Silaw a Mangidalan Kadakayo iti Dana ti Biag

“O JEHOVA, ammok a ti dalan ti tao saan nga agtaud kenkuana met laeng; saan nga agtaud iti tao a magna ti panangiturong kadagiti addangna.” (Jeremias 10:23) Babaen kadagitoy a sasao impakita ni propeta Jeremias a saan a makapagbiag a sibaballigi dagiti tao no awan tulong. Sadino ti pakasarakan iti kasta a tulong? Kastoy ti sungbat ti salmista iti kararagna ken Jehova a Dios: “Ti saom pagsilawan kadagiti saksakak, ket silaw iti danak.”​—Salmo 119:105.

Dagidiay agad-adal iti Sao ti Dios, ti Nasantuan a Biblia, ken mangyap-aplikar iti ibagbagana mayasping iti maysa a tao a rugianna ti agdaliasat iti parbangon. Iti damo, awan unay makitana gapu ta nasipnget. Ngem no lumgaken ti init, lumawag a lumawag ti makitana. Kamaudiananna, nakatangkayagen ti init. Silalawag a makitana ti amin a detalye. Ti kasta nga ilustrasion ipalagipna ti maysa a proverbio iti Biblia: “Ti dana ti nalinteg kas iti anaraar ti agsapa, a rumaniag a rumaniag agingga iti napaypayso nga aldaw.”​—Proverbio 4:18.

Dagidiay ngay madi nga agpaidalan iti Dios? Kuna ti Biblia: “Ti dalan ti nadangkes kas iti kinasipnget: dida ammo no ania ti pakaitibkolanda.” (Proverbio 4:19) Wen, ti nadangkes mayasping iti tao a maitibkol iti sipnget. Uray dagiti kasla balligida ket apagbiit laeng, gapu ta “awan ti kinasirib wenno pannakaawat wenno patigmaan a maikaniwas ken ni Jehova.”​—Proverbio 21:30.

Gapuna, agpaidalankayo iti Sao ti Dios, ti Biblia. No aramidenyo dayta, masarakanyo a pudno ti sasao ti Proverbio 3:5, 6: “Agtalekka ken ni Jehova iti amin a pusom, ket dika agtalged iti pannakaawatmo met laeng. Kadagiti amin a dalanmo isu ti bigbigem, ket isu iturongnanto dagiti desdesmo.”