Watchtower ONLINE A LIBRARIA
Watchtower
ONLINE A LIBRARIA
Iloko
  • BIBLIA
  • PUBLIKASION
  • GIMONG
  • Kasanotayo nga Agbalin a Nadalus iti Mata ti Dios?
    Agbiagka a Naragsak iti Agnanayon!—Leksion iti Biblia a Makatulong Kenka
    • Leksion 40. Lalaki a mangbugbuggo iti imana iti sabon ken danum.

      LEKSION 40

      Kasanotayo nga Agbalin a Nadalus iti Mata ti Dios?

      Imadyinem ti maysa a naayat nga ina a mangparparubbuat iti ubing pay nga anakna a mapan ageskuela. Siguraduenna a nakadigus ken nadalus ken naurnos ti badona. Napateg dayta tapno nasalun-at ti ubing ken makita ti dadduma nga ay-aywanan a naimbag dagiti nagannakna. Kasta met, kayat ti naayat nga Amatayo a ni Jehova a nadalustayo iti pisikal ken moral. Pagsayaatantayo no nadalustayo ken maidaydayawtayo ni Jehova.

      1. Kasanotayo nga agbalin a nadalus iti pisikal?

      Ibagbaga ni Jehova kadatayo: “Masapul nga agbalinkayo a nasantuan.” (1 Pedro 1:16) Tapno agbalintayo a nasantuan, masapul a nadalustayo iti moral ken pisikal. Tapno agbalintayo a nadalus iti pisikal, masapul a regular nga agdigustayo ken kanayon a nadalus ken naurnos ti bado, balay, ken lugantayo. Mabalintayo met a tumulong nga agdalus iti Kingdom Hall-tayo. No kanayon a nadalustayo iti pisikal, maidaydayawtayo ni Jehova.​—2 Corinto 6:3, 4.

      2. Tapno agbalintayo a nadalus, ania dagiti aramid a masapul a liklikantayo?

      Parparegtaennatayo ti Biblia a “dalusantayo . . . ti bagitayo iti amin a mangrugit iti lasag ken espiritu.” (2 Corinto 7:1) Isu a masapul a determinadotayo a mangliklik iti aniaman a mangrugit iti bagi ken panunottayo. Makaparagsak koma ken Jehova dagiti pampanunotentayo. Isu nga aramidentayo ti kabaelantayo a mangikkat iti narurugit a banag iti panunottayo. (Salmo 104:34) Masapul met nga ikagumaantayo a pagbalinen a nasayaat ti panagsasaotayo.​—Basaen ti Colosas 3:8.

      Ania pay dagiti mabalin a mangrugit kadatayo iti pisikal wenno moral? Adda dagiti substansia a mabalin a mangrugit iti bagitayo, kas iti sigarilio, mama, ken illegal a droga. Masapul a liklikantayo dagita. No aramidentayo dayta, nasalsalun-attayo ken maipakitatayo a resrespetuentayo ti regalo a biag. Ikagkagumaantayo met ti agbalin a nadalus iti moral no likliklikantayo dagiti narugit nga aramid kas iti masturbasion ken panagbuya iti pornograpia. (Salmo 119:37; Efeso 5:5) Mabalin a narigat nga isardeng dagita nga aramid, ngem matulongannatayo ni Jehova.​—Basaen ti Isaias 41:13.

      AMMUEM TI AD-ADU PAY

      Kitaem no kasanotayo a maidaydayaw ni Jehova no nadalustayo iti pisikal. Ken ammuem no kasanotayo a maisardeng dagiti narugit nga aramid.

      3. Maidaydayawtayo ni Jehova no nadalustayo iti pisikal

      No basaentayo dagiti linteg para iti nagkauna nga Israel, maammuantayo no kasano kapateg ken Jehova a nadalus dagiti agdaydayaw kenkuana. Basaen ti Exodo 19:10 ken 30:17-19, sa pagsaritaan dagitoy a saludsod:

      • Ania ti ipakita dagitoy a teksto maipapan iti panangkita ni Jehova iti pisikal a kinadalus?

      • Ania dagiti mabalinmo nga aramiden tapno kanayonka a nadalus iti pisikal?

      Kasapulan ti tiempo ken panagregget tapno agbalintayo a nadalus iti pisikal. Maaramidtayo dayta sadinoman ti paggigianantayo wenno aniaman ti kasasaad ti biagtayo. I-play ti VIDEO, sa pagsaritaan ti sumaruno a saludsod.

      VIDEO: Ay-ayaten ti Dios Dagiti Nadalus a Tattao (4:13)

      • Apay a nasayaat ti reaksion dagiti tattao iti panangasabatayo no nadalus ken naurnos dagiti gamittayo?

      4. Isardengmo dagiti dakes a bisio

      Tao a mangibelbelleng iti sigarilio iti basuraan.

      Matulongannatayo ni Jehova a mangisardeng iti aniaman a dakes nga aramid

      No agsigsigarilioka wenno agus-usarka iti makaadikto a droga, mabalin nga ammom no kasano karigat nga isardeng dayta. Ania ti makatulong? Panunotem ti epekto kenka dayta a bisio. Basaen ti Mateo 22:37-39, sa pagsaritaan no ania ti epekto ti panagsigarilio wenno panagusar iti makaadikto a droga iti . . .

      • pannakigayyem ti maysa ken Jehova.

      • pamiliana ken kadagiti tattao iti aglawlawna.

      Agplanoka tapno maisardengmo ti dakes a bisio.a I-play ti VIDEO.

      VIDEO: Ikagumaam ti Agteppel (2:47)

      Basaen ti Filipos 4:13, sa pagsaritaan daytoy a saludsod:

      • Kasano a makatulong ti regular a panagkararag, panagadal iti Biblia, ken pannakigimong tapno maisardeng ti maysa ti dakes a bisio?

