KINAIMBAG
Ti kualidad wenno kasasaad a naimbag; kinasayaat iti moral; kinasingpet. Ti kinaimbag ket naan-anay iti amin a pamay-an, nga awanan iti kinadakes wenno kinarinuker. Dayta ket positibo a kualidad ken maiparangarang babaen ti panagaramid iti naimbag ken makagunggona nga ar-aramid maipaay iti sabsabali. Ti kadawyan unay a sasao maipaay iti “naimbag” iti Biblia isu ti Hebreo a sao a tohv ken ti Griego a sao nga a·ga·thosʹ; ti a·ga·thosʹ gagangay a maar-aramat iti moral wenno narelihiosuan a kaipapanan.
Kinaimbag ni Jehova. Naan-anay ken kasasayaatan ti kinaimbag ni Jehova a Dios. Kuna ti Kasuratan: “Naimbag ken nalinteg ni Jehova” (Sal 25:8), ken iyebkas dayta: “O anian a nagdakkel ti kinaimbagna!” (Zac 9:17) Ni Jesu-Kristo, nupay addaan iti daytoy a kualidad a kinasayaat iti moral, saanna nga awaten ti “Naimbag” kas maysa a titulo, a kinunana iti daydiay nangawag kenkuana iti “Naimbag a Mannursuro”: “Apay nga awagannak iti naimbag? Awan asinoman a naimbag, malaksid ti maysa, ti Dios.” (Mr 10:17, 18) Gapuna binigbigna ni Jehova kas ti kasasayaatan a wadan iti kinaimbag.
Idi kiniddaw ni Moises a kitaenna ti dayag ti Dios, insungbat ni Jehova: “Siak palabasekto iti sanguanan ti rupam ti isuamin a kinaimbagko, ket ideklarakto ti nagan ni Jehova iti sanguanam.” Ni Jehova sinalingdanna ni Moises tapno saanna a makita ti rupana, ngem bayat ti ilalabasna (nabatad a babaen ti angheliko a pannakabagina [Ara 7:53]) kinunana ken Moises: “Jehova, Jehova, maysa a Dios a naasi ken managparabur, nabannayat nga agunget ken naruay iti naayat a kinamanangngaasi ken kinapudno, mangsalsalimetmet iti naayat a kinamanangngaasi maipaay iti rinibu, mamakpakawan iti biddut ken salungasing ken basol, ngem nikaanoman saanto a mangipaay iti pannakailaksid iti dusa.”—Ex 33:18, 19, 22; 34:6, 7.
Ditoy, makita a ti kinaimbag ket maysa a kualidad a ramanenna ti asi, naayat a kinamanangngaasi, ken kinapudno, ngem saanna a pulos panuynoyan wenno kanunongan ti kinadakes. Maibatay itoy, ni David maikararagna ken Jehova a pakawanenna ti basbasolna ‘maipagapu iti kinaimbag ni Jehova.’ (Sal 25:7) Iti panangipaayna iti Anakna kas sakripisio maipaay iti basbasol, naiparangarang ti kinaimbag ni Jehova, kasta met ti ayatna. Babaen itoy, impaayna ti pamay-an a pangtulong kadagidiay agtarigagay iti banag a pudpudno a naimbag. Kagiddan dayta, kinondenarna ti kinadakes ket impasdekna ti pakaibatayan ti naan-anay a panangpennek iti kinahustisia ken kinalinteg.—Ro 3:23-26.
Maysa a Bunga ti Espiritu. Ti kinaimbag ket maysa a bunga ti espiritu ti Dios ken bunga ti lawag manipud iti kinapudno a Saona. (Ga 5:22; Efe 5:9) Masapul a sukayen dayta ti Kristiano. Ti panagtulnog iti bilbilin ni Jehova patanorenna ti kinaimbag; awan ti tao a nagbalin a naimbag maibatay iti bukodna a gapuanan. (Ro 7:18) Ti salmista impakaasina iti Dios kas Gubuayan ti kinaimbag: “Isuronak iti kinaimbag, kinasimbeng ken pannakaammo a mismo, ta winatwatko ti pammati kadagiti bilinmo,” ken, “Naimbagka ken agar-aramidka iti naimbag. Isurom kaniak dagiti alagadem.”—Sal 119:66, 68.
Ti Kinaimbag Mangipaay Kadagiti Gunggona. Ti kinaimbag mabalin a kaipapananna met ti kinamanagparabur, ti panangipaay iti makagunggona a bambanag iti sabsabali. Tartarigagayan ni Jehova nga iparangarang ti kinaimbag iti ilina, kas iti inkararag ni apostol Pablo maipaay kadagiti Kristiano idiay Tesalonica: “Kankanayon nga ikararagandakayo, tapno ti Diostayo ibilangnakayo a maikari iti panangayabna ken naan-anay nga aramidenna ti isuamin a pakaay-aywanna a kinaimbag ken ti aramid ti pammati buyogen ti pannakabalin.” (2Te 1:11) Adu dagiti pagarigan ti naruay a kinaimbag ti Dios kadagidiay mangin-inanama kenkuana. (1Ar 8:66; Sal 31:19; Isa 63:7; Jer 31:12, 14) Mainayon pay, “ni Jehova naimbag iti isuamin, ket dagiti asina addada iti amin nga ar-aramidna.” (Sal 145:9) Maitunos iti panggepna, ipaayna ti naimbag iti isuamin, tapno ti kinaimbagna tignayenna ti adu nga agserbida kenkuana ket iti kasta magun-odanda ti biag. Kasta met, ti asinoman a mangwatwat iti kinaimbag maysa bendision kadagiti katimpuyogna.—Pr 11:10.
Kas ad-adipen ti Dios ken tumutulad kenkuana, naibilin kadagiti Kristiano a paneknekanda ti naimbag ken naan-anay a pagayatan ti Dios maipaay kadakuada (Ro 12:2); masapul a kumpetda iti naimbag (Ro 12:9), aramidenda dayta (Ro 13:3), agaramidda iti naimbag (Ro 2:10), surotenda dayta (1Te 5:15), agregtada iti dayta (1Pe 3:13), tuladenda ti naimbag (3Jn 11), ken parmekenda ti dakes babaen iti dayta (Ro 12:21). Ti panagaramidda iti naimbag ket nangnangruna nga agpaay kadagidiay nainaig kadakuada iti Nakristianuan a pammati; kanayonanna, aramiden dayta maipaay iti amin a sabsabali pay.—Ga 6:10.
Nainaig a Termino. Ti sabali pay a sao, ka·losʹ, ket umasping iti Griego a sao maipaay iti naimbag (a·ga·thosʹ). Ti immun-una a nadakamat ipasimudaagna daydiay nainkasigudan a naimbag, napintas, nasayaat ti pannakaibagayna kadagiti kasasaad wenno panggep dayta (kas iti nasayaat a daga; Mt 13:8, 23), ken daydiay addaan iti nasayaat a kualidad, agraman daydiay naimbag, umiso, wenno nadayaw (kas iti nagan ti Dios; San 2:7) sigun iti naipasdek a pagalagadan. Ti kaipapananna ket asideg ti pannakainaig iti naimbag, ngem mabalin a maiduma babaen ti pannakaipatarus dayta kas “nasayaat,” “umiso,” wenno “napudno.”—Mt 3:10; San 4:17; Heb 13:18.