Ni Jehova Maikari iti Agnanayon a Dayaw
“Tunggal aldaw bendituenkanto, ket idaydayawkonto ti naganmo iti panawen a di nakedngan, uray iti agnanayon.”—SALMO 145:2.
1. Apay adut’ rason ni David a mangidaydayaw ken Jehova?
NI David a nasungdo nga adipen ni Jehova addaan adu a rason a mangidaydayaw iti Dios. Daytoy nalatak nga ari iti kadaanan nga Israel ammona ti kinadakkel ken kinaimbag ni Jehova ken nabigbigna a ti Kinaarina awan inggana. Ti Kangatuan maikari iti dayaw gaput’ panangpennekna ti tarigagay ti amin a sibibiag a bambanag ken panangtednat’ asi kadagiti matalek nga ad-adipenna.
2. (a) Kasanot’ pannakaiyurnos ti Salmo 145? (b) Ania a salsaludsod ti intay usigen?
2 Impaay ni David ti kasta a pammadayaw iti Dios iti maika-145 a Salmo. Kada bersikulo daytoy acrostic a salmo mangrugi kadagiti agsasaruno a letra ti alpabeto a Hebreo, nupay ti maysa a letra (nun) ket di nairaman. Ti acrostic nga urnosna nalabit nagserbi kas tulong ti pananglagip. Itantan-ok ti Salmo 145 ni Jehova, kas kadagiti sasao a: “Tunggal aldaw bendituenkanto, ket idaydayawkonto ti naganmo iti panawen a di nakedngan, uray iti agnanayon.” (Salmo 145:2) Ngem kasano nga apektarannatayo daytoy a salmo? Aniat’ maaramidanna iti relasiontayo iti Dios? Tapno maammuantayo, umuna nga usigentayo dagiti Sal 145 bersikulo 1 ingganat’ 10.
Ti Kinadakkel ni Jehova Di Matukod
3. Kas ken David, aniat’ utangtayo iti ‘Ari a Diostayo,’ ken apay?
3 Maysa nga ari ni David, ngem binigbigna ti kinasoberano ni Jehova kenkuana, a kunkunana: “Itan-okkanto, Diosko, O Arik, ket bendituekto ti naganmo iti panawen a di nakedngan, uray iti agnanayon.” (Salmo 145:1) Iti umas-asping a panagraem, itagtag-ay dagiti Saksi ni Jehova ti nagan ti Dios ken idaydayawda iti intero a daga. Ti biagtayo mapabaknang bayat ti pannakiramantayo iti kasta nga aramid. Kas ken David, utangtayo ti panagtulnog ken panagpasakop ken Jehova kas ‘Ari a Diostayo.’ Ket apay a saan? Isut’ “Ari ti pampanawen.” (Apocalipsis 15:3) Mainayon pay, ti Dakdakkel a David, a ni Jesu-Kristo, nga agturturayen manipud nailangitan a Bantay Sion nanipud pay 1914, mangted kadatayo ti nagsayaat nga ulidan ti panagpasakop ken Jehova, ti Agnanayon nga Ari.
4. Kasanotay a ‘bendituen ti nagan ti Dios’?
4 Kuna ni David a ‘bendituenna ti nagan ti Dios.’ Kasano a maaramidan daytoy ti maysa a tao? Mainayon kadagiti dadduma pay a bambanag, ti panangbendito iti maysa kaipapanannat’ panagsao ti nasayaat maipapan kenkuana. Ti panangbendito iti nagan ti Dios ipamatmatna nga addaantay ti napigsa a panagayat kenkuana ken iti nasantuan a naganna, a Jehova. Ditay pulos agrekreklamo maipapan ti Dios, ditay pulos agsapsapul ti biddutna, ditay pulos pagduaduaan ti kinaimbagna. No laeng addaantay ti kasta a kababalin, ken nakaaramidtayon ti dedikasion ken Jehova, ken salimetmetantay ti kinatarnaw kas dagiti bautisado a Saksina a mabalintay met a maikuna kas ken David a ‘bendituentayo ti naganna iti agnanayon.’ No salimetmetantay ti bagitayo iti ayat ti Dios, awatentayto ti sagut ti biag nga agnanayon ket iti kasta mabalintay a bendituen ni Jehova iti awan inggana.—Judas 20, 21.
