Watchtower ONLINE A LIBRARIA
Watchtower
ONLINE A LIBRARIA
Iloko
  • BIBLIA
  • PUBLIKASION
  • GIMONG
  • w09 3/15 pp. 20-24
  • Maikari ni Jehova iti Nagkaykaysa a Panagdayawtayo

Awan video-na ti napilim.

Pasensiakan, adda problema iti pannakai-load ti video.

  • Maikari ni Jehova iti Nagkaykaysa a Panagdayawtayo
  • Ti Pagwanawanan Mangibumbunannag iti Pagarian ni Jehova—2009
  • Subtitulo
  • Umasping a Material
  • Dagiti Naindaklan nga Aramidna
  • Dagiti Naindaklan nga Aramid ken Galad ti Dios
  • Matalek Kadagiti Karina
  • Ti Makapaamanga a Pannakabalin ni Jehova
  • Dagiti Manayon ken Mapagpiaran a Prinsipio
  • Ti Nasantuan ken Nakaam-amak a Mannubbottayo
  • Ni Jehova Maikari iti Agnanayon a Dayaw
    Ti Pagwanawanan Mangibumbunannag iti Pagarian ni Jehova—1990
  • “Siasino ti kas ken Jehova a Diostayo?”
    Ti Pagwanawanan Mangibumbunannag iti Pagarian ni Jehova—1992
  • Ni Jehova ket Dios Dagiti Tulag
    Ti Pagwanawanan Mangibumbunannag iti Pagarian ni Jehova—1998
  • Dagiti Nasaysayaat a Bendision Babaen ti Baro a Tulag
    Ti Pagwanawanan Mangibumbunannag iti Pagarian ni Jehova—1998
Kitaen ti Ad-adu Pay
Ti Pagwanawanan Mangibumbunannag iti Pagarian ni Jehova—2009
w09 3/15 pp. 20-24

Maikari ni Jehova iti Nagkaykaysa a Panagdayawtayo

“Idaydayawyo ni Jah!”​—Sal. 111:1.

1, 2. Ania ti kaipapanan ti “Aleluya,” ken kasano a nausar dayta iti Kristiano a Griego a Kasuratan?

“ALELUYA!” Dayta a dir-i ket gagangay a mangmangngegan kadagiti simbaan ti Kakristianuan. Masansan met a dakamaten dayta ti dadduma a tattao iti inaldaw a panagsasaritada. Ngem manmano ti makaammo iti sagrado a kaipapananna, ken mangibabain iti Dios ti estilo ti panagbiag ti adu a mangibagbaga iti dayta. (Tito 1:16) Sigun iti maysa a diksionario ti Biblia, ti “Aleluya” ket maysa a “sao nga inusar dagiti mannurat iti nadumaduma a salmo tapno awisenda ti amin a makikadua kadakuada a mangidaydayaw ken Jehova.” Kinapudnona, sigun iti adu nga eskolar iti Biblia, ti “Aleluya” kaipapananna ti “‘Dayawenyo ni Jah,’ [a tumuktukoy ken] Jehova.”

2 Dayta ti makagapu nga iti Baro a Lubong a Patarus, ti Aleluya a mabasa iti Salmo 111:1 ket naipatarus nga “Idaydayawyo ni Jah!” Ti Griego a katupag dayta ket mamimpat a mabasa iti Apocalipsis 19:1-6 iti pannakarambak ti panungpalan ti palso a relihion. Inton mapasamak dayta, adda naisangsangayan a rason dagiti agdaydayaw iti Dios tapno siraraem nga idir-ida ti “Aleluya.”

Dagiti Naindaklan nga Aramidna

3. Ania ti kangrunaan a panggep ti regular a panagtataripnongtayo?

3 Adu a rason ti imbinsabinsa ti nangputar iti Salmo 111 no apay a maikari unay ni Jehova iti nagkaykaysa a panagdayawtayo. Kuna ti bersikulo 1: “Idayawkonto ni Jehova buyogen ti isuamin a pusok iti nasinged a bunggoy dagidiay napalungdo ken iti gimong.” Kasta met ti rikna dagiti Saksi ni Jehova ita. Ti panangidaydayaw ken Jehova ti kangrunaan a panggep ti regular a panagtataripnongtayo kadagiti man lokal a kongregasion ken dadakkel a kombension.

