Ti Panangmatmat ti Biblia

Dagiti Kristiano Rumbeng Kadi a Guraenda Dagiti Homoseksual?

IDI 1969 maysa a sao a mangdeskribir iti di nainkalintegan a panagamak wenno pananggura kadagiti homoseksual ti naparnuay iti Ingles a pagsasao. Ti sao ket “homophobia.” Adu a pagsasao ti awanan iti kasta nga espesipiko a sao, nupay kasta iti rinibu a tawen, impakitan dagiti tattao iti adu a nasion ken pagsasao ti pananggurada kadagiti homoseksual.

Ngem kadagiti kallabes a tawen, sisasaknap a naitandudo ti homoseksualidad kas sabali laeng a panangiparangarang iti sekso. Nabiit pay nga insurat ni historiador Jerry Z. Muller ti “pumingpinget a panagkiddaw iti panangbigbig ti publiko ken panangraem iti homoseksualidad a maibilang a kasta.” Inlawlawagna a dagiti homoseksual “pimmigsa ti panagkaykaysada a mangiwaragawag a nadayaw ti aramidda, ket kiddawenda a kasta met laeng ti aramiden dagiti sabsabali.” Maimatangan daytoy nangnangruna kadagiti Makinlaud a pagilian. Nupay kasta, iti kaaduan a paset ti lubong, uray kadagiti maawagan liberal a luglugar, adu pay laeng ti mangkondenar ken mangilaksid iti homoseksualidad.

Dagiti homoseksual ken dagidiay maatap a homoseksual masansan nga agbalinda a puntiria ti makapasair a sasao, panangraut, ken kinaranggas. Mangipakpakita iti kasta a gura uray dagiti narelihiosuan a panguluen. Dadduma ti nangirugi iti mabalin a kasla bukodda a pribado a pannakigubat kadagiti homoseksual. Usigenyo, kas pagarigan, dagiti inkomento ti maysa nga obispo ti Greek Orthodox Church a nabiit pay a naibrodkas iti radio ti nasion idiay Grecia. Kinunana: “Puoranto ti Dios dagiti homoseksual iti agnanayon iti umap-apuy a galagala ti impierno. Agnanayon nga agkallungoganto dagiti ikkis ti narasaw a ngiwngiwatda. Mapasaranto dagiti rinuker a bagida ti di maibturan a pannakatutuok.” Agpayso kadi daytoy? Kasano ti panangmatmat ti Dios kadagiti homoseksual?

Ti Panangmatmat ti Dios

Saan a partikular a tukoyen ti Biblia dagiti homoseksual kas grupo a rumbeng nga ilaksid wenno guraen dagiti Kristiano. Kasta met a saanna nga isursuro a dusaento ti Dios dagiti homoseksual​—wenno asinoman kadagiti pinarsuana​—babaen iti panangpuorna kadakuada iti umap-apuy nga impierno iti agnanayon.​—Idiligyo iti Roma 6:23.

Nupay kasta, ilanad ti Kasuratan dagiti moral a pagalagadan ti Namarsua kadatayo, a no dadduma maikontra kadagiti moderno-aldaw a pagalagadan iti moral. Kondenaren ti Biblia amin dagiti homoseksual nga aramid, ti heteroseksual a panagdenna dagiti di agassawa, ken ti pannakidenna iti animal. (Exodo 22:19; Efeso 5:3-5) Dinadael ti Dios ti Sodoma ken Gomorra gapu kadagita a seksual nga aramid.​—Genesis 13:13; 18:20; 19:4, 5, 24, 25.

No maipapan kadagiti homoseksual nga aramid, ipaganetget ti Sao ti Dios: “Daytoy ket magura a banag.” (Levitico 18:22, The New Jerusalem Bible) Ipaannurot ti Linteg ti Dios iti Israel: “No ti lalaki makikaidda iti padana a lalaki nga ibilangna a kas babai, isuda a dua nakarimrimon ti aramidda, dinto bumurong a mapapatayda.” (Levitico 20:13) Maipataw ti umasping a dusa kadagidiay nakaaramid iti pannakidenna iti animal, insesto, ken pannakikamalala.​—Levitico 20:10-​12, 14-​17.