5. Ti tarigagay a mangbendito ken Jehova iti “tunggal aldaw” rebbeng nga addaan iti ania nga epekto kadatayo?
5 No pudno nga inayattayo ti Manangted-Biagtayo, kunaentayo kas ken David: “Tunggal aldaw bendituenkanto, ket idaydayawkonto ti naganmo iti panawen a di nakedngan, uray iti agnanayon.” (Salmo 145:2) Anian kinaongaong ti aldaw no ditay binendito ti Dios! Saantay koma pulos okupado wenno naagawa unay maipapan kadagiti material a bambanag a ditay makapagsao a naimbag maipapan ti nailangitan nga Amatayo wenno makapagkararag kenkuana iti inaldaw. Impasimudaag ni Jesus a rebbeng nga agkararagtayo nga inaldaw idi kinunana iti modelo a kararag: “Itdem koma kadakami ti taraonmi nga inaldaw.” (Lucas 11:3) Adu nga adda iti amin-tiempo a serbisio idaydayawda nga inaldaw ti Dios bayat ti pannakiramramanda iti Nakristianuan a ministerio. Ngem aniaman dagiti sirkumstansiatayo, rebbeng a tignayennatay ti pusotayo a mangidayaw iti Dios iti maysa a pamay-an kada aldaw. Ken panunotenyo laengen! Kas dagiti dedikado a Saksi ni Jehova nga addaan namnama ti biag nga awan inggana, addaantay ti naindaklan a namnama a mangidaydayaw nga agnanayon iti naganna.—Juan 17:3.
6. Apay a “naindaklan unay ti pannakaidaydayaw” ni Jehova?
6 Pudno nga addaantay rason a mangidayaw iti Dios ti tunggal aldaw, ta innayon ni David: “Dakkel ni Jehova ken naindaklan unay ti pannakaidaydayaw, ket ti kinadakkelna saan a matukod.” (Salmo 145:3) Naindaklan unay ni Jehova ta awan umartap kenkuana, ken naan-anay ti kinasoberanona. Ti ari ti Babilonia a ni Nabucodonor inadmitirna: “Awan ti manglapped iti ima [ti Dios] wenno agkuna kenkuana, ‘Ania ti ar-aramidem?’” (Daniel 4:34, 35) Ni Jehova “rebbeng a pagbutngan a nangnangruna ngem amin a didiosen.” (Salmo 96:4) Isu met laeng a “naindaklan unay ti pannakaidaydayaw[na].” Awan sasao a panangidayaw ti nakadaydayag unay no iti panangitan-ok ken Jehova! Isut’ maikari iti di nakedngan, awan inggana a panangidayaw.
7. Aniat’ mangpaneknek a “ti kinadakkel [ti Dios] saan a matukod”?
7 “Ti kinadakkel [ni Jehova] saan a matukod.” Agpapan pay kasanot’ kadakkel ti bagina, ti kinadakkelna ket maipapan iti kina-Diosna. Wen, dagiti bambanag a pinarsuana nakaskasdaawda unay tapno matarusantayo, ken datay a mismo “nakaskasdaaw ti pannakaaramidtayo.” (Salmo 139:14; Job 9:10; 37:5) Kasta met, anian a naindaklan unay ti kababalin ni Jehova! Simamatalek a salsalimetmetanna ti karkarina ken siaayat nga ipanayagna ti pangpanggepna. Kaskasdi, ditayto pay latta maammuan ti isuamin maipapan iti Dios. Iti kina-agnanayon, mabalintayo ti dumakkel iti pannakaammo kenkuana, iti parparsuana, ken iti pangpanggepna.—Roma 11:33-36.