4. Kasano a masukimat dagiti tattao ti ar-aramid ni Jehova?

4“Naindaklan ti ar-aramid ni Jehova, susukimaten dagidiay amin a maragragsakan kadakuada.” (Sal. 111:2) Imutektekanyo ti sao a “susukimaten.” Sigun iti maysa a reperensia, dayta a bersikulo ket mabalin a tumukoy kadagiti tattao a “sipapasnek ken naimpusuan a mangut-utob ken mangad-adal” kadagiti aramid ti Dios. Dagiti pinarsua ni Jehova ket aglaplapusanan iti nagsayaat a panggep. Insaadna ti init, daga, ken bulan iti masnup a lugarda. Agkakanaig amin dagita tapno makagun-od ti dagatayo iti bara ken lawag, ken tapno maadda ti aldaw, rabii, paniempo, panagatab, ken panagati.

5. Ania ti impalgak ti irarang-ay ti pannakaawat ti tao maipapan iti uniberso?

5 Nagadun ti natakuatan dagiti sientista maipapan iti posision ti dagatayo iti sistema solar agraman ti perpekto a panagrikus, rukod, ken kadagsen ti dakkel a bulantayo. Gapu iti urnos ken panagkakanaig dagita a bambanag iti law-ang, napintas ken regular ti panagbaliwbaliw dagiti paniempo. Nagadu metten ti naadaltayo maipapan kadagiti nakaur-urnos a natural a puersa ti uniberso. Gapuna, iti maysa nga artikulo a napauluan “Ti Uniberso a Nadisenio nga ‘Apagpag-isu,’” kinuna ti maysa a propesor ti mechanical engineering: “Naglaka a maawatan no apay a binalbaliwanen ti nagadu a sientista ti panunotda iti napalabas a 30 a tawen ta uman-anamongdan a kasapulan ti dakkel a pammati tapno patien a naiparna laeng ti itataud ti uniberso. Bayat nga umad-adu ti maawatantayo maipapan iti nagsayaat ti pannakadiseniona a planetatayo, umad-adu met ti panggapuantayo a mamati nga adda masirib a diseniador.”

6. Ania ti makunam maipapan iti panangparsua ti Dios iti tao?

6 Ti maysa pay a naindaklan a gapuanan iti panamarsua ket ti panangaramid ti Dios kadatayo. (Sal. 139:14) Idi pinarsuanatayo, inikkannatayo iti isip, bagi a kompleto kadagiti agkakapateg a paset, agraman iti abilidad ken kapasidad nga agtrabaho. Kas pagarigan, adda met ti milagro a nainaig kadagiti inted-Dios nga abilidadtayo nga agsao, dumngeg, agsurat ken agbasa. Adu a tattao ti addaan kadagita nga abilidad. Ti bagim a makapagtakder a sililinteg ket nakaskasdaaw met nga obra maestra iti konstruksion. Ti disenio ken kinabalanse ti bagim, dagiti abilidad ti bagim nga aggunay ken agtrabaho, ken dagiti kemikal a prosesona kas iti panangpataudna iti enerhia manipud iti taraon​—amin dagita ket talaga a makapaamanga. Malaksid pay kadagita, awan kaimudingan dagiti naaramidanen ti adu a sientista no idilig kadagiti nakaskasdaaw ti panagkakanaigda nga urat a makatulong iti panagandar ti isipmo ken dagiti sentidom. Kinapudnona, no awan ti sentido ken isip a naited kadagiti tattao, awan koma ti aniaman a magapuananda. Uray ti kalaingan nga inheniero ket di pay nakaaramid iti aniaman a kas iti kapintas ken kasigo dagiti sangapulo a ramaymo a nakaskasdaaw ti pannakadiseniona. Isaludsodmo iti bagim, ‘Naaramid ngata dagiti nakaskasdaaw nga obra maestra iti arte ken konstruksion no saan a gapu iti nasigo a pannakausar dagiti ramay nga impaay ti Dios?’