Napaltiingan ni apostol Pablo a mangdeskribir kadagiti homoseksual nga aramid kas panangiparangarang kadagiti “nakababain a panaggartem iti sekso” ken kas “maikaniwas iti nakaparsuaan.” Insuratna: “Dayta ti makagapu a ti Dios inyawatna ida kadagiti nakababain a panaggartem iti sekso, ta agpadpada a dagiti babbaida sinukatanda ti nakaisigudan nga usar ti bagbagida iti maysa a maikaniwas iti nakaparsuaan; ken kasta met nga uray dagiti lallaki pinanawanda ti nakaisigudan nga usar ti babai ket simgedda a nakapalpalalo iti derrepda iti maysa ken maysa, lallaki iti lallaki, nga ar-aramidenda no ania ti naalas ket aw-awatenda iti bagbagida ti naan-anay a supapak, a maiparbeng iti biddutda. Ket no kasano a dida inanamongan ti panangbigbig iti Dios iti umiso a pannakaammo, ti Dios inyawatna ida iti maysa a di naanamongan a kasasaad iti isip, tapno aramidenda dagiti bambanag a di maiyanatup.”​—Roma 1:26-28.

Awan ti ipaay dagiti Kasuratan a pagpambar, pawayway, pannakariro; dagiti homoseksual nga aramid, pannakikamalala, pannakiabig, amin ket makasugkar iti imatang ti Dios. Maitunos iti dayta, dagiti pudno a Kristiano dida pakapuyen ti takder ti Biblia maipapan kadagiti “nakababain a panaggartem iti sekso” tapno agbalin laeng a nalatlatak wenno ad-adda a maawat iti moderno a kultura. Dida met kanunongan ti aniaman a gunglo a naipamaysa a mangitandudo iti homoseksualidad kas normal nga estilo ti biag.

“Guraenyo ti Dakes”

Ibalakad ti Biblia: “O dakayo nga agay-ayat ken Jehova, guraenyo ti dakes.” (Salmo 97:10) Gapuna, manamnama a guraen dagiti Kristiano ti tunggal aramid a maikaniwas iti linlinteg ni Jehova. Dadduma a tattao mabalin a napalaus ti gura wenno rimonda iti homoseksualidad ngem iti aniaman a kita ti imoralidad, a matmatanda ti homoseksualidad kas di natural a seksual a kinagaramugam. Nupay kasta, rumbeng kadi a guraen dagiti Kristiano dagiti indibidual a mangar-aramid kadagita a banag?

Mangipaay ti salmista iti sumagmamano a lawag maipapan iti daytoy nga isyu idiay Salmo 139:21, 22: “Saanko aya a guraen O Jehova dagiti gumura kenka? Ken saanko aya a paglidayan dagiti tumakder a sibubusor kenka? Guraek ida iti naan-anay a gura, agbalinda a kabkabusorko.” Ti kinasungdotayo ken Jehova ken kadagiti prinsipiona ti rumbeng a mangtignay kadatayo a manggura unay kadagidiay a mangigaggagara nga umalsa maibusor ken ni Jehova ken tumakder kas kabusor ti Dios. Ni Satanas ken dagiti demoniona karamanda kadagita a napatalgedanen a kabusor ti Dios. Dadduma a tattao mabalin a mairamanda met iti daytoy a kategoria. Ngem mabalin a nagrigat para iti maysa a Kristiano nga ilasin dagita a tattao iti pammarang a langa. Ditay mabasa dagiti puso. (Jeremias 17:9, 10) Dakes ti mangipagarup a ti maysa ket din agbalbaliw a kabusor ti Dios agsipud ta dakes ti ar-aramidenna. Kaaduanna, di la ngamin ammo dagiti managbasol ti pagalagadan ti Dios.

Gapuna, no pangkaaduan ti pagsasaritaan, nabannayat dagiti Kristiano a manggura kadagiti padada a tattao. Uray pay no guraenda unay ti sumagmamano nga estilo ti panagbiag, saanda a pangpanggepen a dangran dagiti sabsabali, wenno agimula iti sakit ti nakem wenno agim-impen iti dakes kadakuada. Imbes ketdi, balakadan ti Biblia dagiti Kristiano a ‘makikappiada iti isuamin a tattao.’​—Roma 12:9, 17-19.

“Ti Dios Saan a Mangidumduma”

Pakawanento ni Jehova ti tao a sipupudno nga agbabbabawi, aniaman nga imoralidad a naaramidan dayta a tao. Awan pammaneknek a matmatan ni Jehova a dakdakes ti maysa a kita ti imoralidad ngem iti sabali. “Ti Dios saan a mangidumduma.” (Aramid 10:34, 35) Usigenyo, kas pagarigan, ti kaso ti immuna-siglo a kongregasion sadi Corinto. Nagsurat ni apostol Pablo kadakuada: “Uray dagiti mannakiabig, wenno dagiti managrukbab iti didiosen, wenno dagiti mannakikamalala, wenno dagiti lallaki a maipaay kadagiti di nainkasigudan a panggep, wenno dagiti lallaki a makikaidda kadagiti lallaki, wenno dagiti mannanakaw, wenno dagiti naagum a tattao, wenno dagiti managbarbartek, wenno dagiti manangrabngis, wenno dagiti manangkikil didanto tawiden ti pagarian ti Dios.” Kalpasanna, binigbig ni Pablo a naawat iti kongregasion Kristiano idiay Corinto dagiti dadduma a sigud a mannakiabig, mannakikamalala, homoseksual, ken mannanakaw. Inlawlawagna: “Ket kaskasdi a kasta idi ti sumagmamano kadakayo. Ngem naugasankayon a nadalus, ngem nasantipikarkayon, ngem naideklarakayon a nalinteg iti nagan ni Apotayo a Jesu-Kristo ken babaen iti espiritu ti Diostayo.”​—1 Corinto 6:9-​11.