Ipadayaw ti Ar-aramid ni Jehova
8. (a) Kasano a “ti tunggal kaputotan” indaydayawna ti ar-aramid ni Jehova? (b) No isurotay kadagiti annaktayo ti maipapan kadagiti ar-aramid ken gapuanan ni Jehova, kasanot’ mabalin a panangmatmatdanto iti panagdaydayaw kenkuana? (c) Kas naragsak a “kaputotan,” aniat’ naaramidan ti napulotan a natda?
8 Nagadu ti mabalin a maikuna a panangidayaw iti di matukod a kinadakkel ti Diostayo ta ni David nagtignay a nagkuna: “Ti tunggal kaputotan ipadpadayawnanto dagiti aramidmo iti sabali, ket sarsaritaennanto dagiti mannakabalin nga ar-aramidmo.” (Salmo 145:4) Dagiti nagsasaruno a kapkaputotan ti tao indayawda dagiti ar-aramid ni Jehova ken insalaysayda dagiti mannakabalin a gapuananna. Anian a pribilehio ti mangiyulit-ulit kadagitoy a bambanag kadagidiay pangiyad-adalantayo ti Biblia! Kas pangarigan, mabalintay nga ibaga kadakuada a pinarsua ti Dios amin a bambanag. (Genesis 1:1–2:25; Apocalipsis 4:11) Mabalintay a saritaen dagiti mannakabalin nga aramidna idi nga inispalna dagiti Israelita manipud pannakakayawda idiay Egipto, ken tinulonganna ida a mangparmek kadagiti kabkabusorda a Canaanita, inispalna ida manipud pannakaikisapda idiay kadaanan a Persia, ken adu pay. (Exodo 13:8-10; Oc-ocom 4:15; Ester 9:15-17) Ken saantay aya a matignay a mangibaga kadagiti annaktayo kadagiti ar-aramid ken gapuanan ni Jehova? No itdentayo kadagiti annaktayo ti kasta a pannursuro ken makitadatayo a siraragsak nga agserserbi iti Dios, matmatandanto met ti panangdaydayaw kenkuana a makaay-ayo ken dumakkeldanto a ti ‘rag-o ken Jehova isu ti pigsada.’ (Nehemias 8:10; Salmo 78:1-4) Ti napulotan a natda buklenda ti maysa a naragsak a “kaputotan” dagiti Saksi ni Jehova a mangisarsarita kadagiti ar-aramid ti Dios iti “dakkel nga umariwekwek,” a paset ti kaputotan a mangtawidto ti Paraiso a daga.—Apocalipsis 7:9.
9. Bayat ti panangmennamennatayo iti ar-aramid ken mannakabalin a gapuanan ti Dios, aniat’ masiguradotayo?
9 Bayat a mennamennaentayo dagiti ar-aramid ken mannakabalin a gapuanan ti Dios, ad-adda a makumbinsirtayo a “ni Jehova dinanto idian ti ilina gapu iti dakkel a naganna.” (1 Samuel 12:22; Salmo 94:14) No maipasangotayo kadagiti pannakasuot, rigrigat, ken pannakaidadanes, mabalintay ti agbalin a natalinaay ken agtalek a “ti talna ti Dios” saluadanna ti puspuso ken is-isiptayo. (Filipos 4:6, 7) Gapuna anian a maiyanatup nga ibagatay kadagiti dadduma ti maipapan iti naayat, manangsalaknib a nailangitan nga Amatayo!
10. “Dagiti nakaskasdaaw nga aramid” ni Jehova ramanenna ti ania, ken kasanotay a magunggonaan iti panangmennamenna kadakuada?