      5. Labanam dagiti narugit a panagpampanunot ken ar-aramid

      Basaen ti Colosas 3:5, sa pagsaritaan dagitoy a saludsod:

      • Kasanotayo nga ammo a ti pornograpia, sexting, ken masturbasion ket ibilang ni Jehova a narugit?

      • Panagkunam, husto laeng kadi a namnamaen ni Jehova nga agbalintayo a nadalus iti moral? Apay?

      Ammuem no kasano a labanan ti narugit a panagpampanunot. I-play ti VIDEO.

      VIDEO: Aramidem ti Kasapulan Tapno Agbalinka a Nadalus (1:51)

      Nagusar ni Jesus iti ilustrasion a mangipakita a masapul a determinadotayo nga agtultuloy a nadalus iti moral. Basaen ti Mateo 5:29, 30, sa pagsaritaan daytoy a saludsod:

      • Saan nga ibagbaga ni Jesus a literal a saktantayo ti bagitayo, ngem ibagbagana nga adda masapul nga aramidentayo. Ania koma ti determinado nga aramiden ti maysa tapno maliklikanna dagiti narugit a panagpampanunot?b

      No ikagkagumaam a labanan ti narugit a panagpampanunot, laglagipem nga ipatpateg ni Jehova ti panagreggetmo. Basaen ti Salmo 103:13, 14, sa pagsaritaan daytoy a saludsod:

      • No marigatanka a mangisardeng iti maysa a narugit nga aramid, kasano a makatulong dayta a teksto tapno saanka a sumuko?

      Dika sumuksuko!

      Nalaka la a panunoten, ‘Naaramidko manen, diak talaga maisardeng.’ Ngem panunotem: No natumba ti maysa a tumataray, saanna a kayat a sawen a naabaken, wenno masapul nga agsubli ket mangrugi manen. Kasta met, no naaramidmo manen ti maysa a dakes nga aramid, dina kayat a sawen a saanmon a maisardeng dayta. Saan met a sayang dagiti naaramidamon. Normal laeng a mailaw-anka manen no dadduma. Ngem dika sumuksuko! Iti tulong ni Jehova, kayam nga isardeng ti dakes nga aramid.

      Lalaki iti lumba a tumaktakder kalpasan a natumba.

      KUNA TI DADDUMA: “Naadikakon. Diak maisardengen.”

      • Ania a teksto ti mabalinmo nga usaren tapno maipakitam kenkuana a kayana nga isardeng ti maysa a dakes nga aramid iti tulong ni Jehova?

      SUMARIO

      Maparagsaktayo ni Jehova no kanayon a nadalus ti bagi, panunot, ken ar-aramidtayo.

      Rebiu

      • Apay a nagpateg nga agbalintayo a nadalus?

      • Kasanoka nga agbalin a nadalus iti pisikal?

      • Ania ti aramidem tapno kanayon a nadalus ti pampanunot ken ar-aramidmo?

      Padasem Daytoy

      AGDISKOBREKA PAY

      Ania dagiti simple a banag a mabalinmo nga aramiden tapno agbalinka a nadalus iti pisikal uray narigat ti biagmo?

      Salun-at ken Kinadalus​—Panagbuggo iti Ima (3:01)

      Ammuem dagiti makatulong tapno maisardengmo ti agsigarilio.

      “No Kasano a Maisardeng ti Panagsigarilio” (Agriingkayo!, Mayo 2010)

      Ammuem dagiti epekto ti pornograpia.

      “Pornograpia​—Makadangran Wenno Saan?” (Ti Pagwanawanan, Agosto 1, 2013)

      Ammuem ti nakatulong iti maysa a lalaki tapno maisardengna ti agbuya iti pornograpia.

      “Namin-adu a Napaayak Sakbay a Nagballigiak” (Ti Pagwanawanan No. 4 2016)

      a Ilawlawag ti “No Kasano a Maisardeng ti Panagsigarilio” iti seksion nga Agdiskobreka Pay iti daytoy a leksion no ania dagiti makatulong tapno maisardeng dagiti bisio.

      b Tapno makitam ti makatulong iti maysa a mangisardeng iti masturbasion, kitaen ti “Kasanok a Maisardeng ti Masturbasion?” iti libro a Saludsod Dagiti Agtutubo​—Dagiti Sungbat nga Epektibo, Tomo 1, kapitulo 25.

  • Nakasaganaka Kadin nga Agpabautisar?
    Agbiagka a Naragsak iti Agnanayon!—Leksion iti Biblia a Makatulong Kenka
    • 3. Apay a saanmo koma nga ipalubos a lapdannaka ti buteng nga agpabautisar?

      Mabuteng ti dadduma a baka saanda a maaramid ti inkarida ken Jehova. Agpayso a no dadduma, agkamalitayo. Nagkamali met idi uray dagiti matalek a lallaki ken babbai a mabasa iti Biblia. Ngem saan a namnamaen ni Jehova a perpekto dagiti agdaydayaw kenkuana. (Basaen ti Salmo 103:13, 14.) Maragsakan no aramidem ti amin a kabaelam! Tulongannaka. Ipasigurado pay ketdi ni Jehova nga awan ti ‘makaisina [kadatayo] iti ayatna.’​—Basaen ti Roma 8:38, 39.

Dagiti Publikasion iti Iloko (1984-2025)
Ag-log out
Ag-log in
  • Iloko
  • I-share
  • Ti Kayatmo a Setting
  • Copyright © 2025 Watch Tower Bible and Tract Society of Pennsylvania
  • Pagannurotan iti Panagusar
  • Pagannurotan iti Kinapribado
  • Privacy Settings
  • JW.ORG
  • Ag-log in
I-share