Siempre, saan a konsintiren ni Jehova ti aniaman a panangitultuloy ken pananglablabsing latta kadagiti nalinteg a moral a pagalagadanna. Talaga a guraenna ti sipapakinakem a mangilaksid kadagiti prinsipiona. Nupay kasta, kanayon a sidadaan a makisinnublianan. (Salmo 86:5; Isaias 55:7) Maitunos iti daytoy, dagiti homoseksual, wenno ti asinoman pay ket di pagbalinen dagiti Kristiano a puntiria ti sakit ti nakem, panangrabak, wenno panangraut. Matmatan dagiti pudno a Kristiano dagiti padada a tattao kas manamnama nga adalan ni Kristo, a tratuenda ida iti nadayaw ken natakneng a pamay-an. Kuna ti Biblia: “Daytoy ket nasayaat ken makaay-ayo iti imatang ti Manangisalakantayo, ti Dios, a ti pagayatanna ket maisalakan koma dagiti amin a kita ti tattao ken dumtengda iti umiso a pannakaammo iti kinapudno.”​—1 Timoteo 2:3, 4.

Abrasaen Dagiti Kristiano ti Agbabbabawi

Maulit-ulit a kunaen ti Biblia a manangpakawan ti Dios. Isut’ iladawanna a “Dios a nadadaan a mamakawan, naparabur ken manangngaasi, natanang nga agpungtot ken nawadwad iti kinamanangngaasi.” (Nehemias 9:17; Ezequiel 33:11; 2 Pedro 3:9) Isut’ iyarig pay ti Biblia iti ama iti pangngarig ni Jesus maipapan iti barayuboy nga anak a nangbusbos iti tawidna iti nalabes a panagragragsak iti adayo a lugar. Sidadaan a nagur-uray ti ama tapno abrasaenna manen ti anakna idi a ti anakna nakapagpanunot, nagbabawi, ken nagsubli iti pagtaengan ti pamiliana.​—Lucas 15:11-​24.

Wen, posible nga agbalbaliw ti nakabasol. Bigbigen dagiti Kasuratan daytoy babaen ti panangparegtana kadagiti tattao nga ikkatenda ti daan a personalidad ket ikawesda ti baro ken ‘mapabaroda koma iti puersa a mangtigtignay iti panunot.’ (Efeso 4:22-​24) Dagidiay a mangar-aramid iti dakes, agraman dagiti homoseksual, mabalinda ti mangaramid iti dakkel a panagbalbaliw iti padron ti panunot ken kababalinda, ket adu ti agpayso a nagballigi a nangaramid iti daytoy a panagbalbaliw.a Kinasabaan ni Jesus a mismo dagita a tattao; ket iti panangipakitada iti panagbabawi, nagbalinda a makaay-ayo kenkuana.​—Mateo 21:31, 32.

Abrasaen dagiti Kristiano dagiti agbabbabawi a tattao manipud iti nadumaduma a kita ti panagbiag. Kalpasan nga insardengdan dagiti imoral nga aramidda, aniaman ti nagbalinanda idi, mabalin a matagiragsak amin dagiti naan-anay a gunggona ti pammakawan ti Dios agsipud ta “ni Jehova naimbag kadagiti isuamin, ket dagiti nadungngo a kaasina adda kadagiti amin nga ar-aramidna.”​—Salmo 145:9.

Sisasagana dagiti Kristiano a mangitukon iti kasapulan a naespirituan a panangandingay, uray pay kadagidiay makidangdangadang pay laeng kadagiti homoseksual a pagannayasan. Maitunos daytoy iti panangiparangarang a mismo ti Dios iti ayatna, ta kunaen ti Biblia: “Ti Dios irekomendana ti bukodna nga ayat kadatayo iti banag a, bayat a managbasoltayo pay laeng idi, ni Kristo natay a maipaay kadatayo.”​—Roma 5:8.

[Footnote]

[Blurb iti panid 14]

Dagiti Kristiano dida pakapuyen ti panangmatmat ti Biblia maipapan iti homoseksualidad

[Picture Credit Line iti panid 13]

Punch