Dagiti Naindaklan nga Aramid ken Galad ti Dios

7. Apay a rumbeng nga ibilangtayo ti Biblia kas maysa kadagiti naindaklan nga aramid ti Dios?

7 Karaman kadagiti naindaklan nga aramid ni Jehova ti dadduma pay a nakaskasdaaw nga inaramidna para iti sangatauan, kas nailanad iti Biblia. Dayta a libro a mismo ket naisangsangayan ti panagtutunos dagiti linaonna. Saan a kas iti aniaman a libro, dayta ket talaga nga “impaltiing ti Dios ken makagunggona iti panangisuro.” (2 Tim. 3:16) Kas pagarigan, ti Genesis nga umuna a libro iti Biblia ilawlawagna no kasano a ti Dios pinukawna ti kinadakes ditoy daga idi kaaldawan ni Noe. Ti Exodo a maikadua a libro ipakitana no kasano nga inalangon ni Jehova ti Kinadiosna babaen ti panangisalakanna iti Israel manipud iti panangadipen ti Egipto. Nalabit a dagita ti pampanunoten ti salmista idi naikunana: “Ti aramid [ni Jehova] ket dayaw ken kinangayed a mismo, ket ti kinalintegna agtalinaed iti agnanayon. Isu nangaramid iti pakalaglagipan maipaay iti nakaskasdaaw nga ar-aramidna. Ni Jehova managparabur ken naasi.” (Sal. 111:3, 4) Dika kadi umanamong a dagiti aramid ni Jehova iti intero a pakasaritaan ti tao, agraman dagiti naaramidnan iti unos ti panagbiagmo, ket maysa a pakalaglagipan iti ‘dayaw ken kinangayedna’?

8, 9. (a) Kadagiti ania a wagas a naiduma unay dagiti aramid ti Dios no idilig iti adu nga aramid ti tattao? (b) Ania ti dadduma kadagiti galad ti Dios nga apresiarem?

8 Imutektekanyo ta impaganetget met ti salmista dagiti makaay-ayo a galad ni Jehova kas iti kinalinteg, kinaparabur, ken asi. Ammoyo a dagiti aramid ti managbasol a sangatauan ket manmano a naibasar iti kinalinteg. Masansan a naibasar dagita iti kinaagum, apal, ken kinapangas. Agminar dayta kadagiti makapapatay nga igam a pinartuat ti tattao para kadagiti gubat nga iparparegtada ken tapno laeng makaganansiada iti dakkel. Dagita ti mangpatpataud iti nakaro a panagsagaba ken panagaligaget ti minilion nga inosente a biktima. Adu met nga aramid ti tattao ti nagresulta iti panagsagaba ken pannakairurumen dagiti nakurapay. Ti maysa a nalabit dakamaten ti adu ket ti pannakausar idi dagiti tagabo tapno maibangon dagiti piramid a naaramid kangrunaanna kas pagitaneman kadagiti napalangguad a Faraon. Kanayonanna, saan la a mangirurumen no di pay ket “mangdaddadael iti daga” ti adu kadagiti gapuanan ita ti tattao.​—Basaen ti Apocalipsis 11:18.

9 Anian a naiduma dagiti aramid ni Jehova a kanayon a naibasar iti kinalinteg! Karaman kadagiti aramidna ti naasi nga urnos para iti pannakaisalakan ti managbasol a sangatauan. Babaen ti panangipaay ti Dios iti subbot, ‘impakitana ti bukodna a kinalinteg.’ (Roma 3:25, 26) Wen, “ti kinalintegna agtalinaed iti agnanayon”! No maipapan iti kinaparabur, maiparparangarang dayta babaen iti naanus a pannakilangen ti Dios kadagiti managbasol a tattao. Adda pay ketdi dagiti kanito a nagusar iti sao a “pangngaasim” idi idagdagadagna nga aturenda dagiti dakes nga aramidda ken aramidenda ti umiso.​—Basaen ti Ezequiel 18:25.