10 Masapul nga ikkantay ti tiempo a mennamennaentayo ti kinadayag ken ar-aramid ni Jehova, ta innayon ni David: “Ti nagloriaan a daeg ti dayawmo ken dagiti nakaskasdaaw nga aramidmo imutektekakto.” (Salmo 145:5) Ti kinadaeg ti Dios nakaam-amak ken di maringbawan. (Job 37:22; Salmo 148:13) Gapuna, pinagbalin ni David a ti nagloriaan a daeg ni Jehova ti pakaseknanna. Naseknan met ti salmista kadagiti bambanag maipapan kadagiti “nakaskasdaaw nga aramid” ti Dios. Ramanen dagitoy ti panangalagadna ti nadiosan a kinahustisia iti panangdadaelna kadagiti managbasol ken panangispalna kadagiti nadiosan, kas idi Layus. (Genesis 7:20-24; 2 Pedro 2:9) Ti panangmennamenna kadagita a bambanag papigsaennat’ relasiontayo ken Jehova ken tulongannatayo a mangibaga kadagiti sabsabali maipapan ti kinadaegna ken dagiti nakaskasdaaw nga aramidna. Bayat ti 40 nga aldawna idiay let-ang, napapigsa ni Jesus maibusor iti pannakasulisogna babaen ti panangmennamennana kadagiti bambanag nga inyeg dagiti silulukat a langlangit iti atensionna. (Mateo 3:13–4:11) Kalpasanna isut’ nagsao kadagiti dadduma maipapan iti kinadaeg ni Jehova ken iti nakaskasdaaw nga ar-aramidna.
11. (a) Apay nga immapay ti buteng kadagiti agtaeng ti Jerico? (b) Babaen iti ania nga espiritu nga agsao dagiti Saksi ni Jehova maipapan kadagiti ‘nakaam-amak nga ar-aramid’ ken “kinadakkel” ti Dios?
11 No pagsasaritaantayo ti kinadaeg ken ar-aramid ti Dios, tigtignayentay met dagiti dadduma a sawen ida. Kuna ni David: “Ket dagiti tattao sasawendanto ti bileg dagiti nakaam-amak nga ar-aramidmo; ket sarsaritaekto ti kinadakkelmo.” (Salmo 145:6) Nagsao ni Rahab maipapan iti panagbuteng nga immapay kadagiti agnaed ti Jerico idi nangngeganda no kasanot’ panangalaw ni Jehova kadagiti Israelita idiay Nalabaga a Baybay ken pinagballigina ida maibusor kadagiti dua nga ar-ari dagiti Amorreos. Nalabit adda adu a panagsasao maipapan kadagita a “nakaam-amak nga ar-aramid” idiay Jerico. (Josue 2:9-11) Ket sigurado a ti asidegen a “dakkel a rigat” nakaam-amakto. (Mateo 24:21) Ngem dagiti nakakigkigtot a bambanag kadagiti tattao a naiyadayo ti Dios iparegtana kadagiti nalinteg a puspuso “ti panagbuteng ken Jehova,” ti makaay-ayo a panagamak kenkuana. (Proverbio 1:7) Babaen iti dayta a nadayaw nga espiritu, sarsaritaen dagiti Saksi ni Jehova dagiti pannakaiparangarang ti pannakabalin ti Dios. Wen, ti naindaklan a Managaramid-ti-Nakaskasdaaw isut’ kangrunaan a tema ti panagpapatang dagiti napulotan ken dagiti naindagaan a kakaduada! Ket uray ti pannakaidadanes saanna a lappedan ida a mangibagbaga kadagiti dadduma maipapan kadagitoy a bambanag ken ti “kinadakkel” ni Jehova.—Aramid 4:18-31; 5:29.
