SELA

1. [Heb., Sheʹlach, mabalin a kaipapananna ti Pika]. Anak ni Arpaksad ken apoko ni Sem, a naipasngay idi 2333 K.K.P. ken natay idi 1900 K.K.P., iti edad nga 433. Nagtaud kada Sela ken Eber nga anakna ti dua kadagiti 70 a pamilia kalpasan ti Layus; limmasat ken Eber ti linia ti kaputotan manipud ken Sem agingga ken Abraham ken kamaudiananna agingga ken Jesus.​—Ge 10:22, 24; 11:12-15; 1Cr 1:18, 24; Lu 3:35.

2. [Heb., She·lahʹ, mabalin a kaipapananna ti Dawat]. Ti maikatlo nga anak ni Juda babaen iti Canaanita nga asawana. (1Cr 2:3) Rebbeng koma a maited ken Sela ti ipagna a ni Tamar kas asawa ngem saan a napasamak dayta. (Ge 38:1-5, 11-14, 26) Nailista ti nagnagan ti sumagmamano kadagiti kaputotan ni Sela agraman ti luglugar a paggigiananda, a dagitoy ti nangbukel iti pamilia ti tribu dagiti Selanita. Sumagmamano kadagitoy ti nagsubli manipud pannakaidestiero idiay Babilonia.​—Nu 26:20; 1Cr 4:21-23; 9:5; Ne 11:5.

3. [Napasdok a Bato]. Maysa a lugar iti beddeng ti teritoria dagiti Amoreo kalpasan a tinagikua dagiti Israelita ti Naikari a Daga. (Uk 1:36) Saan nga ammo ita ti ayan dayta a disso. Kunaen ti dadduma a daytoy a Sela ket isu daydiay adda iti daga ti Edom (2Ar 14:7), ngem awan ti ebidensia a nagsaknap ti teritoria dagiti Amoreo a nagpaabagatan agingga iti rehion nga inturayan dagiti Edomita.

4. Maysa a kangrunaan a siudad ti Edom a kinautibo ni Amazias nga ari ti Juda sa pinagbalinna a Jocteel ti nagan dayta a siudad. (2Ar 14:7) Mabalin a ti Sela ti di nainaganan a “nasarikedkedan a siudad” a natukoy iti Salmo 108:10.

Kunaen ti dadduma a daytoy a siudad ket isu ti Umm el-Biyara, maysa a nabato nga acropolis nga adda iti agarup 100 km (60 mi) iti amianan nga amianan-a-daya ti makin-amianan a murdong ti Gulpo ti ʽAqaba. Daytoy a disso ket masarakan iti makinlaud a nagsulian ti tanap a nakaibangonan idi agangay ti Nabataeano a siudad ti Petra. Nasayaat ti pannakasalaknib daytoy a tanap gapu ta madanon laeng babaen iti akikid ken agsikkosikko a baw-ang ken napalikmutan iti panaraten a bato a rangrangkis. Dagiti makapasiddaaw a rebba ti Petra, agraman dagiti templo, tanem, ken pagnaedan a nataga manipud iti bato, ket saan a paset ti nagkauna a Sela a siudad dagiti Edomita. Iti kallabes a tiempo, inanamongan dagiti eskolar a ti Sela ket isu ti es-Selaʽ, agarup 4 km (2.5 mi) iti amianan nga amianan-a-laud ti Bozra.

5. Maysa a lugar a nadakamat iti pakdaar maibusor iti Moab. (Isa 15:1; 16:1) Di sigurado no dayta ti Num. 2.