Matalek Kadagiti Karina

10. Kasano nga impakita ni Jehova ti kinamatalekna no maipapan iti tulagna ken Abraham?

10 “Nangted iti taraon kadagidiay agbuteng kenkuana. Agingga iti tiempo a di nakedngan lagipennanto ti tulagna.” (Sal. 111:5) Agparang a ti tulag ken Abraham ti tuktukoyen ditoy ti salmista. Inkari ni Jehova a bendisionanna ti bin-i ni Abraham ken imbagana a tagikuaenda ti ruangan dagiti kabusorda. (Gen. 22:17, 18; Sal. 105:8, 9) Ti damo a kaitungpalan dagita a kari ket idi nagbalin a nasion ti Israel ti bin-i ni Abraham. Dayta a nasion ket nabayag a naadipen idiay Egipto, ngem ‘linagip ti Dios ti tulagna ken Abraham,’ isu nga insalakanna ida. (Ex. 2:24) Ibatad dagiti simmaruno a pannakilangen ni Jehova kadakuada ti kasta unay a kinaparaburna. Impaayanna ida iti pisikal a taraon para iti bagida ken naespirituan a taraon para iti isip ken pusoda. (Deut. 6:1-3; 8:4; Neh. 9:21) Kadagiti simmaruno a siglo, ti Israel ket masansan a timmallikud iti Dios, nupay nangibaon kadagiti propeta a mangidagadag nga agsublida kenkuana. Nasurok a 1,500 a tawen kalpasan nga insalakanna dagiti Israelita manipud Egipto, ti Dios imbaonna ti bugbugtong nga Anakna ditoy daga. Ti kaaduan kadagiti Judio linaksid ken intulokda a mapapatay ni Jesus. Kalpasan dayta, nangbuangay ni Jehova iti baro a nasion, maysa a naespirituan a nasion nga isu ti “Israel ti Dios.” Dayta a nasion, agraman ni Kristo, ti mangbukel iti naespirituan a bin-i ni Abraham, nga impakpakauna ni Jehova nga usarenna a mangbendision iti sangatauan.​—Gal. 3:16, 29; 6:16.

11. Ania ti mangipakita a ni Jehova ket kanayon a ‘silalagip iti tulagna’ ken Abraham?

11 Ni Jehova kanayon a ‘silalagip iti tulagna’ ken kadagiti bendision nga inkarina baeten dayta. Mangipapaay ita iti aglaplapusanan a naespirituan a taraon iti nasurok nga 400 a lenguahe. Kasta met nga itultuloyna a sungbatan dagiti kararag maipapan kadagiti pisikal a kasapulantayo a maitunos kadagitoy a sasao: “Itedmo kadakami ti tinapaymi maipaay iti daytoy nga aldaw sigun ti kasapulan iti daytoy aldaw.”​—Luc. 11:3; Sal. 72:16, 17; Isa. 25:6-8.

Ti Makapaamanga a Pannakabalin ni Jehova

12. Kasano a naipaay iti nagkauna nga Israel “ti tawid dagiti nasion”?

12 “Ti pannakabalin ti ar-aramidna imbagana iti ilina, iti panangted kadakuada ti tawid dagiti nasion.” (Sal. 111:6) Ti maysa a naisangsangayan a pasamak iti pakasaritaan ti Israel a nalabit pampanunoten idi ti salmista ket ti namilagruan a pannakaispalda manipud Egipto. Idi impalubosen ni Jehova a makastrek dagiti Israelita iti Naikari a Daga, naparmekda ti pagpagarian iti daya ken laud ti Karayan Jordan. (Basaen ti Nehemias 9:22-25.) Wen, impaay ni Jehova iti Israel “ti tawid dagiti nasion.” Anian a pammaneknek iti pannakabalin ti Dios!