Idayawyo ni Jehova Gaput’ Kinaimbagna
12. Kasano a ti kinaimbag ni Jehova tignayennatay a ‘mangiyesngaw’ kadakuada?
12 Ti Dios maikari iti dayaw saan laeng a gaput’ kinadakkelna no di ket gapu met iti kinaimbag ken kinalintegna. Gapuna kuna ni David: “Iyesngawdanto ti pannakalagipda iti dakkel a kinaimbagmo, ken ikantadanto ti kinalintegmo.” (Salmo 145:7) Ti kinaimbag ni Jehova dakkel unay ta ‘iyesngawtayo’ dayta babaen kadagiti naragsak a panagsasao. Iti Hebreo, ti ideyana ket kas ti danum a pumpumsuak manipud iti burayok. Gapuna agburayoktay koma iti siyayaman a panagdaydayaw iti Dios, kas kadagiti baresbes ti dandanum. (Proverbio 18:4) Iti dakkel a naespirituan a pannakadangranda, nalipatan ti Israel ti kinaimbag ni Jehova. (Salmo 106:13-43) Ngem sapay koma ta dagiti pusotayo aglippiasda iti kasta unay a panagyaman a dadduma agbabawida koma kalpasan a maammuanda no kasanot’ kaimbag ni Jehova kadagiti dedikado a Saksina.—Roma 2:4.
13. Ti pannakaiparangarang ti nadiosan a kinahustisia ken kinalinteg rebbeng nga addaan ania nga epekto kadatayo?
13 Sapay koma ta dagiti pannakaiparangarang ti nadiosan a kinahustisia ken kinalinteg tignayennatay met nga umkis a sirarag-o. No kastoy ti riknatayo, birukentayo nga umuna saan laeng a ti Pagarian ti Dios no di ket kasta met ti kinalintegna. Kanayonto met a kayattayo a ti kababalintayo iyegnat’ dayaw ken Jehova. Wen, agbalintayo a regular a manangiwaragawag ti Pagarian nga aduan ti ar-aramid iti serbisio ti Dios. Ti panagdayawtayo ken Jehova nikaanoman saanto pulos a mapasardeng.—Mateo 6:33; 1 Corinto 15:58; Hebreo 10:23.
Nakaasi ni Jehova
14. Aniat’ adda nga ebidensia a “ni Jehova managparabur ken nakaasi”?
14 Ti panangisitarna kadagiti kanayonan a maikari iti dayaw a kualidad ti Dios, kuna ni David: “Ni Jehova managparabur ken nakaasi, naanat nga agpungtot ken dakkel ti kinamanagayatna.” (Salmo 145:8) Ti Dios managparabur gapu ta isut’ naan-anay a naimbag ken manangted. (Mateo 19:17; Santiago 1:5) Agar-aramid ti naimbag uray pay kadagidiay di agserserbi kenkuana. (Aramid 14:14-17) Ni Jehova nakaasi met, nadungngo, “isu malagipna a datayo tapuktayo.” Saanna a laisen ti nadudog a puso wenno saanna nga ipaay kadatayo ti kas mayanatup kadagiti basbasoltayo no di ket ad-adda a nakaasi ngem iti managayat unay a a natauan nga ama. (Salmo 51:17; 103:10-14) Wen, iti kadadakkelan a panangipamatmat ti asi, imbaonna ti Anakna a dungdungnguen a matay agpaay kadatayo tapnon maikappiatayo iti Dios ken maramanantay a pudno ti kinamanagparaburna!—Roma 5:6-11.
15. Apay a maikuna a ni Jehova a Dios “naanat nga agpungtot” ken “dakkel ti kinamanagayatna”?
15 Ti nailangitan nga Amatayo naanat nga agpungtot. Isut’ di mangibulbulos ti bulsek a panagpungtotna. Ni Jehova “dakkel ti kinamanagayatna” met. Ditoy ti Hebreo ipampamatmatna ti kinamanangaasi a nagtaud iti ayat ken idekketna ti bagina iti maysa a banag. Aramidenna dayta agingga a ti panggepna maipapan iti dayta a banag ket naragpatnan. Ti katupagna a panangipaulog ket “nasungdo nga ayat.” Mainayon kadagiti dadduma pay a bambanag, ti naayat-a-kinamanangaasi ti Dios, wenno nasungdo nga ayat, maiparangarang kadagiti ar-aramid ti panangisalakan, panangitalimeng, pannalaknib, bang-ar manipud kadagiti pakariribukan, ken pannakaisubli manipud basol babaen iti subbot. (Salmo 6:4; 25:7; 31:16, 21; 40:11; 61:7; 119:88, 159; 143:12; Juan 3:16) Ti kinapudnona a di inyeg ni Jehova ti Armagedon kalpasan la unay ti ‘gubat idiay langit’ palubosanna ti umariwekwek a makagun-od ti pannakaisalakan, maysa a dakkel nga ebkas ti nadiosan a naayat-a-kinamanangaasi.—Apocalipsis 12:7-12; 2 Pedro 3:15.
