No Kasano nga Aramiden a Nabunga ti Tunggal Aldaw
“IPAKITAM kadakami no kasano a bilangen dagiti aldawmi iti wagas a magun-odmi ti puso a masirib.” (Salmo 90:12) Dayta ti sipapakumbaba nga inkararag ni Moises a mannurat ti Biblia. Ania ti espesipiko a kidkiddawenna? Rumbeng kadi a mangaramidtayo met iti umasping a nadayaw a kiddaw?
Iti bersikulo 10, inyasug ni Moises ti maipapan iti kinaababa ti biag ti tao. Iti sabali nga okasion, inrekordna ti sasao ni Job, a nangikuna: “Ti tao, a nayanak manipud babai, ababa ti biagna ken namelmelan iti pannakariribuk.” (Job 14:1) Nalawag a pagaammo unay ni Moises ti kinaababa ti imperpekto a biag ti tao. Gapuna, minatmatanna ti tunggal aldaw kas nakapatpateg a sagut. Iti dayta a kiddawna iti Dios, inyebkas ni Moises ti tarigagayna a mangusar a nainsiriban kadagiti nabatbati nga aldawna, iti wagas a makaay-ayo iti Namarsua kenkuana. Saan kadi a rumbeng nga aramidentayo met a napnuan kaipapanan dagiti al-aldawtayo? Dayta ti determinado nga aramidentayo no kayattay a magun-od ti anamong ti Dios.
Adda ti kanayonan a banag a nakatignayan nga agpadpada da Moises ken Job, a rumbeng a pakatignayantayo met. Dagitoy a nadiosan a lallaki ninamnamada ti masanguanan a gunggona—biag ditoy daga iti sidong dagiti nasaysayaat a kasasaad. (Job 14:14, 15; Hebreo 11:26) Iti dayta a tiempo, awanton ni patay a mangguped iti nasayaat nga ar-aramid ti maysa a tao. Panggep ti Namarsua a dagiti matalek agbiagdanto nga agnanayon iti paraiso a daga. (Isaias 65:21-24; Apocalipsis 21:3, 4) Manamnamam met dayta no ‘bilangem dagiti aldawmo iti wagas a magun-odmo ti puso a masirib.’