13, 14. (a) No maipapan iti Babilonia, ania a pannakaiparangarang ti bileg ti Dios ti nalabit pampanunoten idi ti salmista? (b) Ania pay dagiti mas naisangsangayan a panangisalakan nga inaramiden ni Jehova?

13 Ngem pagaammotayo nga iti laksid dagiti amin nga inaramid ni Jehova agpaay kadakuada, saan nga impakita ti Israel ti panagraem kenkuana wenno kadagiti ammada a da Abraham, Isaac, ken Jacob. Maulit-ulit a simmukirda agingga a ti Dios inusarna ti Babilonia a mangipanaw ken mangidestiero kadakuada. (2 Cron. 36:15-17; Neh. 9:28-30) No ti nangputar iti Salmo 111 ket nagbiag kalpasan ti panagsubli ti Israel manipud pannakaidestieroda idiay Babilonia, kas iti ibagbaga ti dadduma nga eskolar ti Biblia, ad-adu manen ti panggapuanna a mangidayaw ken Jehova gapu ta nasungdo ken nabileg a Dios. Impakita ti Dios dayta idi inispalna dagiti Judio manipud Babilonia​—maysa nga imperio a paglinteganna ti di mangwayawaya kadagiti kautibona.​—Isa. 14:4, 17.

14 Agarup lima a siglo kalpasanna, inusar ni Jehova ti bilegna iti mas naisangsangayan a wagas babaen ti panangisalakanna kadagiti agbabbabawi a tattao manipud pannakaadipenda iti basol ken ipapatay. (Roma 5:12) Ti maysa nga imbunga dayta ket naluktan ti gundaway iti 144,000 a tattao nga agbalin a napulotan iti espiritu a paspasurot ni Kristo. Idi 1919, inusar ni Jehova ti bilegna a mangispal iti bassit a natda kadagitoy a napulotan manipud pannakakautiboda iti palso a relihion. Dagiti nagapuananda bayat ti tiempo ti panungpalan ket maigapu laeng iti bileg ti Dios. No agtultuloyda a matalek agingga ken patay, kaduadanto ni Jesu-Kristo idiay langit a mangituray iti daga tapno magunggonaan dagiti agbabbabawi a tattao. (Apoc. 2:26, 27; 5:9, 10) Nalawlawa nga amang ti tawidenda iti daga ngem iti tinawid ti nagkauna nga Israel.​—Mat. 5:5.

Dagiti Manayon ken Mapagpiaran a Prinsipio

15, 16. (a) Ania ti karaman iti ar-aramid dagiti ima ti Dios? (b) Aniada a pagannurotan ti inted ti Dios iti nagkauna nga Israel?

15 “Ti ar-aramid dagiti imana ket kinapudno ken panangukom; mapagpiaran amin dagiti bilin nga itedna, naimbag ti pannakapasingkedna iti agnanayon, agingga iti tiempo a di nakedngan, naaramid iti kinapudno ken kinapalungdo.” (Sal. 111:7, 8) Karaman kadagiti “ar-aramid dagiti ima [ni Jehova]” ti dua a tapi ti bato a nangisuratanna iti 10 a napateg a bilin iti Israel. (Ex. 31:18) Dagita a linteg agraman ti amin a dadduma pay a pagannurotan a nagbalin a paset ti tulag ti Mosaiko a Linteg ket naibasar kadagiti manayon ken mapagpiaran a prinsipio.

16 Kas pagarigan, kastoy ti sagudayen ti maysa kadagiti pagannurotan wenno linteg kadagita a tapi: “Siak ni Jehova a Diosmo maysaak a Dios a mangalkalikagum iti naipamaysa a debosion.” Kunana pay a ni Jehova ket mangipakpakita iti “naayat a kinamanangngaasi maipaay iti maikasangaribu a kaputotan no kadagidiay agayat [kenkuana] ken mangsalimetmet kadagiti bilin[na].” Naglaon met dagita a tapi kadagiti manayon a prinsipio a kas iti “dayawem ni amam ken ni inam” ken “dika agtakaw,” agraman ti nainsiriban unay a linteg a mangiparit iti panangagum iti kukua ti sabsabali.​—Ex. 20:5, 6, 12, 15, 17.

