a dakdakkel a rag-o ti adda kadakuada no di ti panangusar iti baro a wayawayada iti panangisaknap ti pammaneknek? Adu a tao ti mangipangpangag kadakuada, kas ipakita dagiti report kadagiti kumbension ken bautismo.​—Idiligyo ti Aramid 9:31.

19. Kasano a maipapusotayo dagiti sasao ti Salmo 86:11?

¹⁹ Amin a naisalaysay iti daytoy ken iti napalabas nga artikulo iyanninawda ti napasnek a kararag ni David ken Jehova: “Isuronak, O Jehova . . . Pagkaysaem ti pusok nga agbuteng iti naganmo.” (Salmo 86:11) Ipapusotayo koma dagita a sasao ti tekstotayo iti tawen 1993 bayat nga agtrabahotayo buyogen ti amin a puso iti panangsuportar kadagiti intereses ti Pagarian ken iti panangapresiar iti di maibus a kinaimbag ti maymaysa a Diostayo, ni Soberano nga Apo Jehova.

[Dagiti Footnote]

Kasanoyo a Sungbatan?

◻ Aniat’ ipamatmattayo no ikararagtayo, “Isuronak, O Jehova”?

◻ Aniat’ kayat a sawen ti panagbalin a nagkaysa ti pusotayo nga agbuteng iti nagan ni Jehova?

◻ Kasano nga ipakita ni Jehova ti naayat a kinamanangaasina kadagiti amin a nasungdo?

◻ Kasano nga iparangannatay ni Jehova iti “tanda ti kinaimbag?”

[Kahon iti panid 16]

Ti teksto ti tawen para iti 1993: “Isuronak, O Jehova . . . Pagkaysaem ti pusok nga agbuteng iti naganmo.”​—Salmo 86:11.

[Ladawan iti panid 15]

Maysa a bato ken sarikedked ni Jehova kadagidiay magna a nalinteg iti kinapudno

[Ladawan iti panid 18]

Iti “Dagiti Managawit iti Lawag” nga Internasional a Kumbension dagiti Saksi ni Jehova idiay St. Petersburg, Russia, idi Hunio, 46,214 ti timmabuno ken 3,256 ti nagbautisar. Anian a nakaskasdaaw ti pananggundaway dagitoy iti kinaimbag ni Jehova, agraman ti “rag-o ti nasantuan nga espiritu”!