16. Kasano a napaneknekan a ni Jehova “naimbag kadagiti isuamin”?
16 Gapu iti asi ti Dios, maikuna a dakkel ti pusona. Kunan David: “Ni Jehova naimbag kadagiti isuamin, ket dagiti nadungngo a kaasina adda kadagiti amin nga ar-aramidna.” (Salmo 145:9) Wen, ti Dios naimbag idi kadagiti Israelita. Gapu iti dayta a banag, “paruarenna ti initna kadagiti dakes ken kadagiti naimbag ket pagtuduenna kadagiti nalinteg ken nakillo.” (Mateo 5:43-45) Idiay Eden, inkari ni Jehova ti maysa a “bin-i” a maysanto a bendision. Iti kamaudiananna kunana ken Abraham: “Ket babaen iti putotmo mabendisionanto ti isuamin a nasnasion ti daga.” (Genesis 3:15; 22:18) Ket ti kinaimbag ti Dios nagdakkelan unay iti daytoy “panawen ti panungpalan” nga asinoman ket mabalinna ti ‘umay ken awatenna ti danum ti biag nga awan baybayadna.’ (Daniel 12:4; Apocalipsis 22:17) Ni Jehova situtulok nga agaramid ti naimbag kadagiti amin nga intelihente a parparsua, ket ti kinaimbagna rebbeng nga iyadaninatay a nasingsinged koma pay kenkuana.
17. Iti ania a pannakaawat a ‘dagiti nadungngo a kaasi [ni Jehova] adda kadagiti amin nga ar-aramidna’?
17 “Ti nadungngo a kaasi [ni Jehova] adda kadagiti amin nga ar-aramidna” gapu ta agar-aramid ti nawadwad a sagana agpaay kadagiti tattao ken an-animal. Isu “Daydiay mangted ti taraon iti amin a lasag.” (Salmo 136:25; 147:9) Ti Dios saanna a dayawen dagiti nabaknang ket laisenna dagiti maparparigat, nga itan-ok dagiti natangsit ket uyawenna dagiti nanumo, ipangato ti maag ket sana ipababa ti masirib. Aramiden dayta dagiti tattao a managbasol ngem saan a ti manangaasi a nailangitan nga Amatayo. (Salmo 102:17; Sofonias 3:11, 12; Eclesiastes 10:5-7) Ket anian a nagdakkelan ti kinamanangaasi, kinaimbag ken naayat a kinamanangaasi ti Dios iti panangaramidna a posible ti pannakaisalakan babaen iti daton a subbot ti dungdungnguenna nga Anak!—1 Juan 4:9, 10.
Dagiti Nasungdo Bendituenda ni Jehova
18. (a) Kasano a dagiti ar-aramid ti Dios ti “mangidayawto” kenkuana? (b) Kaanotay a rebbeng matignay a mangidayaw ken Jehova?