Ti Nasantuan ken Nakaam-amak a Mannubbottayo

17. Ania dagiti panggapuan koma ti Israel tapno dida tabbaawan ti nasantuan a nagan ti Dios?

17 “Nangibaon iti mismo a pannubbot iti ilina. Agingga iti tiempo a di nakedngan imbilinna ti tulagna. Ti naganna nasantuan ken nakaam-amak.” (Sal. 111:9) Mabalin a ti kinasungdo ni Jehova iti tulag nga inkarina ken Abraham ti pampanunoten manen ti salmista. Maitunos iti dayta, saan a binaybay-an ni Jehova ti ilina idi damo kas adipen iti nagkauna nga Egipto ken idi agangay kas kautibo idiay Babilonia. Agpadpada a kadagita a kasasaad, sinubbot ti Dios ti ilina. Immanay koman a panggapuan ti Israel dagita a dua a pannakaispalda tapno dida tabbaawan ti nasantuan a nagan ti Dios.​—Basaen ti Exodo 20:7; Roma 2:23, 24.

18. Apay nga ibilangmo a pribilehio ti maawagan iti Saksi ni Jehova?

18 Pudno met dayta kadagiti Kristiano ita. Nailunodda idi iti pannakaadipen iti basol ken ipapatay ngem nasubbotdan manipud iti kasta a kinaawan namnama. Masapul nga ikagumaantayo ti agbiag a maitunos iti umuna a kiddaw iti pagtuladan a kararag: “Masantipikar koma ti naganmo.” (Mat. 6:9) Ti panangutob iti dayta a nadayag a nagan ti mangipasagepsep koma kadatayo iti nadiosan a panagbuteng. Ti nangisurat iti Salmo 111 ket addaan iti umiso a panangmatmat iti nadiosan a panagbuteng ta kinunana: “Ti panagbuteng ken Jehova isu ti punganay ti sirib. Amin dagidiay mangar-aramid kadakuada [mangtungtungpal kadagiti bilinna] addaanda iti naimbag a pannakatarus.”​—Sal. 111:10.

19. Ania ti usigentayo iti sumaganad nga artikulo?

19 Ti umno a panagbuteng iti Dios tulongannatayo a manggura iti dakes ken mangtulad kadagiti makaay-ayo a galad ti Dios kas naibinsabinsa iti Salmo 112, nga usigentayo iti sumaganad nga artikulo. Ipakita dayta a salmo no kasanotay a makualipikar nga agbalin a paset ti minilion nga agdaydayaw iti Dios iti agnanayon. Talaga a maikari ni Jehova iti kasta a panagdayaw. “Ti pannakaidaydayawna agtalinaed iti agnanayon.”​—Sal. 111:10.

Mamagpanunot a Salsaludsod

• Apay a maikari ni Jehova iti nagkaykaysa a panagdayawtayo?

• Aniada a galad ni Jehova ti nabatad kadagiti aramidna?

• Apay nga ibilangmo a pribilehio ti maawagan iti Saksi ni Jehova?

[Ladawan iti panid 20]

Ti kangrunaan a panggep ti regular a panagtataripnongtayo ket tapno maidaydayaw ni Jehova

[Ladawan iti panid 23]

Amin a linteg ni Jehova ket naibasar kadagiti manayon ken mapagpiaran a prinsipio

    Dagiti Publikasion iti Iloko (1984-2025)
    Ag-log out
    Ag-log in
    • Iloko
    • I-share
    • Ti Kayatmo a Setting
    • Copyright © 2025 Watch Tower Bible and Tract Society of Pennsylvania
    • Pagannurotan iti Panagusar
    • Pagannurotan iti Kinapribado
    • Privacy Settings
    • JW.ORG
    • Ag-log in
    I-share