18 Maikari ti Dios iti dayaw manipud amin a disso. Kas panagkuna ni David: “Amin dagiti ar-aramidmo, ti mangidayawto kenka, O Jehova, ket dagiti sasantom bendituendakanto.” (Salmo 145:10) Ti parparsua ti Dios ti “mangidayawto” kenkuana, kas ti nagsayaat pannakaibangonna a balay maysa a dayaw iti managbangonna ken ti makaay-ayo a plorera iti nasigo a dumadamilina. (Idiligyo ti Hebreo 3:4; Isaias 29:16; 64:8.) Nakaskasdaaw unay dagiti ar-aramid ni Jehova ti panamarsua a dagita ti nangtignay kadagiti anghel ken tattao nga agdayaw kenkuana. Dagiti angheliko nga annak ti Dios siraragsak nga imkisda iti panagdayaw idi imbangonna ti daga. (Job 38:4-7) Kuna ni David a ‘dagiti langlangit ipalawagda ti dayag ti Dios ket ti law-ang ipakitana ti aramid ti imana.’ (Salmo 19:1-6) Mabalintay met a maidayaw ni Jehova no makakitatayo ti kali nga agtaytayab iti tangatang wenno ti ugsa nga agtartaray iti berde a katurodan. (Job 39:26; Canta ni Salomon 2:17) Ti dayaw maiyanatup no apitentay dagiti mulatayo wenno tagiragsakentay ti pannangan a kadua dagiti gagayyem. (Salmo 72:16; Proverbio 15:17) Dagiti nakaskasdaaw pannakadiseniona a bagitayo mabalin a tignayenna met dagiti ebkas ti nadayaw a panagyaman iti Dios.—Salmo 139:14-16.
19. Asinoda dagiti “nasungdo,” ken aniat’ ar-aramidenda?
19 Itatta, dagiti napulotan ti espiritu a “nasungdo” ken Jehova ditoy daga ti mangbembendito kenkuana. Nasayaat ti panagsasaoda maipapan kenkuana ket il-iliwenda a makita a maaramidton ti pagayatanna ditoy daga kas met sadi langit. (Mateo 6:9, 10) Bayat a dagiti napulotan ibagbagada kadagiti dadduma dagiti nakaskasdaaw nga ar-aramid ti Dios, ti dakkel nga umariwekwek sumungsungbat met iti dumakdakkel a bilang. Kadua dagiti napulotan a nasungdo, agserserbida a sireregta kas manangibunannag ti Pagarian. Ti aya panagyaman tigtignayennakayo a maaddaan ti regular a pannakiraman iti daytoy a trabaho a pakaidayawan ti Dios?
20. (a) Kasano a masantipikar ti nagan ni Jehova? (b) Maipapan ti Salmo 145, ania pay ti natda a salsaludsod nga usigen?
20 Kas dagiti Saksi ni Jehova, arigtay ni David a mangmangted dayaw iti Dios. Ti pannakasantipikar ti nasantuan a nagan ni Jehova ken ti panangidayaw iti dayta ket bambanag a pakaseknantay unay. Yantangay ti nasantuan a nagan ket santipikarento ti Pagarian ti Dios, daytoy a sursuro ti Biblia maipapan ti Pagarian isut’ kangrunaan a paset ti naimbag a damag nga iwarwaragawagtayo. Ti aya Salmo 145 mangted ti naespirituan a pannakalawlawag itoy a banag? Anianto pay ti ipalgak ti panangsalaysaytayo ti dadduma a paset itoy a Salmo? Iti ania a dadduma pay a pamay-an a paneknekanna a ni Jehova maikari iti awan inggana a dayaw?
Ania dagiti Komentoyo?
◻ Kasanotay a bendituen ti nagan ni Jehova?
◻ Aniat’ sumagmamano kadagiti makomendaran nga ar-aramid ti Dios?
◻ Kasanot’ panagtignaytayo no apresiarentayo ti kinaimbag ni Jehova?
◻ Ti kinaasi ti Dios naipakita kadagiti ania a pamay-an?
[Ladawan iti panid 12]
Ibagbagayo aya kadagiti annakyo dagiti mannakabalin nga ar-aramid ni Jehova, kas ar-aramiden dagiti nadiosan a nagannak iti kadaanan nga Israel?
[Ladawan iti panid 15]
Kas ti nagsayaat pannakaibangonna a balay maysa a dayaw iti managbangon, kasta met dagiti ar-aramid ti panamarsua ni Jehova mangyeg dayaw Kenkuana